Die Yen Suẹn Oborẹ Wo Che Yeren Akpọ Wẹn Wan?
Ihwo buebun vwo imuẹro nẹ ẹgba evo rẹ ayen rhiẹromrẹ-ẹ yen sun akpeyeren rayen. Fikirẹ imuẹro nana, kọ nẹrhẹ ayen phiobọphiyọ erọnvwọn re sa ghwa uyovwin eyovwon yẹrẹ nẹrhẹ akpọ rayen yovwinphiyọ.
OBORẸ IHWO BUEBUN VWO IMUẸRO KPAHEN
IHWO RE FAN OTỌ RẸ ISIO: Ihwo evo vwo imuẹro nẹ ẹdia rẹ isio na hepha vwẹ ọke re vwo vwiẹ ayen yen che sun oborẹ ayen che yeren akpọ wan. Ọtiọyena, kẹ ayen bru ihwo re fan otọ rẹ isio, emeranvwe, ọnre na kugbe iplanẹti ra rere ayen sa vwọ riẹn obo re cha phia kẹ ayen vwẹ obaro na je kẹnoma kẹ.
FENG SHUI: Ihwo efa vwo imuẹro nẹ obo ra bọn iwevwin je rhuẹrẹ fia wan sa ghwa oyovwen yẹrẹ omavwerhovwẹn rhe ayen. Ọshare ọvo re se Lo Wing,a rọ dia Hong Kong da ta: “Onini rẹ feng shui vuẹ vwẹ nẹ mi de phi oragha ro lo wrowro phiyọ ushoghwa mẹ, ọ cha chọn vwẹ uko vwo vwo igho buebun.”
ẸGA RẸ ESẸ EMỌ: Ihwo efa vwo imuẹro nẹ ofori nẹ ayen ga esẹ ride ri ghwure yẹrẹ eghẹnẹ sansan rere ayen sa vwọ mrẹ ochọnvwe vẹ ebruphiyọ. Aye ọvo re se Van rọ dia Vietnam da ta: “Mi vwo imuẹro nẹ siẹrẹ me da vware esẹ mẹ ride ji brọghọ phiyọ ayen oma, ọnana cha chọn vwẹ vẹ emọ mẹ uko vwo yeren omamọ akpọ enẹna ji te obaro na.”
ẸRHOMAVWIẸ RẸ IHWO RI GHWURU: Ihwo buebun vwo imuẹro nẹ ihwo ri ghwuru yen a rhoma djẹ evwievwiẹ phiyọ akpọ na. Ayen vwo imuẹro nẹ oka rẹ akpọ ayen yerin vwẹ obuko tavwen ayen ki ghwu yen che dje oka rẹ akpọ ayen che yerin enẹna sẹ ọ rẹ erhuvwu yẹrẹ umiovwo.
Dedenẹ Ihwo buebun ni imuẹro nana phiyọ imuẹro ghevweghe, je ayen ji ru erọnvwọn kerẹ ephaẹbọ re vwo nẹ ẹhẹrhobọ, isio, ame, ughegbe kugbe erọnvwọn efa. Ọkiọvo, ayen roro nẹ erọnvwọn tiọyena sa chọn ayen uko vwọ riẹn obaro na.
IMUẸRO NANA GHENE SA VWẸ UKẸCHA PHIA?
Ihwo re vwẹroso imuẹro vẹ irueru tiọyena se yeren omamọ akpọ je mrẹ ofuvwegbe vwẹ obaro na?
Roro kpahen obo re phia vwọ kẹ ọshare ọvo re se Hào rọ dia Vietnam. Ọ ra guọnọ ochọnvwe vwẹ obọ rẹ ihwo ri nẹ isio, feng shui kugbe ẹga rẹ esẹ emọ. Ọ mrẹ erhuvwu no rhe? Hào da ta: “Eki mẹ de rhi she, me da rhe riesa, hirharoku ebẹnbẹn rẹ orua, ofu rẹ akpọ de rhi dje vwe hwe.”
Qiuming rọ dia ohwo ri Taiwan ji vwo esegbuyota kpahen isio eno, re vwo duotọ rẹ akpeyeren, ẹrhomavwiẹ rẹ ihwo ri ghwure, urhiẹvwe, feng shui kugbe ra vwọ ga esẹ ride ri ghwure. Ọ vwọ fuẹrẹn imuẹro nana eje nu, ọ da ta: “Me da rhe mrẹvughe nẹ iyono vẹ ẹkuruemu yena vwọso ohwohwo e je vọn vẹ otighi. Me da je rhe riẹn nẹ ọ dia ọkieje yen oborẹ isio mraro kpahen vwọ gba-a. Vwọ kpahen ẹrhomavwiẹ rẹ ihwo ri ghwure, ọ da dianẹ oka rẹ akpọ ayen yerin tavwen ayen ki ghwu chọrọ ayen ẹro, kẹ mavọ ayen se vwo yeren omamọ rẹ akpọ vwẹ obaro na a da rhoma vwiẹ ayen?”
“Me da rhe mrẹvughe nẹ iyono vẹ ẹkuruemu yena vwọso ohwohwo, e je vọn vẹ otighi.”—QIUMING, TAIWAN
Kirobo rẹ Hào, Qiuming vẹ ihwo efa rhe mrẹvughe, ọ dia isio, esẹ ride ri ghwure, urhiẹvwe yẹrẹ ẹrhomavwiẹ rẹ ihwo ri ghwuru yin che dje oka rẹ akpọ re che yerin vwẹ obaro na-a. Ọnana ko mudiaphiyọ nẹ o vwo obo re ru rọ sa nẹrhẹ akpọ avwanre yovwinphiyọ vwẹ obaro na?
Ihwo buebun rorori nẹ e vwo kpo isikuru ride ji vwo igho buebun, yen cha nẹrhẹ e yeren omamọ akpọ vwẹ obaro na. Die yen nẹ obuko rẹ ojẹ tiọyena rẹ ihwo jẹre na rhe?
a E wene edẹ evo vwẹ uyono nana vẹ e re vwọ kpahọn.
b A mrẹ eta nana vwẹ Baibol na vwẹ Galesha 6:7. Ọhọ rẹ eta nana je vwomaphia vwẹ eta rẹ ihwo rẹ Asia evo ri titiri, rọ tare nẹ, Wọ da kọn ikpogri ku wọ kọrọ ikpogri, wọ da kọn isha ku wọ kọrọ isha.