Wo se Toroba Omavwerhovwẹn rẹ Orua Wẹn

Jihova guọnọre nẹ erua vwo omavwerhovwẹn. (Un 127:​3-5; Agh 9:9; 11:9) Ẹkẹvuọvo, aghọghọ rẹ avwanre sa va avwanre abọ fikirẹ ukpokpoma rẹ akpọ kugbe echobọ rẹ ihwo rẹ orua rẹ avwanre. Die yen ohwo ọvuọvo se ru rere orua na se vwo vwo omavwerhovwẹn?

Ofori nẹ ọshare brọghọ phiyọ aye rọyen oma. (1Pi 3:7) Ọ vẹ ọyen ghwọrọ ọke kugbe. O rhẹro rẹ obo re vrẹ ẹgba rẹ aye rọyen mie-e, o ji dje ọdavwaro phia kpahen oborẹ aye rọyen ruẹ kẹ vẹ orua na. (Kọl 3:15) O dje ẹguọnọ rọyen phia ji jiri aye rọyen.​—Isẹ 31:​28, 31.

Ofori nẹ aye guọnọ idjerhe sansan ro vwo bicha ọshare rọyen. (Isẹ 31:12) Ọ vwomakpotọ kẹ ji nene wiankugbe. (Kọl 3:18) Ọ ta ota kẹ ọshare rọyen vwẹ idjerhe ọghọ je ta omamọ rẹ ota kpahọn kẹ ihwo efa.​—Isẹ 31:26.

Ofori nẹ emiọvwọn nene emọ rayen ghwọrọ ọke kugbe. (Urh 6:​6, 7) Ayen vuẹ emọ rayen nẹ ayen vwo ẹguọnọ rayen. (Mt 3:17) Ọke rẹ emiọvwọn da ghwọkuẹ emọ rayen, ayen ruo vwọrẹ ẹguọnọ vẹ aghwanre.​—Ẹf 6:4.

Ofori nẹ emọ muọghọ kẹ esẹ vẹ ini rayen ji nyẹme rayen. (Isẹ 23:22) E jẹ emọ vuẹ esẹ vẹ ini rayen kpahen obo ri kpokpo ayen ẹwẹn vẹ oborẹ oma ruẹ ayen wan. E jẹ ayen rhiabọreyọ ọghwọku rẹ esẹ vẹ ini rayen, ji muọghọ kẹ ayen.​—Isẹ 19:20.

NI IVIDIO NA VWO AGHỌGHỌ VWEVUNRẸ ORUA WẸN, RERE WỌ KPAHENPHIYỌ ONỌ NANA:

Die yen ihwo rẹ orua na ọvuọvo ruru omavwerhovwẹn sa vwọ dia orua rayen?