Muegbe Enẹna Vwọ kẹ Omaesivwo rẹ Okpakpa

Diesorọ e vwo muegbe? Omaesivwo rẹ okpakpa vẹ e vwo mu ohwo kpọ họspito e mi phio phiyọ ehwa sa phia kpregede. Ọtiọyena, tavwen omaesivwo rẹ okpakpa ke vwomaphia, ru obo wo se ru eje vwo muegbe enẹna rere wọ sa vwọ mrẹ ukẹcha ro me yovwin siẹrẹ ọ da phia. Wo de ru ọtiọyen ju wo djephia nẹ wo muọghọ kẹ arhọ vẹ urhi ri Jihova kpahen ọbara.​—Iruo 15:​28, 29.

Die yen wo se ru vwo muegbe?

• Nẹrhovwo, wọ jomaotọ fili rẹ ikadi ri DPAa na. Ighwoghwota ri bromaphiyame re sa reyọ ikadi ri DPA na vwo mie odibo rọvwẹrote ẹbe rẹ ukoko na, ọtiọyen ji te Identity Card (ic) vwọ kẹ emọ ri ji rhi te imiragua-a

• Ọ da dianẹ wọ mrevun, gba nọ ekpako rẹ ukoko wẹn ayen kẹ wẹ ọmọbe rẹ Information for Expectant Mothers (S-401). Ọbe nana cha chọn wẹ uko vwo bru omamọ orhiẹn kpahen omaesivwo wẹn vwẹ uvwre rẹ ọke wọ vwọ mrevun vẹ ọke wo che vwo vwiẹ

• Ọ da dianẹ ona rẹ omaesivwo ra cha vwọ kẹ wẹ na che churobọ si ota rẹ ọbara yẹrẹ ọ cha nẹrhẹ wọ dia họspito, gba vuẹ ekpako rẹ ukoko wẹn phiyotọ, wọ je vuẹ họspito na nẹ Oseri ri Jihova ọvo che bru we rhe

Mavọ yen ekpako na sa vwọ vwẹ ukẹcha phia? Ayen sa chọn wẹ uko vwo fili rẹ ikadi ri DPA na. Ẹkẹvuọvo, ekpako na che brorhiẹn ro shekpahen omaesivwo kẹ wẹ-ẹ, ayen je cha ta iroro rayen vwẹ ojẹ ro fori nẹ wọ jẹ komobọ-ọ. (Rom 14:12; Gal. 6:5) Wọ da vuẹ ekpako rẹ ukoko wẹn nẹ wo hirharokuẹ ẹdia rẹ omaesivwo ro churobọ si ọbara, kẹ ayen cha chọn wẹ uko vwo se Umẹ Rọvwẹrote Omaesivwo (HLC).

Ukẹcha vọ yen HLC sa vwọ phia? E yono iniọvo re ga vwẹ HLC oborẹ ayen sa vwọ chọn ihwo re wian vwẹ akon rẹ iruo re vwẹrote omaesivwo vẹ e re vwẹrote eta ri shekpahen urhi vwo vwo ẹruọ rẹ ẹbẹre rẹ avwanre kare vwẹ ota rẹ ọbara. Ayen se nene idọktọ wẹn ta ota kpahen ona rẹ omaesivwo ro me yovwin ro churobọ si ọbara ẹreyọ-ọ. Wọ da guọnọ, ayen sa chọn wẹ uko vwọ guọnọ idọktọ ọfa rọ rhọnvwephiyọ ẹdia rẹ wọ kare vwẹ ota rẹ ọbara.

NI IVIDIO NA OBO WO SE VWO BRORHIẸN RO SHEKPAHEN ỌBARA VWẸ ẸROEVWOTE RẸ OMAKPOKPỌ WẸN, RERE WỌ KPAHENPHIYỌ ONỌ NANA:

• Die yen wo yono nẹ ividio na rhe rọ sa chọn wẹ uko vwo muegbe vwọ kẹ omaesivwo rẹ okpakpa ro shekpahen ọbara?

  Ẹkpahọnphiyọ wẹn