“Akpọ na yovwi emu buebu; Ọghẹnẹ, Ọghẹnẹ rẹ avwanre, o bruphihọ kẹ avwanre nure.”—UNE RẸ EJIRO 67:6
Riavwerhen rẹ Ebruphiyọ rẹ Ọmemama na Bẹdẹ
Ọghẹnẹ ve ive kẹ ọmraro Ebraham nẹ ọmọ ọvo ro che nẹ uvwiẹ rọyen rhe cha ghwẹ ebruphiyọ rhe “ẹgborho rẹ akpo na ejobi.” (Jẹnẹsis 22:18) Ono yen cha dia ọmọ nana?
Omarẹ ẹgbukpe 2,000 re wanre, Ọghẹnẹ da vwẹ ẹgba kẹ Jesu ro nẹ uvwiẹ rẹ Ebraham rhe, rere o se vwo ru emu igbevwunu. Emu igbevwunu yena djerephia nẹ ive re ve kẹ Ebraham na che rugba womarẹ Jesu.—Galesha 3:14.
Emu igbevwunu rẹ Jesu ruru na nẹrhẹ a riẹn nẹ ọyen ohwo rẹ Ọghẹnẹ sanere ro che ku ebruphiyọ ku ihworakpọ, i ji dje oborẹ Ọghẹnẹ cha reyọ Jesu vwo bruba kẹ ihworakpọ bẹdẹ bẹdẹ. Jokaphiyọ oborẹ emu igbevwunu rẹ Jesu ruru na vwo dje iruemu iyoyovwin rọyen phia.
Erorokẹ—Jesu sivwin ihwo re muọga.
Ọhonvwoti ọvo rẹ Jesu nẹ o sivwin ọyen. Jesu de djobọte, ọ da ta: “Me rhọvwere!” Siẹvuọvo na, oti na de ghwe no.—Mak 1:40-42.
Ẹse eruo—Jesu ghẹrẹ ihwo rẹ owẹnvwe hwe.
Jesu guọnọre nẹ owẹnvwe hwe ihwo-o. Ọ vrẹ obọvo rẹ Jesu vwọ reyọ imikara vẹ imiyerin vwọ ghẹrẹ ihwo uriorin buebun. (Matiu 14:17-21; 15:32-38) Ayen ejobi vwọ re evun vọn nu, emu buebun de ji chekọ.
Arodọnvwẹ—Jesu rhọnvwọn ihwo ri ghwuru.
“Ẹro rọye da dọn” Jesu, ọ da rhọnvwọn ọmọ vuọvo rẹ ayeuku na vwori kidie o vwo ohwo ọfa rọ cha vwẹrote-e.—Luk 7:12-15.