AKPEYEREN RẸ INENIKRISTI
Mrẹ Omavwerhovwẹn Vwẹ Aghwoghwo rẹ Iyẹnrẹn Esiri Na
Ọ bẹn kẹ wẹ wo vwo ghwoghwo ota dẹvure? Buebun rẹ avwanre cha tanẹ e. Diesorọ? Ọ sa dianẹ vwẹ asan rẹ avwanre de ghwoghwo na, ihwo rhọnvwa kerhọ-ọ yẹrẹ oshọ re vwo ghwoghwo kẹ erhorha mu avwanre. Vwọrẹ uyota, erọnvwọn nana sa nẹrhẹ aghọghọ nu avwanre oma. Dedena, avwanre ga Ọghẹnẹ rẹ omavwerhovwẹn, ọ guọnọre nẹ avwanre ga vẹ aghọghọ. (Une 100:2; 1 Tim. 1:11) Iroro erha vọ yen sa nẹrhẹ avwanre ghwoghwo vẹ omavwerhovwẹn?
Ẹsosuọ, avwanre ghwoghwo ovuẹ rẹ iphiẹrophiyọ. Dede nẹ iphiẹrophiyọ rhe ihwo nonẹna-a, avwanre sa ghwa “ikun esiri oyoyovwi” rhe ihwo. (Aiz. 52:7) Iyẹnrẹn esiri rẹ Uvie rẹ Ọghẹnẹ na sa kẹ avwanre aghọghọ. Tavwen wo ki re ghwoghwo, roro kpahen ebruphiyọ rẹ Uvie rẹ Ọghẹnẹ cha ghwa rhe otọrakpọ na.
Ọrivẹ, iyẹnrẹn esiri rẹ avwanre ghwoghwo na kẹ ihwo erere re rhiẹromrẹ kugbe ọ rẹ ẹwẹn. Ayen yono obo re siobọnẹ iruemu re sa wan ayen oma, ji vwo iphiẹrophiyọ rẹ arhọ rẹ bẹdẹ. (Aiz. 48:17, 18; Rom 1:16) Avwanre sa vwẹ ẹro roro nẹ avwanre ruiruo ra vwọ guọnọ ihwo, e mi sivwin ayen. Dede nẹ ihwo evo cha rhọnvwe nẹ e sivwin aye-en, avwanre hiẹ guọnọ ihwo re guọnọ sivwin.—Mat. 10:11-14.
Ọrerha rọ je ma ghanre kparobọ yen, aghwoghwo rẹ avwanre brọghọ phiyọ Jihova oma. Ẹro ọghanghanre yen o vwo ni iruo rẹ aghwoghwo rẹ avwanre. (Aiz. 43:10; Hib. 6:10) Kpobarophiyọ, ọ kẹ avwanre ẹwẹn ọfuanfon rọyen re vwo ruiruo na fiotọ. Ọtiọyena, gba vuẹ Jihova nẹ ọ kẹ wẹ aghọghọ, rọ dia omamọ rẹ ẹwẹn ọfuanfon na. (Gal. 5:22) Womarẹ ukẹcha rọyen, avwanre se phi oshọ rẹ avwanre kparobọ, ji ghwoghwo vẹ uduoyivwin. (Iruo 4:31) Ọke yena, otoro ẹwẹn rẹ ihwo vwo kpahen aghwoghwo na-a, oma cha vwerhen avwanre vwẹ iruo na.—Izi. 3:3.
Uruemu vọ yen wọ guọnọ djephia vwẹ iruo rẹ aghwoghwo na? Mavọ wo se vwo dje aghọghọ phia?
NI IVDIO RẸ ME RHOMA MRẸ AGHỌGHỌ WOMARẸ UYONO VẸ EROROKODO, RERE WỌ KPAHENPHIYỌ ENỌ NANA:
Diesorọ uyono rẹ Baibol vwọ reyọ ẹdia rẹsosuọ vwẹ akpeyeren rẹ avwanre, ọ da tobọ dianẹ avwanre ghwọrọ inọke buebun vwẹ aghwoghwo na kemeranvwe kemeranvwe?
Idjerhe vọ yen avwanre sa vwọ vwẹrokere Mary?
Ọke vọ yen wo vwo roro kpahen Ota rẹ Ọghẹnẹ?
Die yen kẹ wẹ omavwerhovwẹn ọke wo de ghwoghwo iyẹnrẹn esiri na?