Vwẹrokere Emraro Na—Habakọk
1. Diesorọ ẹdia rẹ avwanre hepha vwọ họhọ ọrẹ Habakọk?
1 Akpọ na vwo miovwẹn phiyọ na, avwanre se vwo oka rẹ ẹwẹn ro rhe Habakọk rọ nọ Jihova nẹ: “Die wọ vwọ nẹrhẹ ovwẹ mrẹ oruchọ re me vwọ kparo nẹ ukpokpogho?” (Hab. 1:3; 2 Tim. 3:1, 13) Avwanre de roro kpahen ovuẹ ri Habakọk kugbe udje rẹ evun-ẹfuọn rọyen, ọyena sa nẹrhẹ avwanre gan ravwọ hẹrhẹ ẹdẹ rẹ ẹdjọ-eguon ri Jihova.—2 Pita 3:7.
2. Mavọ avwanre sevwo djephia nẹ avwanre yerẹn vwọrẹ evun-ẹfuọn nonẹna?
2 Yeren Vwọrẹ Evun-ẹfuọn: Ukperẹ Habakọk vwọ vwẹ uphẹn kẹ ẹdia rẹ umiovwon rọ herọ ọke yena nẹ ọ kuọrọn ẹwẹn rọyen, ọ de muomaphiyọ iruo rẹ Ọghẹnẹ. (Hab. 2:1) Jihova vwẹ imuẹro kẹ ọmraro na nẹ ota Rọyen che rugba siẹrẹ ọke ro bru kẹ de te, nẹ “ọvwata kọ rhọ fiki rẹ esegbuyota rọye.” (Hab. 2:2-4) Die yen ọnana mudiaphiyọ kẹ Inene-ri-Kristi ri yerẹn vwẹ ọke rẹ oba na? Obo re ma ghanre, ọ dia ravwọ riẹn ọke rẹ oba na cha vwọ rhe-e, ẹkẹvuọvo revwo vwo imuẹro nẹ ọ cha rhe. Esegbuyota yen mu avwanre vwọ rhẹrẹ, ji vwẹ iruo rẹ uvie na vwọ ka obaro vwẹ akpeyeren.—Hib. 10:38, 39.
3. Diesorọ avwanre vwọ sẹro rẹ aghọghọ rẹ avwanre vwẹ ẹga ri Jihova?
3 Ghọghọ Vwẹ Jihova: A cha davwen esegbuyota rẹ avwanre ni ọke rẹ Gọg ri Magọg de che mu kpahen ihwo ri Jihova. (Izi. 38:2, 10-12) Ihwo ri phikparobọ ọke re de phi ofovwin nu ji hirharokuẹ ebẹnbẹn. Emu sa kanre, ekuakua rẹ akpeyeren se ghwru, uweren ọgangan sa rhe vwomaphia. Die yen avwanre che ru siẹrẹ ebẹnbẹn da vwomaphia? Habakọk rhẹro rẹ ebẹnbẹn, ọtiọyena o de brorhiẹn rọ vwọ sẹro rẹ aghọghọ rọyen vwẹ ẹga ri Jihova. (Hab. 3:16-19) “Aghọghọ rẹ Ọrovwohwo” cha vwẹ ukẹcha kẹ avwanre vwo chirakon rẹ edavwini re cha vwẹ obaro na.—Neh. 8:10; Hib. 12:2.
4. Die yen sa kẹ avwanre aghọghọ asaọkiephana kugbe ọke rọ cha obaro na?
4 Ihwo ri Jihova che sivwin wan ẹdẹ rẹ ẹdjọ-eguon rọ cha na, e che yono ayen idjerhe rẹ Ọghẹnẹ rọ kẹ ohwo arhọ. (Hab. 2:14) Ihwo ra cha rhọnvwọn nẹ ushi rhe ji che yono kpahen Jihova. Asaọkiephana, avwanre reyọ kuphẹn kuphẹn vwọ tota kpahen Jihova vẹ iruo rẹ igbunu rọyen!—Une 34:1; 71:17.