Onọ Rọhẹ Ekpeti Na
◼ Ofori nẹ ighwoghwota reyọ intanẹti vwo ghwoghwota yẹrẹ vwẹ uyono ri Baibol mu vwọkẹ erhọrha vwẹ ẹkuotọ ọfa?
Ighwoghwota evo reyọ uyono ri Baibol vwo muẹ womarẹ intanẹti vwọkẹ ihwo rehẹ ẹkuotọ ra da dobọ rẹ iruo rẹ avwanre ji, yẹrẹ vwẹ asan rẹ ighwoghwota ghwe bu-un. Ọkiọvo, omamọ iyẹnrẹn no cha. Ẹkẹvuọvo, imuoshọ herọ siẹrẹ ighwoghwota de si i-mel yẹrẹ nene erhorha tota womarẹ intanẹti. (Ni Iruo Ruvie Na ọrẹ July 2007, aruọbe 3, ọrẹ Oyibo.) Dedenẹ ẹwẹn revwo ghwoghwota kẹ ihwo ri vwo ẹwẹn esiri ọyen e vwo ruo, oka rẹ otaẹtakuẹgbe tiọyena sa nẹrhẹ oniọvo rẹ ọshare yẹrẹ aye nene orhare ohwo mu ugbeyan, yẹrẹ tobọ nene ohwo ro gbevwọso ukoko na mu ugbeyan. (1 Kọr. 1:19-25; Kọl. 2:8) Vwọ vrẹ ọyena, vwẹ ẹkuọtọ ra da dobọ rẹ iruo rẹ avwanre ji, ihwo ri suẹn sa vwẹ kidjerhe kidjerhe vwọ guọnọ oka rẹ i-mel yẹrẹ ileta tiọyena, ọnana se phi iniọvo avwanre phiyọ okpetu. Ọtiọyena, ighwoghwota womarẹ intanẹti guọnọ ihwo rẹ ayen che ghwoghwota kẹ vwẹ ẹkuotọ ọfa-a.
Jokpanẹ oghọn rukoko vwẹ odjekẹ ọfa phia, ọ rha dia ọtiọye-en, siẹrẹ avwanre de ghwoghwota kẹ ọrhorha ro nẹ ẹkuotọ ọfa rhe, ukperẹ avwanre vwọ davwẹngba vwọ reyọ uyono ri Baibol mu vwọ kẹ ohwo na siẹrẹ o de rhivwin kpo nu, avwanre se dje oborẹ ọ sa vwọ mrẹ evuẹ efa vwẹ jw.org yẹrẹ si vwo rhe oghọn rukoko rọhẹ ẹkuotọ rọ hepha. Avwanre ji sa vuẹ nẹ o kpẹ Ọguan Ruvie rọ kẹrẹ uwevwin rọyen. Vwọrẹ uyota, ẹkuotọ evo vwo Ọguan Ruvie-e. Ọ da guọnọ nẹ Oseri ri Jihova ọvo bro rhe, avwanre fili rẹ ifọmu ri Please Follow Up (S-43), rere a reyọ vwọ kẹ osiẹbe rẹ ukoko na, osiẹbe na me womarẹ jw.org reyọ vwo rhe oghọn rukoko rẹ ohwo na hepha. Oghọn rukoko rọhẹ ẹkuotọ rẹ ohwo na hepha riẹn kpahen ẹdia rẹ ẹkuotọ na mamọ, oghọn rukoko yena kọyen sa reyọ ukẹcha ro fori vwọ phia.—Ni Iruo Ruvie Na ọrẹ June 2014, aruọbe 7, vẹ Iruo Ruvie Na ọrẹ November 2011, aruọbe 4, ọrẹ Oyibo.
Ọ da dianẹ ohwo rẹ avwanre yono enẹna kua kpẹ ẹkuotọ ọfa yẹrẹ avwanre nene ohwo rọhẹ ẹkuotọ ọfa yono Baibol na asaọkiephana womarẹ intanẹti, ofori nẹ avwanre nene odjekẹ rehẹ obenu na. Ẹkẹvuọvo avwanre se re yono bẹsiẹ a vwọ mrẹ oghwoghwota rọhẹ ẹkuotọ rọyen ro che yono. Jẹ ọ da dianẹ ẹkuotọ ra da dobọ rẹ iruo rẹ avwanre ji kọyen ohwo na dia, ofori nẹ e nomaso siẹrẹ a da tota kpahen Baibol na womarẹ i-mel, ileta, ifonu, yẹrẹ erọnvwọn tiọyena.—Mat. 10:16.