Ru “Emu Esiri” Womarẹ Ẹse-Eruo (Mat. 12:35a)

Aphro herọ-ọ, avwanre eje guọnọ ru “emu esiri” kẹ ihwoefa womarẹ evwo “ruẹ ẹse.” (Rom. 12:13) E jẹ ekpako na vwo ọrhuẹrẹphiyotọ ra vwọ vwẹrote ọtota ro nẹ ukoko ọfa rhe, vẹ oma-ẹfa rọyen. Ẹkẹvuọvo avwanre se jẹ ẹwẹn re vwọ ruẹ ẹse evwo, kiridie oborẹ avwanre vwori te emuọvo-o, yẹrẹ oshọ rẹ ihwoefa vwo nene avwanre dia uwevwin mu avwanre. Avwanre da reyọ uchebro ri Jesu vwọ kẹ Mata vwo te ubuidu, ọyena sa chọn avwanre uko vwọ vrabọ rẹ iroro ọtiọyen. (Luk 10:​39-​42) Jesu nabọ dje fiotọ nẹ ‘erhuvwu’ ro nẹ omarẹ ẹse-eruo cha, ọyen re vwo kuomakuẹgbe, ji bru ohwohwo uche, ọ dia ọ rẹ okpemu ra ria vẹ uwevwin ra nabọ rhuẹrephiyọ-ọ. A da vwẹ eta nana ruiruo, avwanre eje ki se ru “emu esiri” kẹ iniọvo rẹ avwanre kirobo ri Baibol na tare.​​—⁠3 Jọn 5-8.