Vwẹrokere Emraro na—Zẹfanaya
1. Vwevunrẹ ẹdia vọ yen Zẹfanaya da ga kerẹ ọmraro, kẹ mavọ yẹn ọ vwọ dia udje oyoyovwin kẹ avwanre?
1 Vwẹ uherevie rẹ ẹgbukpe ujorin ighwrẹn, ihwo ri Juda gbomavwra ẹga ri Baal. Eghene Josaya kọyen suẹn ọke revwo hwe orharhe rẹ ovie Amọn nu. (2 Ikun 33:21–34:1) Ọke yena, Jihova da vwẹ Zẹfanaya vwo mwu rere o ghwoghwo orhiẹn-ebro oghwọrọ rọyen. Ọ sa dianẹ Zẹfanaya nẹ orua rẹ ivie ri Juda rhe, jẹ ọ diẹ ọyen o vwo jẹ orhiẹn-ebro ri Jihova eghwoghwo kẹ isun ri Juda-a. (Zẹf. 1:1; 3:1-4) Avwanre je sa vwẹrokere uruemu rẹ uduefiogbere ri Zẹfanaya, siẹrẹ avwanre rha vwẹ uphẹn kẹ ihwo rẹ orua ravwanre nẹ ayen gbowọ phiyọ ẹga rẹ avwanre vwọ kẹ Jihova-a. (Mat. 10:34-37) Ovuẹ vọ yin Zẹfanaya ghwoghwori, kẹ iyẹnrẹn vọ yin nuro rhe?
2. Die yen avwanre ru rere avwanre se vwo sivwin vwẹ ẹdẹ ophu ri Jihova?
2 Guọnọ Jihova: Jihova ọvo yin se sivwin avwanre ohwo vuọvo vwẹ ẹdẹ ophu rọyen. Kọyen sọrọ Zẹfanaya vwọ vuẹ ihwo ri Juda nẹ ayen guọnọ Jihova, ọvwata kugbe dẹndẹn ọke je vwọ herọ na. (Zẹf. 2:2, 3) Ọyen obo ra je guọnọ mie avwanre nonẹna. Kerẹ Zẹfanaya, rẹ avwanre vwọ vuẹ ihwoefa nẹ ayen guọnọ Jihova na, avwanre komobọ guọnọ ‘chuko ku Jihova-a.’ (Zẹf. 1:6) Ukperẹ ọtiọyen, avwanre guọnọ Jihova womarẹ eyono rẹ Ota rọyen kugbe avwanre vwọ nẹrhovwo vwo rhe vwọ kẹ odjekẹ. Avwanre guọnọ ọvwata womarẹ uruemu ọfuanfon ravwanre. Avwanre je guọnọ dẹndẹn womarẹ ẹmienyo vwọ kẹ odjekẹ rẹ ukoko ri Jihova.
3. Diesorọ o vwo fo nẹ avwanre vwo ẹwẹn esiri kpahen aghwoghwo ravwanre?
3 Omamọ rẹ Iyẹnrẹn: Ovuẹ roghwọrọ rẹ Zẹfanaya ghwoghwori te ubiudu rẹ ihwo ri Juda evo, marho kẹ Josaya, rọ guọnọ Jihova ọke rọ vwọ hẹ eghene. Josaya jowọ ro vwo siẹ edjọ ẹgọ nẹ otọ na. (2 Ikun 34:2-5) Dede nẹ ubi Ruvie na se she vwẹ orhoma rẹ idjerhe, oragha yẹrẹ ohri rẹ inwe nonẹna, evo she vwẹ otọ esiri, ke mọ emamọ. (Mat. 13:18-23) Avwanre vwo imwẹro nẹ Jihova che ku ebruphiyọ kuẹ ẹgbaẹdavwọn ravwanre rẹ avwanre vwo ghwoghwo ovuẹ Ruvie rọyen na.—Une 126:6.
4. Diesorọ avwanre vwọ ‘rhẹro rẹ ẹcha rẹ ẹdẹ ri Jihova’?
4 Ihwo ri Juda evo rori nẹ Jihova che ru ayen emu vuọvo-o, ẹkẹvuọvo Jihova kẹ avwanre imwẹro nẹ ẹdẹ oghwọrọ rọyen na sikẹre re. (Zẹf. 1:12, 14) Ihwo re vwẹ Jihova vwo ru adjarhọ rayen ọvo yen cha rhọ. (Zẹf. 3:12, 17) Rẹ avwanre ‘vwọ rhẹro rẹ ẹcha rẹ ẹdẹ ri Jihova’ na, ejẹ avwanre kuomakugbe iniọvo ravwanre vwọ ga Ọghẹnẹ vẹ omavwerhovwẹn!—Zẹf. 3:8, 9.