Mavọ Wo Se Vwo Vwo Omamọ Akpọ?
Ọ DIA oborẹ Ọghẹnẹ guọnọ nẹ akpọ na dia yen ọ hepha na-a. Ofori nẹ akpọ na vọn vẹ ihwo re guọnọ nẹ Ọghẹnẹ sun ayen, ri nene odjekẹ rọyen je vwẹrokere iruemu iyoyovwin rọyen. Ọghẹnẹ je guọnọ nẹ ayen yerin kugbe kerẹ orua vẹ omavwerhovwẹn, ayen yono erọnvwọn sansan ji ru akpọ na phiyọ iparadaisi.
ỌGHẸNẸ VERI NẸ O CHE RU AKPỌ NA PHIYỌ OBO RỌ GUỌNỌRE NẸ Ọ DIA
“Ọ nẹrhẹ ofovwi fue re te oba rẹ akpọ na.”—Une Rẹ Ejiro 46:9.
“Ọke . . . te re . . . ra vwọ ghwọrọ ọghwọrọ rẹ akpọ na.”—Ẹvwọphia 11:18.
“O gbi vwo ohwo rẹ orere na ovuovo rọ sa tanẹ, Me mwọga-a.”—Aizaya 33:24.
“Ihwo mẹ re me jẹreyọ na ke cha ghọghọ krekri vwẹ iruo rẹ ayen vwẹ abọ rayen ru.”—Aizaya 65:22.
Mavọ yen aroẹmrẹ nana eje che vwo rugba? Ọghẹnẹ vwẹ Ọmọ rọyen, Jesu, vwo mu Ovie rẹ usuon ọgbagba ro che sun akpọ na vwo nẹ obo odjuvwu rhe. Baibol na sere nẹ Uvie rẹ Ọghẹnẹ. (Daniẹl 2:44) Baibol na da ta kpahen Jesu: “Ọghẹnẹ kọ vwẹ ekete . . . vwọ kẹ, . . . uvie rọye gbi se vwo oba-a.”—Luk 1:32, 33.
Ọke rẹ Jesu vwọ hẹ akpọ na, o ru emu igbevwunu buebun ro vwo djephia nẹ kerẹ Osun, o che ru akpeyeren rẹ ihworakpọ yovwin vwọ vrẹ obo rọ hepha nonẹna.
JESU DJE OBO RO CHE RU KẸ IHWORAKPỌ
O sivwin ega ejobi, ro dje obo ro che vwo si ega eje no vwọ kẹ ihworakpọ.—Matiu 9:35.
Ọ nẹrhẹ urhie fọ riẹin, ro dje obo rọ cha vwọ sẹro rẹ ihwo vwo nẹ ekuakua re so oghwọrọ ri kpregede nonẹna.—Mak 4:36-39.
Ọ ghẹrẹ ihwo uriorin buebun, ro dje obo ro che vwo ru ọdavwẹ rẹ ihwo ejobi.—Mak 6:41-44.
O hirhe ame phiyọ udi vwẹ ọke re vwo ruẹ orọnvwe, ro djerephia nẹ ọ cha vwẹ ukẹcha kẹ ihwo vwọ riakpọ.—Jọn 2:7-11.
Mavọ wo se vwo vwo oka rẹ akpọ rẹ Ọghẹnẹ guọnọ vwọ kẹ ihwo ri vwo ẹguọnọ rọyen na? O vwo “idjerhe” ro fori nẹ wo nene. Baibol na djere nẹ ọnana “idjerhe . . . rẹ arhọ na; ihwo tutuno re sa guọnọ mrẹ.”—Matiu 7:14.
GUỌNỌ IDJERHE RO SUN OHWO KPO OMAMỌ AKPỌ NA
Die yen idjerhe rẹ arhọ na? Ọghẹnẹ da ta: “Mẹvwẹ Ọrovwohwo Ọghẹnẹ wẹn, ro yono uwe vwọ mrẹ erere, ro sun we vwẹ idjerhe ru wo cha wan na.” (Aizaya 48:17) Ọnana yen idjerhe ro me yovwin kparobọ ro fori nẹ e nene.
Jesu da ta: “Mẹvwẹ hẹ idjerhe na, kugbe uyota na, kugbe arhọ na.” (Jọn 14:6) E de vwo imuẹro kpahen uyota rẹ Jesu yonori na je vwẹrokere udje rọyen, ke se sikẹre Ọghẹnẹ ji mrẹ erere.
Mavọ wọ sa vwọ mrẹ idjerhe rẹ arhọ na? Ẹga buebun herọ nonẹna, kọyensorọ Jesu vwọ vwẹ orhọ-esio nana phia: “Ọ dia ihwo ejobi ri se vwe Ọrovwohwo, Ọrovwohwo eye se te uvie rẹ odjuvwu-u; jokpa rẹ ihwo ri ru ẹguọnọ rẹ Ọsẹ mẹ rọ hẹ obo odjuvwu.” (Matiu 7:21) Ọ da je ta: “Emamọ rayen e vwo vughe ayen.” (Matiu 7:16) Baibol na sa chọn wẹ uko vwo vughe ẹga rẹ uyota.—Jọn 17:17.
Mavọ wo se vwo nene idjerhe rẹ arhọ na? O churobọ si ra vwọ riẹn Esiri rẹ arhọ na: Ọyen ono? Die yen odẹ rọyen? Oka rẹ ohwo vọ yen ọ hepha? Die yen o ruẹ kẹ avwanre? Die yen ọ guọnọre nẹ avwanre ru?a
Oborẹ Ọghẹnẹ guọnọ mie ihworakpọ vrẹ a de vwọ wiowian, riemu, heha, ji vwo orua. Avwanre sa riẹn Ohwo rọ ma avwanre, a me je dia ugbeyan rọyen. Avwanre dje ẹguọnọ kẹ womarẹ e vwo ru ọhọre rọyen. Jesu da ta: “Ọnana hẹ arhọ ro vwo oba-a na, rere ayen vwọ riẹn owẹ ọvo rẹ Ọghẹnẹ rẹ uyota na.”—Jọn 17:3.
WOMARẸ BAIBOL NA, ỌGHẸNẸ YONO UWE WỌ “VWỌ MRẸ ERERE.”—AIZAYA 48:17
JOWỌ RẸSOSUỌ VWEVUNRẸ OYAN WẸN NA
Re vwo yono kpahen obo re vwerhen Ọghẹnẹ oma churobọ si re vwo ru ewene evo. Ọ sa dia bẹnbẹn. Jẹ, vwọrẹ uyota, ọ cha ghwa omavwerhovwẹn rhe, a guọnọre nẹ a jowọ rẹsosuọ. Wọ sa vwọ mrẹ ẹkpahọnphiyọ rẹ enọ ri shekpahen Ọghẹnẹ, Iseri rẹ Jihova cha vwẹ uyono rẹ Baibol vwo mu kẹ wẹ ọphẹ, vwẹ asan vẹ ọke wọ guọnọre. Wọ sa vwẹ ovuẹ te avwanre obọ vwẹ www.jw.org/urh.