Die Yen O Mudiaphiyọ Vwọ kẹ Jesu?

Kerẹ obo ra mrẹre vwẹ uyovwinrota rọ wanre na, Jesu mu akpeyeren rọyen kpahen iruo ro vwo “ghwoghwo jo gbe iyẹnrẹ esiri rẹ uvie rẹ Ọghẹnẹ.” (Luk 8:1) O muomaphiyọ iruo rẹ aghwoghwo na rọ vwọ yan imaili ujorin buebun vwẹ otọ rẹ Izrẹl rere o se vwo yono ihwo kpahen Uvie rẹ Ọghẹnẹ. E si ikuegbe rẹ aghwoghwo ri Jesu phiyọ Ẹbe ẹne rẹ ikuegbe ri Jesu na, ọ vrẹ abọ ujorin a rionbọ kpo Uvie rẹ Ọghẹnẹ vwevunrẹ rọyen. Eta rẹ Jesu komobọ tare yehẹ Ẹbe rẹ ikuegbe ri Jesu na, ẹkẹvuọvo ọ dia eta eje rẹ Jesu ta kpahen Uvie rẹ Ọghẹnẹ yen a niyẹnrẹn rọyen phiyọ Ẹbe rẹ ikuegbe ri Jesu na-a!—Jọn 21:25.

Diesorọ Uvie na vwọ ghanre mamọ kẹ Jesu ọke rọ vwọ hẹ otọrakpọ na? Kidie Jesu riẹnre nẹ Ọghẹnẹ sanẹ ọyen vwọ dia Ovie rẹ Uvie na. (Aizaya 9:6; Luk 22:28-30) Ẹkẹvuọvo, Jesu tẹnrovi otitivwe yẹrẹ ẹgba rẹ usuon ro che te obọ rọye-en. (Matiu 11:29; Mak 10:17, 18) Ọ dia fikirẹ erere romobọ rọyen yen o vwo titi Uvie na-a. Uvie rẹ Ọghẹnẹa yen ma ghanre kẹ Jesu, kidie Uvie na che ru emu esiri kẹ ihwo ro vwo ẹguọnọ kpahen kerẹ Ọsẹ rọyen rọhẹ obo odjuvwu kugbe idibo rọyen re fuevun.

OBORẸ UVIE NA CHE RU KẸ ỌSẸ RI JESU

Jesu vwo ẹguọnọ rẹ Ọsẹ rọyen rọhẹ obo odjuvwu. (Isẹ 8:30; Jọn 14:31) Iruemu iyoyovwin rẹ Ọsẹ rọyen na jere mamọ kerẹ ẹguọnọ, arodọnvwẹ kugbe orhiẹn-ebro abavo Rọyen. (Urhi Rivẹ 32:4; Aizaya 49:15; 1 Jọn 4:8) O muẹro nẹ ivun miovwo Jesu ọke ro vwo nyo efian rẹ ihwo gun nyẹ Ọsẹ rọyen; efian kerẹ Ọghẹnẹ davwerhọn rẹ ojaẹriọ rẹ avwanre-e, ọ je guọnọ nẹ avwanre rioja. Emu ọvo rọ nẹrhẹ o vwo owenvwe ro vwo ghwoghwo “iyẹnrẹ esiri rẹ uvie na” yen kidie ọ riẹnre nẹ ọke cha rẹ Uvie na che vwo ru odẹ rẹ Ọsẹ rọyen fon. (Matiu 4:23; 6:9, 10) Mavọ yen o che ruo wan?

Womarẹ Uvie na, Jihova che ru ewene rode rọ cha ghwa ebruphiyọ rhe ihworakpọ eje. “Ko ririe ameoviẹ nẹ ẹro” rẹ ihworakpọ re fuevun. Jihova che si obo re so ameoviẹ tiọyena vwo no, vwẹ imuẹro nẹ “ughwu gbe cha dia ọfa-a, eyẹ omaemuohọ eyẹ oviẹ eyẹ odjadja ọfa-a.” (Ẹvwọphia 21:3, 4) Uvie na yen Ọghẹnẹ che vwo si ojaẹriọ rẹ ihworakpọ eje vwo no.b

A gbe ta rẹ Jesu vwo vwo owenvwe rọ wọ vuẹ ihwo kpahen Uvie na! Ọ riẹnre nẹ o che ghini dje ẹgba vẹ arodọnvwẹ rẹ Ọsẹ rọyen phia. (Jems 5:11) Jesu je riẹn nẹ Uvie na che fierere kẹ ihworakpọ ri fuevun rẹ ọyen vwo ẹguọnọ kpahen.

OBORẸ UVIE NA CHE RU KẸ IHWORAKPỌ RI FUEVUN

Jesu vẹ Ọsẹ rọyen ka dia odjuvwu ọke grongron ọ ke rhe otọrakpọ na. Ọsẹ na reyọ Ọmọ na vwọ ma erọnvwọn eje. Ọ ma emu igbevwunu buebun rehẹ obo odjuvwu, irharheghe na, isio re che se keri-i, otọrakpọ na kugbe eranvwe buebun rehẹ evun rọyen. (Kọlose 1:15, 16) Vwẹ usun rẹ enana eje, ‘emọ rẹ ihwo rẹ akpọ yen me je Jesu.’—Isẹ 8:31.

Ẹguọnọ rẹ ihworakpọ yen mu Jesu vwo ghwoghwota na. Ọ ghwa vwọ tuẹn iruo na phiyọ, ọ da ta phephẹn nẹ ọyen rhe otọrakpọ na re “gbe ikun esiri na” kẹ ihwo re guọnọ ukẹcha (Luk 4:18) Ẹkẹvuọvo, ọ dia ukẹcha rọ vwọ kẹ ihwo ọvo yen Jesu ta ota kpahe-en. Nọke ra ruọke yen o vwo djephia nẹ o vwo ẹguọnọ rẹ ihworakpọ. Kerẹ udje, otu buebun vwo koko ayen sa vwọ kerhọ ri Jesu, “aro da dọn, o de sivwi ayen.” (Matiu 14:14) Ọke rẹ ọshare ọvo ro vwo okpọga ọvo vwo vwo esegbuyota nẹ Jesu se sivwon ọ da guọnọ, ẹguọnọ de mu Jesu vwo ruo. O de sivwin ọshare na, arodọnvwẹ de muo vwọ vuẹ: “Me rhọvwere; gba fon.” (Luk 5:12, 13) Jesu vwọ mrẹ Meri rọ dia ugbeyan rọyen ro vweri uvweri fikirẹ oniọvo rọyen, Lazarọs ro ghwuru, Jesu de si “iherihe rẹ oviẹ ọ da da gangan,” ọ da “viẹ.” (Jọn 11:32-36) Jesu de ru obo re rhẹro rọye-en, ọ da rhọnvwọn Lazarọs dede nẹ o ghwuru ẹdẹ ẹne re!—Jọn 11:38-44.

Jesu riẹnre nẹ urovwoma na ọ rẹ ọmọke krẹn. Ọ riẹnre nẹ kẹrẹkpẹ, ihwo ro sivwinri na cha rhoma muọga, otu rọ rhọnvwọn nushi je cha rhoma ghwu. Dedena, Jesu je riẹn nẹ Uvie rẹ Ọghẹnẹ ọvo yen che phioba phiyọ ebẹnbẹn rẹ ihworakpọ eje. Ọnana yen sorọ Jesu vwo ru emu igbevwunu ji ghwoghwo “iyẹnrẹ esiri rẹ uvie rẹ odjuvwu” na vẹ oruru. (Matiu 9:35) Igbevwunu ro ruru ghwa odjephia rẹ emerha vwẹ usun rẹ oborẹ Uvie rẹ Ọghẹnẹ che ru vwẹ akpọneje. Vwo oniso rẹ oborẹ Baibol na tare.

• Jẹ omakpokpọ evwo rha cha dia-a.

  “Etiyin ẹro rẹ orhuẹro ko rhie, erhọn rẹ odierhọn ko phe ghwroro; etiyin ukpono ko pho kerẹ uzo, ẹrẹnvwe ro diunu kọ so ine rẹ aghọghọ.” Vwọba, “o gbi vwo ohwo rẹ orere na ọvuọvo rọ sa tanẹ, Me mwọga-a.”—Aizaya 33:24; 35:5, 6.

• Ughwu rha cha dia-a.

  “Ọvwata cha re ughwẹ rẹ otọ na, kọ dia enu rọye bẹdẹ.”—Une Rẹ Ejiro 37:29.

  “Ko mu ughwu rọ bẹdẹ, Ọrovwohwo rẹ Ọghẹnẹ ko ririe oviẹ nẹ opharo rayen.”—Aizaya 25:8.

• Ihwo ri ghwuru cha rhoma dia.

  “Irivwi rẹ hẹ evun rẹ ishi ejobi che . . . nyo urhuru rọye, ke cha yan phia.”—Jọn 5:28, 29.

  “Evrẹnushi herọ.”—Iruo Rẹ Iyinkọn Na 24:15.

• Ihwo eje che vwo iwevwin romobọ rayen vẹ iruo ayen ruẹ.

  “Ayen ke bọn iwevwi kẹ ayen dia evun rayen, ayen ke kọn ogba ri vain kẹ ayen re emamọ rọye. Ayen gbe bọn rẹ ohwo ọfa da dia-a; ayen gbe kọn re ohwo da riọ-ọ . . . ihwo mẹ re me jẹreyọ na ke cha ghọghọ krekri vwẹ iruo rẹ ayen vwẹ abọ rayen ru.”—Aizaya 65:21, 22.

• Ofovwin rha cha dia-a.

  “Ọ nẹrhẹ ofovwi fue re te oba rẹ akpọ na.”—Une Rẹ Ejiro 46:9.

  “Orere gbe cha kparọ oda vwọ so orere, eyẹ ayen gbe cha kpare ofovwi ofa-a.”—Aizaya 2:4.

• 

  Ọkanrovwẹ rẹ emuọre rha cha dia-a.

  “Akpọ na yovwi emu buebu; Ọghẹnẹ, Ọghẹnẹ rẹ avwanre, o bruphihọ kẹ avwanre nure.”—Une Rẹ Ejiro 67:6.

  “E jẹn ọka buebu dia otọ na; vwẹ enu rẹ igbenu na etiyin i de kpogho.”—Une Rẹ Ejiro 72:16.

• Ọbẹnvwẹ rha cha dia-a.

  “Ọ ra akpọ bẹn cha sa chọrọ ẹro-o.”—Une Rẹ Ejiro 9:18.

  “Kidie o sivwi ọ rẹ akpọ bẹn vwẹ ọke ro de kperi se, ovwiogbere kugbe ohwo ro vwo ọchuko-o. Ọ re ehrọrẹ rẹ ọvwiẹrẹ vẹ ọ rẹ akpọ bẹn, o mi sivwi arhọ rẹ ọ rẹ akpọ bẹn.”—Une Rẹ Ejiro 72:12, 13.

Wo vwo roro kpahen ive nana ri shekpahen Uvie rẹ Ọghẹnẹ, wọ sa mrẹ oboresorọ Uvie na vwọ ghanre mamọ vwọ kẹ Jesu? Ọke rẹ Jesu vwọ hẹ otọrakpọ na, o vwo owenvwe rọ vwọ ta ota kpahen Uvie rẹ Ọghẹnẹ kidie ọ riẹnre nẹ Uvie na che si ebẹnbẹn eje re rhiẹromrẹ nonẹna vwo no.

Ive rẹ Baibol na vwọphia kpahen Uvie na je we? Ọ da dia ọtiọyen, mavọ yen wo se vwo yono kpahen Uvie na kpobarophiyọ? Kẹ, die wo se ru vwọ mrẹ erere nẹ ebruphiyọ rẹ Uvie na cha ghwa rhe? Uyovwinrota rọ koba na cha kpahenphiyọ enọ nana.