“Dohwo Doghwa Rọye Gba Cha Ghwa”
“Ohwo ọvuọvo kọ cha vwẹ unu gbe ikun rẹ oma rọye kẹ Ọghẹnẹ.”—ROM 14:12.
1. Oghwa vọ yen ighene rẹ Hibru erha na hirharoku rẹ ayen cha ghwa?
IMIGHENE erha rẹ ihwo rẹ Hibru re dia Babilọn hirharoku orhiẹn rẹ ughwu vẹ arhọ rẹ ayen che bru. Ayen cha vwẹ uyovwin kpotọ kẹ oma rode na, vwo nene urhi rẹ ihwo rẹ ẹkuọtọ na jiri? Gbanẹ ayen cha rhọnvwe ga-a rere e do ayen phiyọ ogidi erhanre na? Shadrak, Mashak, vẹ Abẹdnigo vwo ọke rẹ ayen cha vwọ nọ ohwo vuọvo-o; jẹ o ji fo nẹ ayen ru otiọye-en. Ugege yena ayen da ta: “Gba riẹn, E Ovie nẹ avwanre cha sa ga ẹdjọ wẹ-ẹn eyẹ oma rẹ oro ru wo vwo vi na-a.” (Daniẹl 3:1-18) Ighene erha rẹ ihwo rẹ Hibru na ọvo yen ghwa oghwa rayen.
2. Amono yen nẹrhẹ Pailet bru orhiẹn ro shekpahen Jesu kristi na, kẹ ọyen na nẹrhẹ ọ re ase?
2 Ọyena vwọ wan nu omarẹ ẹgbukpe ujori esa re kpaherọ, osun na de nyo efian re gun nyẹ ọshare ọvo. Ọ vwọ fuẹrẹn ẹdjọ na nu, ọ da rhe mrẹvughe nẹ, emu efian na eje bare ọshare na. Ẹkẹvuọvo, otu na eje da ta nẹ, a teyọn hwe. Osun na davwẹngba vwọ dobọ rẹ ihwo na ji ẹkẹvuọvo o se mu oghwa rẹ orhiẹn ro hirharoku na-a ọ da vwẹ uvwẹ kẹ ọnyẹ rẹ otu. Ọ vwọ hworhẹ obọ rọyen nu, ọ da ta: “Obọ mẹ hẹ ughwu rẹ ọvwata na-a.” O de siobọ nẹ ọshare na kẹ ayen nẹ ayen hwe mu urhe. E, ukpe ro vwo mu oghwa rọyen ro vwo bru orhiẹn kpahen Jesu kristi, Pọntius Pailet da vwẹ uphẹn kẹ ihwo efa nẹ i brorhiẹn kẹ. O toro oborẹ ame rọ vwọ hworhẹ obọ na bunte-e o che se ru oma rọyen fon vwo nẹ orhiẹn rẹ ehuhu ro bru kpahen Jesu na-a.—Matiu 27:11-26; Luk 23:13-25.
3. Diesoro e vwo jẹ uphẹn ẹ vwọ kẹ ihwo efa nẹ ayen bru erhiẹn ke avwanre?
3 Kẹ owẹ vwo? Wo de che bru erhiẹn, wọ hepha kerẹ ighene erha rẹ ihwo rẹ Hibru na, gbanẹ wọ vwẹ uphẹn kẹ ihwo efa nẹ ayen bru orhiẹn kẹ wẹ? Orhiẹn e bro lọhọre-e. Ohwo che tedje tavwen o ki se bru erhiẹn ri shephiyọ. Kerẹ udje, ofori nẹ ini vẹ esẹ yen brorhiẹn kẹ emọ rayen re dia imitete. Vwọrẹ uyota, orhiẹn da họhọ ọ bẹn ebro marho ọ da dianẹ a cha fuẹrẹn erọnvwọn evo kiriguo ni. Ẹkẹvuọvo, orhiẹn rẹ avwanre ohwo ọvuọvo che bru họhọ te asan re de se “oghwa,” yẹrẹ “emu rẹ okpetu,” rẹ ihwo re herọ vwẹ evun rẹ Erhi [“ẹwẹn,” NW ] na cha ghwa kẹ avwanre-e. (Galesha 6:1, 2;) Ukperẹ ọtiọyen, ọyen oghwa rẹ avwanre ohwo ọvuọvo cha vwọ “vwẹ unu gbe ikun rẹ oma” rẹ avwanre kẹ Ọghẹnẹ. (Rom 14:12) Baibol na da ta: “Dohwo doghwa rọye gba cha ghwa.” (Galesha 6:5) Kẹ, mavọ yen avwanre se vwo bru orhiẹn aghwanre vwẹ akpeyenre? Ẹsosuọ, ofori nẹ a riẹn asa ra da vwiẹre rere o vwo jẹ avwanre e phiokparobọ.
Orọnvwọn ọghanghanre ọvo ra guọnọ re
4. Die yen uyono ọghanghanre ọvo rẹ jẹmienyo rẹ ayen gbe ọshare rẹsosuọ na yono avwanre kpahen orhiẹnbro?
4 Vwẹ ọtonphiyọ rẹ ikuegbe rẹ ihworakpọ, aye gbẹ ọshare rẹsosuọ na brorhiẹn rẹ okpetu nẹ obuko rọyen rhe. Ayen brorhiẹn rẹ ayen vwọ re urhe rẹ erianriẹn rẹ erhuvwu vẹ umiovwo na. (Jẹnẹsis 2:16, 17) Die yen ayen mu orhiẹn rayen na kpahen? Baibol na da ta: “Aye na vwọ mrẹ nẹ urhe na fẹriọ, o ki rhe fẹro, nẹ urhe na ki rhe ru ohwo ghwanre, ọ da reyọ omamọ rọye ọ da riọ; ọ da je vwẹ evo kẹ ọshare rọye ọ da je re.” (Jẹnẹsis 3:6) Ojevwe romobọ yen Ivi mu orhiẹn ebro rọyen na kpahen. Obo ro ruru na nẹrhẹ Adam je vwomaba. Ukuotọ rọyen, umwemwu vẹ ughwu “da hrabọ ro ihwo ejobi.” (Rom 5:12) Ofori nẹ jẹmienyo rẹ Adam and Ivi yono avwanre uyono ọghanghanre ọvo kpahen asan rẹ ẹgba rẹ ohworakpọ bare ne, Ohworakpọ rhe tinka mu odjekẹ rẹ Ọghẹne-e o che se bru erhiẹn ri shephiyọ-ọ.
5. Odjekẹ vọ yen Jihova kẹ avwanre, kẹ, mavọ yen a sa vwọ mrẹ erere no rhe?
5 Mavọ ọ vwerhoma te nẹ Jihova kẹ avwanre odjeke! Baibol na vuẹ avwanre: “Erhọn wẹn ki che nyo ota vwẹ obuko wẹn, tanẹ. ‘Ọnana hẹ idjerhe na, yan nene,’ vwẹ ọke wọ da rhẹriẹ oma kpo obọrhe kugbe ọke wọ da rhẹriẹ oma kpo obohwẹre.” (Aizaya 30:21) Jihova tota kẹ avwanre womarẹ ota rọye, Baibol na. E je yono Baibol na ji vwo erianriẹn ọgbagba rehẹ evun rọyen. E se vwo bru erhiẹn ri shephiyọ ofori nẹ a re “emuọre ọgangan [rẹ] a vwọ kẹ omiro gua.” “Ri vwo ọhọ,” rẹ avwanre “se vwo vughe emu esiri vẹ ọbrabra.” (Hibru 5:14) Avwanre se yono ẹgba iroro avwanre womarẹ a vwọ reyọ obo re yonori vwẹ ota rẹ Ọghẹnẹ vwo ruiruo.
6. Die yen e che ru ẹwẹn obrorhiẹn avwanre sa vwọ nabọ ruiruo?
6 Emuọvo rọ vwa ghanghanre rọ cha chọn avwanre uko vwo brorhiẹn yen ẹwẹn obrorhiẹn ra riuku rọyen na. Ẹgban iroro nana se guẹdjọ rọ sa “ghwa ghwọ ku eyẹ ọ ghwa rhiẹn” avwanre. (Rom 2:14, 15) Ẹkẹvuọvo, ẹwẹn obrorhiẹn rẹ avwanre sa vwọ nabọ wian, ofori nẹ a reyọn erianriẹn ọgbagba rẹ ota rẹ Ọghẹnẹ vwo yono a me je reyọ obo re yonori na vwo ruiruo. Ẹwẹn obrorhiẹn re yonori-i fobọ gbe nene ẹkuruemu kugbe uruemu rẹ ihwo efa. Oborẹ erọnvwọn hepha vwẹ asan ra dia vẹ oborẹ ihwo efa rori ji se sun avwanre ghwru. Die yen sa phia kẹ ẹwẹn obrorhiẹn rẹ avwanre siẹrẹ e de gbobọnyẹ orhọesio rọye kugbe iwan rẹ Ọghẹnẹ ọkieje? Ememerha na, obrorhiẹn na ko che rhi vwo upe, “kerẹ umomo rẹ ogun,” ọ me rhe dia kerẹ upe rọhẹ ehọroma na—ro rhe nyo emuọvo vwẹ oma-a. (1 Timoti 4:2) Vwọ fẹnẹ ọyena a sa vwẹroso ẹwẹn obrorhiẹn ra vwẹ ota rẹ Oghẹnẹ vwo yono.
7. Die yen emuọvo kiriguo rọ cha chọn avwanre uko vwo brorhiẹn aghwanre?
7 Emuọvo kiriguo ra guọnọre rọ cha chọn avwanre uko vwo brorhiẹn aghwanre yen erianriẹn ọgbagba ri Baibol na vẹ owenvwe ra vwọ vwẹ ayen ruiruo. E de hirharoku erhiẹn re che bru ukpe re vwo brokpakpa bru ayen, ofori nẹ aghwọrọ ọke hiẹ guọnọ odjekẹ ri Baibol je reyọ ẹgba iroro avwanre vwo ruiruo womarẹ a vwọ reyọ obo re yonori na vwo ruiruo. Ọ da dianẹ e hirharoku orhiẹn re che bru kpregede dede—kerẹ Shadrak, Mashak, vẹ Abẹdnigo—avwanre se ru ọtiọyen siẹrẹ e de vwo erianriẹn ọgbagba rẹ ota rẹ Ọghẹnẹ a da je reyọ vwo yono ẹwẹn obrorhiẹn avwanre. E se vwo vwo ẹruọ rẹ obo re vwo yerẹn tedje sa vwọ chọn avwanre uko vwo brorhiẹn rọ ghwotọ, jẹ a fuẹrẹn ẹdia ivẹ vwẹ akpeyeren.
Amono Yen Avwanre Che Vwo mu Igbeyan?
8, 9. (a) Odjekẹ ri Baibol vọ yen dje obo rọ ghanre te a vwọ kẹnoma kẹ orharhe rẹ ọyankugbe? (b) Ihwo ri jẹfuọn ọvo yen che jẹ ugbeyan rẹ avwanre ẹdia? Djekpahọn.
8 Ọyinkọn Pọl de si: “Wo jẹ a phiẹn wẹ-ẹn: Otu umwemwu gbe uruemu esiri kuẹ.” (1 Kọrẹnt 15:33) Jesu Kristi je vuẹ idibo rọye nẹ, “ovwan rha dia e rẹ akpọ na-a.” (Jọn 15:19) E de yono odjekẹ ri Baibol nana, avwanre fobọ vwo ẹruọ rẹ oboresorọ o vwo fo nẹ a kẹnoma kẹ a vwọ reyọ evwọfanrhiẹn, igberadja, iji, egbaudi, kugbe eka rẹ ihwo tiọyena vwo muẹ igbeyan. (1 Kọrẹnt 6:9, 10) Ẹkẹvuọvo avwanre vwo yono uyota ri Baibol na kodophiyọ na, ka je cha mrẹvughe nẹ imuoshọ je herọ siẹrẹ a vẹ ihwo tiọyena da ghwọrọ ọke kuẹgbe vwẹ ifimu, itẹlivishọni, ikọmputa yẹrẹ e de se kpahan ayen vwẹ ẹbe. Ọtiọyen ọ je hepha siẹrẹ a vẹ ihwo tiọyen re dia “ihwo rẹ okpetu” de siẹ ovuẹ rhe ohwohwo vwẹ Intanẹti—Une rẹ Ejiro 26:4.
9 Kẹ a sa vwẹ ihwo re kẹnoma kẹ uruemu ri jẹfuọn jẹ ayen vwo esegbuyota kpahen Ọghẹnẹ-ẹ vwo mu igbeyan? Baibol na vuẹ avwanre nẹ, “akpọ na ejobi hẹ obo rẹ ogangan rẹ ohwo umwemwu na.” (1 Jọn 5:19) Ọ nana chọn avwanre uko vwọ mrẹvughe nẹ orharhe rẹ ọyankugbe ghwa dia ihwo ri vwo uruemu ri jẹfuọn ọvo-o. Ọtiọyena, ọyen emu rẹ aghwanre siẹrẹ a da vwẹ ihwo ri vwo ẹguọnọ ri Jihova ọvo vwo mu igbeyan.
10. Die yen chọn avwanre uko vwo brorhiẹn rẹ aghwanre ro shekpahen oyerinkugbe avwanre vẹ ihworakpọ na?
10 A cha sa kẹnoma kẹ ihwo rehẹ akpọ na riẹriẹriẹ-ẹ, Baibol na je ta ọtiọye-en. (Jọn 17:15) Ihwo re ga Jihova-a yen a ta ota kẹ siẹrẹ a dahẹ iruo rẹ aghwoghwo na, isikuru yẹrẹ asan re de ruiruo. Onenikristi rọ rọvwọn ohwo rọ dia Oseri-i, ọ vẹ ihwo rẹ akpọ na che ru kugbe vrẹ iniọvo efa. A da reyọ ẹgba iroro avwanre vwo ruiruo, ọ cha nẹrhẹ a riẹn nẹ e vwo siobọ rẹ ugbeyan a vẹ ihworakpọ na vwori kpotọ fẹnẹ ọ rẹ a vẹ ayen vwo dia igbeyan re kpẹkpẹre. (Jems 4:4) Ọtiọyena, kẹ avwanre se brorhiẹn sẹ a vẹ ayen ji se ru erọnvwọn evo kugbe siẹrẹ isukuru vẹ iruo de kuphiyọ nu, kerẹ a vwọ heha, gbeha, ji kpo ipati vẹ akpọẹriọ kuẹgbe.
E de Brorhiẹn rẹ Oka rẹ Iruo re Che Ru
11. Die yen orọnvwọn rẹsosuọ e che roro kpahen siẹrẹ e de brorhiẹn rẹ oka rẹ iruo re che ru?
11 A da nabọ reyọ odjekẹ ri Baibol vwo ruiruo, ọ cha chọn avwanre uko vwo bru erhiẹn ri shekpahen oborẹ avwanre se vwo ru ute ro te avwanre ra vwọ “kọn okọn phihọ otọ kẹ” ihwo rẹ orua rẹ avwanre. (1 Timoti 5:8) Orọnvwọn rẹsosuọ re che roro kpahen yen oborẹ a cha vuẹ avwanre nẹ e ru vwẹ iruo na. E vwo brorhiẹn re vwo ruiruo ri Baibol na brorhiẹn hwe chọre. Ọtiọyena, Inenikristi uyota che se rhiabọreyọ iruo ri churobọ si ẹdjọẹgọ, uji echo, a vwọ reyọ ọbara vwo ruiruo vwẹ idjerhe ro je fo vẹ iruemu efa tiọyena-a ri Baibol na brorhiẹn hwe. Ọ da tobọ dianẹ ohwo rọ kẹ avwanre iruo na guọnọre nẹ avwanre gu efian yẹrẹ ghwa ihwo re, e che ru ọtiọye-en.—Iruo rẹ Iyinkọn Na 15:29; Ẹvwọphia 21:8.
12, 13. Ọ da vrẹ iruo na komobọ nu, die yen erọnvwọn evo ro ji fo nẹ e roro kpahen siẹrẹ e de brorhiẹn rẹ oka rẹ iruo re che ru?
12 Kẹ ọ da rha dianẹ o vwo emu vuọvo vwẹ iruo na rọ vwọso odjekẹ ri Baibol na-a vwo? E vwo vwo ẹruọ ri Baibol na phiyọ na, o vwo erọnvwọn evo ro fori nẹ e roro kpahen tavwen e ki brorhiẹn. Kerẹ udje, ofori nẹ e ruiruo ra vwọ kpahenphiyọ use rẹ ifonu vwẹ asan re de phi idjogba? Emu ọfa re ji che roro kpahan yen asan rẹ osa ẹhwa na nẹ cha kugbe asan re de che ruiruo na. Kerẹ udje, Onenikristi che rhiabọreyọ iruo rọ vwọ vwẹ ọda gbe uwevwin ishọshi rẹ ẹga ugbunu rọ cha nẹrhẹ o titi ẹga efian?—2 Kọrẹnt 6:14-16.
13 Vwẹ ẹdia evo, ọga wẹn vwẹ iruo da rha vuẹ wẹ nẹ wọ ra rhuẹrẹ uwevwin rẹ ẹga refian phiyọ vwo? Vwẹ ẹdia nana, wo che roro kpahọn sẹ wọ cha sen, ọtiọyen ji te oborẹ wo che ru. Kẹ ọ da rha dianẹ o vwo iruo ọvo re che ru rọ vwọso odjekẹ ri Baibo-ol vwo, kerẹ udje, a vwo reyọ ileta vwo rhe ihwo vwẹ asan sansan kugbe ekogho rẹ ihwo de titi uruemu ri jẹfuọn. Odjekẹ rọhẹ Matiu 5:45 sa chọn avwanre uko vwo bru omamọ orhiẹn vwẹ ẹdia nana. O ji fo nẹ a nọ oma avwanre sẹ e che vwo ẹwẹn obrorhiẹn rọ fonro siẹrẹ e de rhiabọreyọ oka iruo tiọyena. (Hibru 13:18) Vwọrẹ uyota, e se vwo bru omamọ rẹ orhiẹn kpahen iruo, ofori nẹ e yono ẹwẹn obrorhiẹn rẹ avwanre.
“Vwẹ Idjerhe Wẹn Ejobi Rhọvwọ”
14. E de che brorhiẹn, die yen erọnwọn evo ro fori nẹ e roro kpahen ọkieje?
14 Kẹ erhiẹn rẹ avwanre brẹ ri shekpahen erọnvwọn efa kerẹ e vwo kpo isukuru ride, sen yẹrẹ rhiabọreyọ oka rẹ omaesivwo evo vwo-o? Ofori nẹ e muo korhiẹn korhiẹn rẹ avwanre che bru kpahen uchebro ri Baibol ji roro kpahen oborẹ a sa vwọ reyọ ayen vwo ruiruo wan. Ọgbaghwanre Solomọn rọ dia ovie rẹ Izrẹl awanre da ta: “Vwẹ udu wẹn ejobi vwọ kpahe Ọrovwohwo, wọ vwẹ ẹro suọ oma obọ wẹ-ẹn. Vwẹ idjerhe wẹn ejobi rhọvwọ; kọ cha kpọ idjerhe wẹn ejobi vi.”—Isẹ 3:5, 6.
15. Die yen avwanre yono vwo mie Inenikristi rẹ egbukpe ujori rẹsosuọ kpahen orhiẹn ebro?
15 O ji fo nẹ e roro kpahen oborẹ erhiẹn rẹ avwanre brẹ djobọte ihwo efa wan. Kerẹ udje, Inenikristi ẹgbukpe ujori rẹsosuọ, rha hẹ otọ rẹ urhi ra vwọ kẹ ihwo rẹ Izrẹl ri shekpahen emu evo ro fori nẹ ayen gha-a. Ayen se brorhiẹn rẹ ayen vwọ re emu evo rẹ urhi na rhọnvwephiyọ-ọ. Ẹkẹvuọvo, ọyinkọn Pọl si kpahen uvwo rẹ eranvwe re vwo ze izobo kẹ ẹdjọ: “Ọ da dia emuọre kọye cha so eshe kẹ oniọvo mẹ, me gbe re uvwo rẹ eranvwe-e, ọ da rha so eshe kẹ oniọvo mẹ.” (1 Kọrẹnt 8:11-13) Pọl vwẹ uchebro kẹ Inenikristi rẹ ẹgbukpe ujori rẹsosuọ nẹ ayen dje erorokẹ vwọ kẹ ẹwẹn rẹ obrorhiẹn rẹ ihwo efa rere ayen vwo jẹ ekprowọ ẹsuọ kẹ ayen. E je erhiẹn rẹ avwanre brẹ “sua eshe” kẹ ihwo-o.—1 Kọrẹnt 10:29, 32.
Nokpẹn rẹ Aghwanre Mie Ọghẹnẹ
16. Idjerhe vọ yen ẹrhovwo sa vwọ chọn avwanre uko vwo bru erhiẹn?
16 Ọyen obo re ghanre a vwọ nẹrhovwo tavwen e ki bru erhiẹn. Odibo Jems da ta: “Ohwo ro rhe vwo aghwanre vwẹ usun rẹ ovwa-an, e jọ nọ vwẹ obọ rẹ Ọghẹnẹ, ọye ri se siobọ nẹ kemu kemu kẹ ohwo, ọ ghwọ kuẹ ohwo-o; kọ vwọ ke.” (Jems 1:5) Avwanre se fiudugberi vuẹ Jihova vwẹ ẹrhovwo nẹ ọ kẹ avwanre aghwanre ra guọnọre e se vwo bru omamọ rẹ erhiẹn. A da vuẹ Ọghẹnẹ ọdavwẹ avwanre vwẹ ẹrhovwo je guọnọ odjekẹ rọye, ẹwẹn ọfuafon na sa chọn avwanre uko vwo vwo ẹruọ rẹ ẹkpo ri Baibol re se na, je nẹrhẹ a karophiyọ evo re chọrọ avwanre ẹro jovwo re.
17. Idjerhe vọ yen ihwo efa sa vwọ chọn avwanre uko vwo brorhiẹn?
17 Ihwo efa sa chọn avwanre uko vwo bru erhiẹn? E, Jihova kẹ avwanre iniọvo ri tedje vwẹ ukoko na. (Ẹfesọs 4:11, 12) A sa nokpẹn rẹ ukẹcha mie ayen, marho ọ da dia orhiẹn rẹ ọhọhọ. Iniọvo nana ri tedje re je nabọ vwo ẹruọ ri Baibol na sa chọn wẹ uko vwo bru orhiẹn ro shephiyọ ji “vughe obo ri yovwiri.” (Filipae 1:9, 10) Ẹkẹvuọvo, e ja vwẹ uphẹn kẹ ihwo efa nẹ i brorhiẹn kẹ avwanre-e. Avwanre ohwo ọvuọvo yen che muẹ oghwa re vwo brorhiẹn komobọ.
Orhiẹn rẹ mu Kpahen Baibol na Cha Ghwa Erhuvwu Rhe Ọkieje?
18. Die yen a sa ta kpahen obo ri nẹ obuko rẹ omamọ rẹ orhiẹn cha?
18 Ọkieje yen erhiẹn re mu kpahen uchebro ri Baibol na vwọ ghwa erhuvwu cha? E, ọ cha ghwa erhuvwu rhe, tobọ vwẹ ọke ọ da dianẹ ọ ghwa vwerhoma ẹsosuọ-ọ. Shadrak, Mashak, vẹ Abẹdnigo riẹnre nẹ ayen se ghwu fikirẹ orhiẹn rẹ ayen bruru nẹ ayen cha ga oma na-a. (Daniẹl 3:16-19) Vwẹ idjerhe vuọvo na, ọke rẹ iyinkọn na vwọ vuẹ aguare rẹ ihwo ri Ju nẹ ayen che muọghọ kẹ Ọghẹnẹ nọ ihworakpọ, a da fa ayen gangan tavwen e ki siobọnu ayen. (Iruo rẹ Iyinkọn Na 5:27-29, 40) Karophiyọ nẹ avwanre de tobọ bru omamọ rẹ orhiẹn, erọnvwọn evo sa phia fikirẹ “ọke vẹ uphe” re rhẹro rọye-en. (Aghwoghwo 9:11) Avwanre da re oja vwẹ idjerhe evo kidie nẹ e brorhiẹn rọ gbare, o se mu avwanre ẹro dẹn nẹ Jihova cha chọn avwanre uko vwo chirakon ji che bruba kẹ avwanre ukuotọ rọyen.—2 Kọrẹnt 4:.
19. Mavọ yen e se vwo fiudugberi vwo mu oghwa rẹ avwanre ọvo vwo bru erhiẹn?
19 Ọtiọyena, e de brorhiẹn, ofori nẹ a guọnọ odjekẹ ri Baibol a me je reyọ ẹgba rẹ iroro avwanre vwọ vwẹ ayen ruiruo. Ọma vwerhen avwanre nẹ Jihova womarẹ ẹwẹn ọfuanfon rọyen vẹ iniọvo ri tedje vwẹ ukoko na vwọ chọn avwanre uko! Womarẹ ukẹcha nana eje, avwanre se fiudugberi ji brorhiẹn aghwanre komobọ.
Die Wo Yonori?
• Die yen emuọvo kiriguo ra guọnọre e ki se bru omamọ rẹ erhiẹn?
• Mavọ yen e vwo yerẹn tedje vwọ nẹrhẹ e se bru omamọ orhiẹn kpahan eka rẹ ihwo re che vwo mu igbeyan?
• Die yen erọnvwọn evo re pha ghanghanre re che roro kpahen tavwen e ki brorhiẹn rẹ oka rẹ iruo re che ru?
• Tivọ yen a da sa mrẹ ukẹcha re se vwo bru omamọ rẹ erhiẹn?
[Uhoho]
Jẹmienyo rẹ Adam vẹ Ivi yono avwanre uyono ọghanghanre ọvo
[Uhoho]
Tavwen wo ki brorhiẹn ọghanghanre, ofori nẹ wọ hiẹ guọnọ odjekẹ ri Baibol