Ileta ro nẹ Obọ rẹ Ẹko Rọvwẹrote na Rhe

Vwo rhe ihwo ri vwo ẹguọnọ rẹ Jihova Ọghẹnẹ vẹ Ota rọyen rọ dia Baibol na:

“Jesu tare nẹ, “Ovwan ke riẹn uyota na, uyota na ko ru ovwan phihọ ọmuvwiẹ.” (Jọn 8:32) Roro kpahen oborẹ oma ru we ọke rẹsosuọ wọ vwọ riẹn uyota na! Ọ vwerhen oma ra vwọ riẹn nẹ a sa riẹn uyota na vwẹ akpọ nana rọ vọnre vẹ efian na.—2 Timoti 3:1.

Jihova Ọghẹnẹ guọnọre nẹ a riẹn uyota na. Avwanre guọnọ vuẹ ihwo kpahọn kidie avwanre vwo ẹguọnọ rayen. Ẹkẹvuọvo, ẹga rẹ Ọghẹnẹ vrẹ ọtiọyen. Avwanre cha davwẹngba vwo yeren akpọ kerẹ Inenikristi kidie avwanre vwo ẹguọnọ rẹ irhi rẹ Jihova. Jesu nabọ dje idjerhe ọghanghanre ọvo re se vwo djephia nẹ e vwo ẹguọnọ rẹ Ọghẹnẹ. Ọ da ta: “Ovwan da sẹro rẹ irhi mẹ, ovwan ke je dia vwẹ evun rẹ ẹguọnọ mẹ, kirobo re me sẹro rẹ irhi rẹ Ọsẹ mẹ re me da dia vwẹ ẹguọnọ rọye.”—Jọn 15:10.

Jesu nabọ vwo ẹguọnọ rẹ Ọsẹ rọyen, ọtiọyena ko ru kemu kemu rẹ Ọsẹ na vuẹrẹ nẹ o ru. A da vwẹrokere Jesu vwẹ akpeyeren avwanre, Jihova ko che vwo ẹguọnọ rẹ avwanre, ke ji che vwo omavwerhovwẹn. Kirobo rẹ Jesu tare, “Ovwan da riẹn imu nana, ebruba kẹ ovwan rẹ ovwan de ru ayen.”—Jọn 13:17.

Avwanre vwo imuẹro nẹ ọbe nana cha chọn wẹ uko vwo yeren akpọ nene oborẹ Baibol na tare, je dia ugbeyan rẹ Ọghẹnẹ. Avwanre nẹrhovwo nẹ e jẹ ẹguọnọ wẹn vwọ kẹ Ọghẹnẹ ganphiyọ, wọ je dia “evun rẹ ẹguọnọ rẹ Ọghẹnẹ; hẹrhẹ . . . arhọ rọye ri bẹdẹ na.”—Jude 21.