Amakashe rẹ Jihova Sẹro rẹ Hẹzikaya

Usuon rẹ Asiria reyọ uvwiẹ ihwe rẹ uvie rẹ Izrẹl phiyotọ usuon rayen re. Asaọkiephana, Sinakẹrib rọ dia ovie rẹ Asiria je guọnọ reyọ uvwiẹ ivẹ rẹ uvie rẹ Juda. Ọ reyọ irere rẹ Juda ọvuọvo re. Ẹkẹvuọvo orere rọ ma guọnọ yen Jerusalẹm. Jẹ Sinakẹrib rha riẹnre nẹ Jihova sẹro rẹ Jerusalẹmu-u.

Ovie rẹ Juda re se Hẹzikaya da vwẹ igho buebun vwo rhe Sinakẹrib rere ọ yanjẹ Jerusalẹm vwo. Ẹkẹvuọvo, ọ vwọ reyọ igho na nu, o de ji ji isodje rọyen nẹ ayen kpare ofovwin kpo Jerusalẹm. Oshọ ko muẹ ihwo na kidie isodje rẹ Asiria na sikẹrẹ ayen mamọ re. Hẹzikaya da vuẹ ayen: ‘We jẹ oshọ muẹ ovwa-an. Ihwo Asiria na ganre ẹkẹvuọvo, Jihova che ru avwanre gan vrẹn ayen.’

Sinakẹrib de ji odibo rọyen, Rabshake na, kpo Jerusalẹm ra vwẹ ihwo na vwọ jehwẹ. Rabshake na de mudia otafe rẹ orere na, ko kperẹ: ‘Jihova che se sivwin ovwa-an. Ovwan jẹ Hẹzikaya phiẹn ovwa-an. O vwo ọghẹnẹ vuọvo ro se sivwin ovwan nẹ abọ rẹ avwanre-e.’

Hẹzikaya da nọ Jihova obo ro ru. Jihova da kpahen kẹ: ‘Wọ djoshọ fikirẹ eta rẹ Rabshake na-a. Sinakẹrib cha ghwọrọ Jerusalẹmu-u.’ Ọyena vwọ wan nu, Sinakẹrib de si ẹbe rhe Hẹzikaya. O siri nẹ, ‘Vwẹ oma kpahotọ kẹ wẹ. Jihova che se sivwin uwe-e.’ Hẹzikaya da nẹrhovwo rhe Jihova, ọ da ta: ‘Biko Jihova, sivwin avwanre, rere ihwo eje vwọ riẹn nẹ wẹwẹ yen Ọghẹnẹ rẹ uyota na.’ Jihova da vuẹ: ‘Ovie rẹ Asiria cha ro orere rẹ Jerusalẹmu-u. Me cha sẹro rẹ orere mẹ.’

Sinakẹrib vwo imuẹro na nẹ ọyen che phi Jerusalẹm kparobọ. Ẹkẹvuọvo, vwẹ ason ọvuọvo, Jihova de ji amakashe vuọvo ro asan rẹ isodje rẹ Asiria na hepha vwẹ otafe rẹ orere na. Amakashe na de hwe isodje ri te 185,000! Ituofovwin rẹ Sinakẹrib eje de ghwu. O de rhivwin kpo kidie e phiro kparobọ nure. Jihova Sẹro rẹ Hẹzikaya vẹ Jerusalẹm kirobo ro veri. Ọ da dianẹ wẹwẹ evunrẹ Jerusalẹm ọke yena, wọ cha vwẹroso Jihova?