Ovwan Fuevun kẹ Ohwohwo

Jihova guọnọre nẹ avwanre ‘ni evun-ẹfuọn ghanghanre.’ (Maika 6:8) A guọnọ evun-ẹfuọn mamọ vwevunrẹ orọnvwe, kidie ọ nẹrhẹ a sa vwẹrosua ohwohwo. Ẹroẹvwọsuọ kọ rha nẹrhẹ ẹguọnọ dia asan.

Nonẹna, evun-ẹfuọn kanre orọnvwe buebun. Wọ ke sa sẹro rẹ orọnvwe wẹn, ofori nẹ wo mwegbe wo vwo ru erọnvwọn ivẹ.

1 JẸ ORỌNVWE WẸN DIA EMU ẸSOSUỌ

OBO RI BAIBOL NA TARE: “Vughe obo ri yovwirin.” (Filipae 1:10) Orọnvwe wẹn ọyen ọvo usun rẹ erọnvwọn ri yovwirin vwẹ akpeyeren wẹn. Ofori nẹ ovwan phio phiyẹ ẹdia ẹsosuọ.

Jihova guọnọre nẹ wọ vwẹrote ọrivẹ wẹn, ovwan “ghọghọ” kugbe. (Aghwoghwo 9:9) Ọ tarọ phephẹn nẹ wọ kpairoro vrẹ ọrivẹ wẹ-ẹn, ukperẹ ọtiọyen, ovwan ru obo re sa nẹrhẹ oma vwerhen ovwan. (1 Kọrẹnt 10:24) Jẹ ọrivẹ wẹn riẹn nẹ oma rọyen vwerhen owẹ, wọ je guọnọ ukẹcha rọyen.

OBO WO SE RU:

• Ovwan ghwọrọ ọke kugbe, ovwan me je nabọ kerhọ rẹ ohwohwo ọkieje

• Roro kpahen “avwanre” ukpe wo vwo roro kpahen “ọmẹ” ọvo

2 SẸRO RẸ UBIUDU WẸN

OBO RI BAIBOL NA TARE: “Kohwo kohwo ro ni aye rẹ ohwo ọfa opharo ro de je, yẹ o duro vwẹ udu rọyen nure.” (Matiu 5:28) Siẹrẹ ohwo de vwo iroro ọfanrhiẹn, a cha sa ta nẹ ohwo yena fuevun kẹ ọrivẹ rọye-en.

Jihova tare nẹ wọ ‘sẹro rẹ ubiudu wẹn.’ (Isẹ 4:23; Jerimaya 17:9) Wo ki se ru ọnana, ofori nẹ wo sun ibiẹro wẹn. (Matiu 5:29, 30) Nene udje ri Job, rọ vẹ ibiẹro rọyen re ọphọ kugbe, ro vwo jẹ aye ohwọfa eno vẹ urhurusivwe ro vwo nene vwerhẹn. (Job 31:1) Kẹnoma kẹ ughe rẹ ihwo re banphiyọ. Davwẹngba wẹn eje wọ vwọ kẹnoma kẹ obẹnẹvwe yẹrẹ oyerinkugbe ro je fo vẹ ohwo rọ diẹ ọrivẹ wẹ-ẹn.

OBO WO SE RU:

• Jẹ ihwoefa riẹn nẹ wo vwo ẹguọnọ kpahen ọrivẹ wẹn mamọ

• Roro kpahen ọdavwẹ rẹ ọrivẹ wẹn; siẹrẹ wọ da riẹn nẹ oka rẹ oyerinkugbe wẹ vẹ ohwọfa vwori ghwe je-e, gba dobọ rọyen ji kpakpata