Iyinkọn Na Ghwoghwo Ota Na Vẹ Uduefiogbere

ỌKE rẹ Jesu vwo kpo odjuvwu nu, ẹdẹ ihwe re kpaherọ, iyinkọn ri Jesu ri te 120 de koko vwẹ uwevwin ọvo vwẹ Jerusalẹm ọke rẹ Orẹ ri Pẹntikọst, ukpe ri 33. Siẹvuọvo na edo ọvo rọ họhọ odju rode, da vọn uwevwin na. Vwọrẹ igbevwunu, iyinkọn na ke jẹ ejajẹ rẹ ayen riẹnre jovwo-o. Die yen so ọnana? Ọghẹnẹ ku ẹwẹn ọfuanfon rọyen ku idibo na.

Ihwo buebun ri nẹ ẹkuotọ sansan rhe orẹ na, hẹ otafe. O de gbe ayen unu rẹ ayen vwo nyo idibo ri Jesu re nabọ jẹ ejajẹ rayen fiotọ. Pita vwo djekpahen obo re phiare na, ọ da rionbọ kpo aroẹmrẹ ri Joẹl rọ tare nẹ, Ọghẹnẹ che “ku” ẹwẹn ọfuanfon rọyen ku ihwo ejobi, ro che mu ayen vwo ru erọnvwọn sansan. (Joẹl 2:28, 29) Iruo rẹ igbunu nana rẹ ayen ruru womarẹ ẹwẹn ọfuanfon na, nẹrhẹ a rhe riẹn ewene rode ọvo rọ vwomaphia: Ọghẹnẹ si aroesiri rọyen vwo nẹ ihwo ri Izrẹl vwo kpo ukoko rẹ Inene-ri-Kristi kpokpọ na. Ihwo re guọnọ ga Ọghẹnẹ vwẹ idjerhe rọ guọnọre, ke dia idibo ri Kristi.

Ẹkẹvuọvo, idibo na rhiẹromrẹ omukpahen, e de mu ayen phiyọ uwodi. Jẹ vwevunrẹ ason, amakashe ri Jihova de rhie ẹchẹ rẹ uwodi na, ọ da vuẹ ayen nẹ ayen yanran re ruiruo rẹ aghwoghwo na. Ọtiọyen ayen ghini ru vwẹ urhiọke. Ayen da ro uwevwin rẹ ẹga na re yono ihwo iyẹnrẹn esiri ro shekpahen Jesu. Ivun de rhi miovwo ilori ẹga na, ayen da vuẹ idibo na nẹ ayen dobọ rẹ aghwoghwo na ji. Vwọrẹ uduefiogbere, idibo na da ta: “Avwanre se mu ọghọ kẹ Ọghẹnẹ nọ ihwo rẹ akpọ.”—Iruo Rẹ Iyinkọn Na 5:28, 29.

Omukpahen na kọ rhe ganphiyọ mamọ. Ihwo ri Ju evo de gun efian kpahen Stivin, ayen de phio hwe. Ọshare ọvo re se, Sọl rọ dia ohwo ri Tasọs, ọyen mudia nẹ e hwe. Vwo nẹ etiyin, o de kpo Damaskọs rere o vwo mu idibo ri Jesu rehẹ oboyin. Ọke rọ vwọ yanran, enu na da nyavwaro muo vẹ upho rọ tare nẹ: “Sọl, Sọl, die sorọ wo vwo mu uvwe?” Elo rẹ enu na de rhuẹro rọyen, Sọl da tanẹ: “Wẹ ono vwo?” Upho na da kpahen: “Mẹvwẹ Jesu.”—Iruo Rẹ Iyinkọn Na 9:3-5.

Ẹdẹ erha vwọ wan nu, Jesu de ji odibo rọyen re se Ananayas nẹ o re rhie ẹro ri Sọl. Sọl ko rhi bromaphiyame, o de ghwoghwo kpahen Jesu vẹ uduefiogbere. Ka rhe riẹn phiyọ ọyinkọn Pọl, ọ da rhe dia ohwo vẹ oruru vwẹ ukoko rẹ Inene-ri-Kristi.

Ihwo ri Ju vẹ Samaria eyen idibo ri Jesu ghwoghwo ota na kẹ jovwo. Amakashe ọvo da vwomaphia kẹ Kọniliọs, rọ dia isodje ri Rom, ohwo rọ djoshọ rẹ Ọghẹnẹ, nẹ o ji ikọn re se ọyinkọn Pita. Pita vẹ ihwo efa de kpo uwevwin rẹ Kọniliọs re ghwoghwo ota kẹ vẹ orua rọyen eje. Ọke rẹ Pita vwọ tota, Jihova de ku ẹwẹn ọfuanfon na kuẹ igiye ri kurhẹriẹ na, ọtiọyena Pita da tanẹ e bru ayen phiyame vwẹ odẹ ri Jesu. Idjerhe rẹ arhọ ri bẹdẹ na ko rhi rhiephiyọ kẹ ihwo rẹ ẹgborho na eje. Ukoko na muegbe re rayen vwo ruiruo rẹ aghwoghwo na vwẹ akpọneje.

​—E muro kpahen ọbe rẹ Iruo Rẹ Iyinkọn Na 1:1–11:21.