Ine rẹ Ẹga ri Yono Ohwo ri ji Bru Ohwo Uche

ỌBE rọ ma rho vwẹ Baibol na, ọyen ọbe rẹ Une Rẹ Ejiro. Omarẹ ikpe 1,000 ọyen e vwo si ọbe na. Ọbe rẹ Une Rẹ Ejiro na yen me vwo eta ri dje obọdẹn rẹ esegbuyota phia re nabọ te ubiudu ohwo. Ọbe na vọnre vẹ idjerhe sansan rẹ ihwo vwo dje ẹdia rẹ ubiudu rayen phia, kerẹ aghọghọ, ujiri, ẹkpẹvwẹ, uvweri, omaemuophiyọ, vẹ okurhẹriẹ. Aphro herọ-ọ, ibuine na vwo uvi rẹ oyerinkugbe vẹ Ọghẹnẹ. Roro kpahen iyovwinreta evo rẹ ine na.

Jihova yen Osun rẹ akpọ vẹ odjuvwu, o muwan rẹ ẹga vẹ ujiri. Une Rẹ Ejiro 83:18 NW, de se: “Wẹwẹ, rẹ odẹ wẹ dia Jihova na, Wẹ ọvo yen Me Kpenu vwẹ akpọ na ejobi.” Ine evo jiri Jihova fikirẹ obo rọ mare, kerẹ idjuvwu re vọnre vẹ isio na, igbunu rẹ emama ri vwo arhọ vwẹ otọrakpọ na, kugbe oborẹ ugboma rẹ ohworakpọ hepha. (Une Rẹ Ejiro 8, 19, 139, 148) Efa vwẹ urinrin kẹ Jihova kidie ọyen Ọghẹnẹ ro sivwin ihwo re fuevun, rọ je chochọ rayen. (Une Rẹ Ejiro 18, 97, 138) O ji vwo efa ri jiro kidie ọyen Ọghẹnẹ ro brorhiẹn rẹ abavo, rọ vwẹ ufuoma kẹ ihwo re shenyẹ, o mi rhe gbe oja kẹ irumwemwu na.—Une Rẹ Ejiro 11, 68, 146.

Jihova vwẹ ukẹcha vẹ uchebro vwọ kẹ ihwo ri vwo ẹguọnọ rọyen. Ọ sa dianẹ Une Rẹ Ejiro 23 yen ihwo ma riẹn, etiyin Devid da vwẹ Jihova vwo dje Osuigegede ro vwo ẹguọnọ, rọ vwẹrote igegede rọyen, je sẹro rayen. Une Rẹ Ejiro 65:2 karophiyọ ihwo re ga Jihova nẹ ọyen Ohwo “ro nyo ẹrhovwo.” Ihwo ri ru umwemwu ọgangan mrẹ onẹrhẹvwe vwo nẹ Une Rẹ Ejiro 39 vẹ 51, etiyin Devid de djisẹ rẹ okurhẹriẹ rọyen vẹ esegbuyota ro vwori kpahen evwoghovwo ri Jihova. Une Rẹ Ejiro 55:22 da rha kẹ avwanre uchebro nẹ a vwẹroso Jihova, e ji mu oghwa rẹ avwanre nyẹ.

Jihova che wene akpọ na womarẹ Uvie ri Mesaya na. Asan evo vwẹ ọbe rẹ Une Rẹ Ejiro na shekpahen Mesaya rọ dia Ovie ra mraro kpahen na. Une Rẹ Ejiro 2 mraro nẹ Osun nana cha ghwọrọ erharhe rẹ irere re vwọsuọ na. Une Rẹ Ejiro 72 djerephia nẹ Ovie nana che phi oba phiyọ owẹnvwe vẹ oshenyẹ. Kirobo rẹ Une Rẹ Ejiro 46:9 tare, womarẹ Uvie ri Mesaya na, Ọghẹnẹ che phi oba phiyọ ofovwin, ọ me je ghwọrọ ekuakua rẹ ifovwin ejobi. Vwẹ Une Rẹ Ejiro 37, avwanre yonori nẹ irumwemwu na rha cha dia-a, ẹkẹvuọvo, evwata na cha dia akpọ na bẹdẹ, ayen cha riavwerhen rẹ ufuoma vẹ oyenrikugbe vwẹ akpọeje.

​—E muro kpahen ọbe rẹ Une Rẹ Ejiro.