Ọmiaovwẹ rẹ Uvweri

“Mẹ vẹ Sophiaa rọvwọnre ikpe re vrẹ 39 tavwen ọga ọvo ro siotọ ki hwe. Igbeyan mẹ buebun chọn vwẹ uko, mi ji vwobọ vwẹ erọnvwọn evo ukperẹ mi vwo chidia asan ọvo. Ẹkẹvuọvo obo re phiare na miavwan ovwẹ oma vwẹ ẹgbukpe ọvo soso. Nọke fiọke yen mi vwo muomaphiyọ, kọ ghwa họhọ nẹ mi rhe se sun ẹdia mẹ na-a. Dede nẹ ọ vrẹ ẹgbukpe erha ro ghwu re, jẹ iroro rọyen je kọn ro ovwẹ ẹwẹn ọke sansan, jẹ ọke buebun na me riẹn ọke rọ vwọ kọn cha-a.”​—Kostas.

Ohwo ru wo vwo ẹguọnọ kpahen ghwu vawabọ jovwo re? Ọ da dia ọtiọyen, kọyen wo ji hirharoku oka rẹ ẹdia ri Kostas hirharoku na. Erọnvwọn re so ọmiaovwẹ vẹ ofudjevwe re gan vrẹ ughwu ọrivẹ rẹ orọnvwe, ihwo rẹ orua yẹrẹ ugbeyan rẹ ohwo tumuku-u. Egberianriẹn ri yono kpahen ọmiaovwẹ rẹ uvweri rhọvwen phiyọ ota yena. Uyovwinrota ọvo ra teyenphia vwẹ The American Journal of Psychiatry da ta: “Buebun rẹ ihwo roro nẹ ayen rha cha mrẹ ihwo rayen rẹ ayen vwo ẹguọnọ kpahen ri ghwuru ọfa-a, ọnana kọ sua ọmiaovwẹ ọgangan kẹ ayen.” Ohwo ro hirharoku ọmiaovwẹ ọgangan tiọyena sa vwẹ ẹwẹn roro: ‘Bro ọke mi che roro ọnana kri te? Oma je sa vwerhen ovwẹ ọfa? Mavọ yen ẹwẹn mẹ se vwo te otọ?’

Ẹkpahọnphiyọ rẹ enọ nana hẹ evunrẹ iyovwinreta sansan rehẹ Awake! nana. Uyovwinrota rọ vwọ kpahen ọnana cha ta ota kpahen obo re se rhẹro rọyen ọ da dianẹ ohwo rẹ wo vwo ẹguọnọ kpahen ghwuru o krinọ-ọ na. Iyovwinreta efa re vwọ kpahọn che dje idjerhe re sa chọn wẹ uko vwo chirakon rẹ ọmiaovwẹ ọgangan rẹ uvweri ghwa cha.

O muẹro nẹ iyovwinreta sansan re vwọ kpahen ohwohwo na cha chọn wẹ uko je vwẹ uchebro kẹ kohwo kohwo ro hirharokuẹ ọmiaovwẹ rẹ uvweri.