Obo re sa Chọn Wẹ Uko Vwọ Dobọ rẹ Isigati Ephopho Ji
“Orhiẹn-ebro kokoroko rẹ ihwo ri phopho isigati bruru rẹ ayen vwọ dobọ rẹ isigati ephopho ji, ọyen owọẹjẹ rọ ma ghanre rọ cha nẹrhẹ ayen phikparobọ.”—“Stop Smoking Now!”
SE vwo dje lọhọ, wọ da guọnọ dobọ rẹ isigati ephopho ji, ofori nẹ o vwo emuọvo kiriguo rọ cha kẹ wẹ ẹgba vwo ru ọtiọyen. Mavọ wọ sa vwọ kpuriẹnphiyọ owenvwe ro rhe we na? Emu ọvo kọna, roro kpahen erere wọ cha mrẹ siẹrẹ wọ da dobọ rẹ isigati ephopho ji.
Wọ cha sẹro rẹ igho. Wo de phopho ipakẹti rẹ isigati ọvo kẹdi kẹde, wọ cha ghwọrọ idọla uriorin buebun ẹgbukpe. “Me nama riẹn uche igho re me ghwọrọ kuẹfia vwẹ enu rẹ isigati ephopho jovwo-o.”—Gyanu, Nepal.
Akpọ wẹn che yovwinphiyọ. “Akpeyeren mẹ rhi yovwinphiyọ rhanvwe ọke me vwọ dobọ rẹ isigati ephopho ji na, ko ji yovwẹnphiyọ yovwẹnphiyọ.” (Regina, South Africa) Ọke rẹ ihwo da dobọ rẹ isigati ephopho ji, ẹrẹnvwe rayen kọ sa nabọ davwan avwerhen rẹ emu, kẹ ayen nyo ọrhen fiotọ vrẹ obo ri jovwo, ugboma rayen kọ je nabọ kpokpọ phiyọ.
Ẹdia rẹ omakpokpo wẹn che yovwinphiyọ. “E vwo siobọnẹ isigati ephopho fierere kẹ ugboma na owenẹ ohwo na dia aye yẹrẹ ọshare, eghene yẹrẹ ọmare.”—The U.S. Centers for Disease Control and Prevention.
Wo che vwo ẹgba rẹ owẹwẹ ọvo che vwo sun obo ru wo ruẹ. “Mi siobọnu isigati ephopho kidie me guọnọre nẹ o sun vwe-e. Me guọnọre nẹ omẹvwẹ ọvo sun ugboma mẹ.”—Henning, Denmark.
Igbeyan vẹ ihwo rẹ orua wẹn cha mrẹ erere. “Isigati ephopho . . . sua ọga kẹ ihwo re riariẹ owẹ. . . . Ehiahiẹ djerephia nẹ ivwirhi rẹ isigati rẹ ihwo efa wẹn reyọ sua ughwu kẹ ihwo uriorin buebun kukpe kukpe kidie ọ sua ọga rẹ ikansa rẹ irhue vẹ ọga rẹ ubiudu.”—American Cancer Society.
Wọ cha nẹrhẹ oma vwerhen Ọmemama wẹn. “Imoni re ghare, e gbe jẹn avwanre họ oma rẹ avwanre nẹ ẹgua rẹ ugboma vẹ erhi.” (2 Kọrẹnt 7:1) “Vwẹ oma rẹ ovwan ze izobo . . . rọ fọnro, ro fo ẹreyọ kẹ Ọghẹnẹ.”—Rom 12:1.
“Me ghwa vwọ riẹn nẹ ekuakua re sua omaẹwan kẹ ugboma na miovwo Ọghẹnẹ ivun, mi de brorhiẹn me vwọ dobọ rẹ isigati ephopho ji.”—Sylvia, Spain.
Ọke buebun na, owenvwe na ọvo ghwe te-e. A sa vwọ dobọ rẹ isigati ephopho ji, avwanre je guọnọ ukẹcha rẹ ihwo efa kerẹ igbeyan vẹ ihwo rẹ orua rẹ avwanre. Die yen ihwo nana se ru?