Elọkpa Nene Joseph

Wọ da dia ọvo usun rẹ Iseri ri Jihova, mavọ wo roro nẹ ọ cha dia siẹrẹ elọkpa de nene uwe kpo iruo rẹ aghwoghwo ri nuwevwin kpo uwevwin? Ọyen obo re phia kẹ Joseph vwẹ Micronesia vwẹ ukpe ri 2017. Ọ vẹ iniọvo erha ru egbadaẹdjẹ oghẹresan vwẹ irere sansan rẹ ame riariẹ phiyọ re bẹn ete.

Omarẹ oghẹruvo, Iseri ri Jihova ẹne na da ro orere otete ọvo rẹ ame riariẹ phiyọ ro vwo ihwo ri te omarẹ 600. Osun rẹ orere na de dede ayen. Joseph da ta obo re phiare: “Osun rẹ orere na da tanẹ imoto rẹ elọkpa se mu avwanre kpo iwevwin na eje rehẹ orere na. Obo rọ tare na gbe avwanre unu, ẹkẹvuọvo avwanre da vwẹ unu kpotọ vwọ sen. Avwanre guọnọ ghwoghwo kẹ ihwo na ababọ rẹ elọkpa kirobọ rẹ avwanre ruẹ jovwo.”

Ighwoghwota na da vwẹ owọ yan ro orere na, vẹ ewẹn rẹ ayen vwo ghwoghwo kẹ ihwo buebun. Ighwoghwota na da ta: “Ovuẹ avwanre na je ayen mamọ, ayen ji vwo ẹwẹn re vwo ruẹse, ọnana da nẹrhẹ avwanre ghwọrọ ọke grongron vwẹ etiyin vrẹ oborẹ avwanre vwẹro roro.”

Ọke vwọ yanran na, imoto rẹ elokpa da djẹ wanvrẹ Joseph abọ ivẹ, ọ rẹ obọ rerha ayen da domaji. Elọkpa na da nọ Joseph sẹ ayen se muo kpo asan ri chekọ na. Joseph da ta: “Me da tanẹ ẹjo, jẹ ọ rẹ udje na ayen rhọnvwere-e, ayen da ta: ‘Ọmọke yin chekọ wo ki nẹ orere na, avwanre che mu we kpo iwevwin ri chekọ.’ Kidie nẹ iwevwin buebun je herọ mi ji te-e, me rha sa se-en. Elọkpa na vuẹ avwanre odẹ rẹ ọgbuyovwin orua ọvuọvo rẹ avwanre che te uwevwin rọyen, ayen da je tanẹ ayen che hworo ọgban rẹ imoto rayen siẹrẹ ohwo vuọvo rha kpahen kẹ avwanre-e.

“Ukẹcha rẹ ayen vwọ phia na da nẹrhẹ avwanre se te iwevwin na eje. Avwanre ghare ẹbe buebun kẹ ihwo na ji ru ọrhuẹrẹphiyotọ rẹ avwanre vwo rhivwin bru ihwo ri dje omavwerhovwẹn phia.”

Elọkpa na da vuẹ Joseph nẹ ayen “nabọ riavwerhen rẹ aghwoghwo rẹ iyẹnrẹn esiri na.” Ọke rẹ ayen vwo rhivwin kpo vwẹ ovwọnvwọn, elọkpa na de kpogho obọ kẹ ayen vẹ ibroshọ rẹ ayen vwọ yọnrọn obọ.