Uhoho ra Kare Phiyọ Igbẹhẹ Vwẹ Ijipt Vwẹ Ọke Awanre vẹ Oborẹ Baibol na Tare Rhọnvwephiyọ Ohwohwo

E ru uhoho nana ro gron te ichiyin 26 kẹrẹ asan ra wan ro evunrẹ uwevwin rẹ ẹga rẹ ihwo rẹ Ijipt rẹ ọke rẹ awanre da ga ọghẹnẹ re se Amun vwẹ Karnak. Ihwo ri yono ẹbe kodo tare nẹ uhoho na dje ophikparobọ ri Fero re se Shishak vwẹ etọ rehẹ uherevie rẹ obọrhen vẹ obuko ọnre na vwẹ Ijipt, eriyin ji te Juda vẹ uvie rẹ Izrẹl rọhẹ obọrhen ọnre na.

Uhoho na dje ọke rẹ Amun vwọ vwẹ eviẹn re vrẹ 150 kẹ Shishak yẹrẹ Sheshonk.a Ọviẹn ọvo mudiaphiyọ orere ọvo ro phi kparobọ. E si odẹ rẹ orere rẹ ayen ọvuọvo mudiaphiyọ na, phiyọ oma rẹ ọviẹn ọvuọvo. Buebun rẹ edẹ na, a je nabọ mrẹ ayen fiotọ te ọke na, ihwo ri se Baibol na je nabọ vughe evo. Edẹ kerẹ Betshean, Gibiọn, Megiddo, Shunem kugbe efa tiọyen.

Baibol na ta ota kaphen oborẹ ihwo rẹ Ijipt wan phi Juda kparobọ. (1 Ivie 14:25, 26) Ọ tobọ djunute erọnvwọn evo kiriguo re phiare ọke rẹ Shishak vwo phi Juda kparobọ. Ọ da ta: “Vwẹ ukpe riyori rẹ Ovie Rehoboam, . . . Shishak ovie rẹ Ijipt da rhe họnre Jerusalẹm. Ọ vẹ ekpẹre ujori ihwivẹ kugbe ihwo re gua iyesi uriori ujorha. Ihwo ri nenire nẹ Ijipt rhe. . . . Ọ da reyọ irere ri Juda ra gba ogba phihọ rhiri re te Jerusalẹm.”—2 Ikun Rivie 12:2-4.

Ọ dia uhoho re si phiyọ igbẹhẹ vwẹ Karnak ọvo yen orọnvwọn awanre ra mrẹre ro djerephia nẹ Shishak ro otọ rẹ Izrẹl dẹvure-e. A je mrẹ odẹ na “Sheshonk” vwẹ ẹbẹre rẹ ukuta ọvo vwẹ Mẹgiddo rọ dia orere re djunute vwẹ Baibol.

Ovuẹ ọgbagba rẹ Baibol na vwọphia kpahen oborẹ Shishak wan phi orere rẹ Juda kparobọ, ghwa odjephia rẹ evun-ẹfuọn rẹ ihwo ri si Baibol na. Ayen fuevun si kpahen ophikparobọ rẹ orere rayen, kugbe oborẹ irere efa wan phi orere rayen kparobọ. A sa mrẹ ọkpọ rẹ evun-ẹfuọn tiọyena vwẹ ohri rẹ isiẹbe awanre efa-a.