Ayen Dje Ọdavwaro Phia Kpahen Ileta Rọyen

Brooke rọ dia United States ọyen ọvo usun rẹ Iseri ri Jihova. Vwẹ ọke rẹ ọga ri COVID-19 na, ọ da womarẹ ileta esio vwo ghwoghwota. Kudughwrẹn kudughwrẹn yẹn Brooke vwọ si ileta buebun. Ẹkẹvuọvo, ẹgbukpe ọvo gbẹ ubro vwọ wan nu, ẹwẹn rọyen da rhe kuọrọn, kidie vwẹ ọke yena eje, ohwo vuọvo yen kpahen kẹ​—ohwo na da je vuẹ nẹ o gbi siẹ ileta rhe ọyen ọfa-a. Brooke niro nẹ ileta rọyen na vwẹ ukẹcha kẹ ohwo vuọvo-o.

Ẹkẹvuọvo, ọke vwọ yanran na, Kim rọ je dia Oseri ri Jihova rọ wian vwẹ ibanki, da vuẹ Brooke kpahen otaẹtakuẹgbe ọ vẹ ọneki ọvo vwori. Ọneki na da vuẹ Kim vwọ kpahen ileta ra vwẹ obọ si rọ reyọ mie Oseri ri Jihova ọvo. Kim da rhe mrẹvughe nẹ ileta ri Brooke siri na yẹn ọneki na ta ota kpahan na! Udughwrẹn rọ vwọ kpahen ọyena, ọneki na da rhoma rhivwin rhe ibanki na. O vwo nene Kim ta ota, ọ da nọ sẹ o se kpo emẹvwa rẹ avwanre, vwẹ uvwre rẹ ọke yena, avwanre womarẹ vidio kọnfrẹsin vwo ruẹ emẹvwa rẹ avwanre.

Ọmọke vwọ wan nu, Oseri ri Jihova ọfa re se David, da je vuẹ Brooke kpahen ọshare ọvo rọ ọ vẹ ọyen gba wian rọ je mrẹ ileta rọyen. Oma vwerhenrọ mamọ kpahen ileta na kidie obọ yen e vwo sio. Ọshare na da ta: “Ofori nẹ ihwo efa ji dje ọkpọ rẹ ọdavwaro tiọna na vwọ kẹ ihwo.” David da ghwa reyọ uphẹn yena vwo ghwoghwota kẹ je vuẹ nẹ ọ cha vwẹ ẹbe kẹ siẹfa, oma da vwerhen ọshare na mamọ.

Iseri ri Jihova riẹnre nẹ ọ dia ọkieje yẹn ayen cha vwọ riẹn sẹ ubi rẹ ayen kọnre vwẹ iruo rẹ aghwoghwo na djẹre-e. (Aghwoghwo 11:​5, 6) Ẹkẹvuọvo, oborẹ Brooke rhiẹromrẹ na nẹrhẹ ọ mrẹ ọghanrovwẹ rẹ ẹbẹre rọ kare vwẹ iruo rẹ aghwoghwo na.​—1 Kọrẹnt 3:6.