Fuevun Wo ji Fiudugberi Kerẹ Bẹnaya

Bẹnaya ọyen ọgbofovwin rọ gare vwẹ otọ rẹ Ovie Devid vẹ Solomọn. Dedena Bẹnaya reyọ ekuakua ofovwin vwo ruiruoo kidie ọmọ rẹ orherẹn ọyen o ruẹ, jẹ o ji dje uduefiogbere phia, rọ vwọ kobaro vwẹ ifovwin ri Jihova. Kerẹ udje, o hwe okpohrokpo vwevunrẹ ukpotọ, ọ da je teyẹn isodje ọvo rọ dia arhuaran hwe. Devid vwẹroso Bẹnaya mamọ te ẹdia rọ da reyọ vwo mu onotu rẹ ihwo re rhẹrẹ.​—2 Sam. 23:20-23.

Uvwrẹ rẹ ọke rẹ Absalọm vẹ Adonaija vwo gbevwọso Devid na eje, Bẹnaya fuevun kẹ re toba. (2 Sam. 8:18; 15:18; 1 Ivie 1:8) Vwẹ ọke ọghwo ri Devid, Bẹnaya je vwẹ ukẹcha phia rere a sa vwọ reyọ Solomọn vwo mu ovie. (1 Ivie 1:32-40) Vwọrẹ uyota, Bẹnaya fuevun kẹ Jihova ọtiọyen ji te ivie Ro vwo mu, ọke rẹ ihwo efa vwọ tobọ ku ayen phiyotọ.

A je guọnọ uduefiogbere a sa vwọ họnre vwọso ọvweghrẹn rẹ avwanre ro vwo ẹgba mamọ, Eshu, ọtiọyen ji te ihwo rọ reyọ vwo ruiruo. E jẹ avwanre brorhiẹn ọkieje re vwo yeren akpọ vwo nene iwan ri Jihova. (Ẹfe. 6:11; 1 Pita 5:8, 9) Ọ da tobọ dianẹ ihwo evo yanjẹ Jihova vwo, e jẹ a fuevun tinkamuo vẹ imuẹro nẹ ọ cha hwosa kẹ avwanre.​—2 Sam. 22:26.