Rhoma Fuẹrẹn Ẹkpo re ma Ghanre

Ọ bẹn ru wọ vwọ karophiyọ oborẹ wo ghwe yono? Ọyena phia kẹ avwanre eje nọke ra ruọke. Die yen sa vwẹ ukẹcha kẹ avwanre? Ọyen ra vwọ rhoma fuẹrẹn ẹkpo re ma ghanre.

Wo de ruẹ uyono, dobọji nọke ra ruọke wọ vwọ jokaphiyọ ẹkpo re ma ghanre. Jokaphiyọ oborẹ ọyinkọn Pọl vwọ vwẹ ukẹcha kẹ ihwo ri se ileta rọyen vwo ru ọtiọyen ọke ro vwo si: “Asaọkiephana ẹkpo rẹ oborẹ avwanre ta na kẹ ọna.” (Hib 8:1) Vẹ eta yena, ọ vwẹ ukẹcha kẹ ihwo rọ ta ota kẹ na vwo vwo ẹruọ rẹ obo rọ ta rere ayen se vwo vughe oborẹ ẹkpo vuọvo vwo churobọ si uyovwinrota rọyen na.

Wọ sa ghwọrọ omarẹ ibrẹro ihwe siẹrẹ wo de ru uyono na nu vwo roro kpahen ẹkpo eghanghanre rẹ oborẹ wo yonori na. Ọ da dianẹ wọ rha sa karophiyọ ẹkpo naa, gba rhoma ni iyovwinreta itete yẹrẹ urhiẹ rẹsosuọ rọhẹ ẹkorota ọvuọvo rẹ uyono na wọ sa vwọ karophiyọ oborẹ wo yonori. Ọ da dianẹ wo yono orọnvwọn ọkpokpọ, davwẹngba vwọ reyọ eta romobọ wẹn vwọ rhoma ta. Ẹrhomafuẹrẹn rẹ ẹkpo re ma ghanre na cha vwẹ ukẹcha kẹ wẹ vwọ karophiyọ obo ru wo yonori kugbe obo ru wọ sa vwọ reyọ vwo ruiruo vwẹ akpeyeren.