Enọ Rẹ Ihwo Ri Se Ẹbe Avwanre Nọre
Diesorọ ihwo evo vwọ tanẹ eta rehẹ Une rẹ Ejiro 12:7 na shekpahen “Iveve rẹ Ọrovwohwo” (vwẹ owọ 6) jẹ New World Translation tare nẹ o shekpahen “ivwiogbere na” (vwẹ owọ 5)?
Eta re riariẹ owọrota ri Baibol yena phiyọ djerephia nẹ owọrota na ta ota kpaphen ihwo.
Une rẹ Ejiro 12:1-4, tare nẹ “ihwo rẹ uyota ejobi ravwiẹ re nẹ uherevie rẹ emọ rẹ ihwo.” Asaọkiephana, jẹ a fuẹrẹn Une rẹ Ejiro 12:5-7, rọ dia awọreta rẹ onọ na nurhe.
“ ‘Fikiridie ivwiogbere na e miovwẹ ayen,
Ọ rẹ akpọ bẹnre de irhivwẹ,
Mi vrẹn vwẹ asaọkiephana, eriyin Ọrovwohwo tare;
[‘Mi che sivwin ayen vwo nẹ abọ rẹ ihwo re jẹ ayen fia NW.’]
Iveve rẹ Ọrovwohwo na eye iveve re pha fuanfon,
Idọnọ efuanfon ra fare vwẹ otọ vwẹ evun rẹ erhanre, re ru fon asieghwrẹ.
Biko wẹ, E Ọrovwohwo, chochọ rẹ avwanre [ayen] NW,
Sun avwanre bẹdẹ nẹ orua nana.”
Owọ 5 ta ota kpahen oborẹ Ọghẹnẹ che ru kẹ “ivwiogbere.” O che sivwin ayen.
Owọ 6 da vwọba nẹ “Iveve rẹ Ọrovwohwo na eye iveve re pha fuanfon,” kerẹ “idọnọ efuanfon ra fare.” Ota nana ọyen oborẹ Inenikristi vwo imuẹro kpahen.—Un 18:30; 119:140.
Enẹna, e jẹ a fuẹrẹn owọrota rọ vwọ kpahọn, Une rẹ Ejiro 12:7: “Biko wẹ, E Ọrovwohwo, chochọ rẹ avwanre [ayen, NW ], sun avwanre [ayen, NW ], bẹdẹ nẹ orua nana.” Amono yen “ayen” mudiaphiyọ?
Kidie nẹ owọ 7 vwọ kpahen owọ 6 rọ ta ota kpahen “iveve rẹ Ọrovwohwo na,” ihwo evo ki se roro nẹ “ayen” na mudiaphiyọ “Iveve rẹ Ọrovwohwo.” Jẹ avwanre riẹnrẹ nẹ Ọghẹnẹ chochọ ri Baibol na dede nẹ ihwo re vwọsua davwẹngba ayen vwọ guọghọ je dobọ rọyen ji.—Aiz 40:8; 1Pi 1:25.
Ẹkẹvuọvo, oborẹ owọ 5 tare jẹ uyota. Ọkieje yen Jihova vwẹ ukẹcha kẹ “ivwiogbere na” kugbe ihwo re “miovwẹ,” o ji sivwin ayen,—Job 36:15; Un 6:4; 31:1, 2; 54:7; 145:20.
Ọtiọyena, die yen, “ayen” rọhẹ owọ 7 na mudiaphiyọ?
Eta re riariẹ owọ rẹ Baibol yena phiyọ djerephia nẹ “ayen” mudiaphiyọ ihwo.
Une rẹ Ejiro 12:1 ta ota kpahen “ihwo rẹ uyota” rọ sa dianẹ e gun efian kẹ. Ẹkpo ri Baibol na je ta ota kpahen ihwo re vwẹ ẹrẹnvwe rayen vwọ ta erharhe eta nẹ Jihova che gboja kẹ ayen. Une rẹ ejiro na vwẹ imuẹro kẹ avwanre nẹ a sa vwẹroso Jihova nẹ ọ cha vwẹ ukẹcha kẹ avwanre kidie eta rọyen pha fuanfon.
Ọtiọyena, owọ 7 tare nẹ Jihova cha sẹro, je vwẹrote “ayen,” kọyen ihwo rẹ iruimwemu gboja kẹ.
A reyọ “ayen” vwo ruiruo vwẹ owọrota nana vwẹ isiesi rẹ Hibru ra vwẹroso. Grik Septuagint da rha reyọ “avwanre” vwo ruiruo abọ ivẹ vwẹ owọ 7, rọ rionbọ kpo ihwo re fuevun vwẹ ọke rẹ awanre re shenyẹ ji gboja kẹ. Owọ 7 ro ku ota nana phiyọ tare nẹ a cha sẹro rẹ ihwo re fuevun vwo nẹ “orua nana,” kọyen vwo nẹ abọ rẹ ihwo umwemwu. (Un 12:7, 8) Vwẹ Aramaic Targums, owọ 7 de se: “Wẹ, E ỌROVWOHWO, cha sẹro rẹ ihwo ọsoso, wo che sivwin ayen vwo nẹ uvwiẹ umwemwu nana bẹdẹ. Kasan kasan yen orumwemwu na ra kerẹ ẹrhorho ro se ọbara rẹ emọ rẹ ihworakpọ.” Ọnana emu ọfa ro djerephia nẹ ọ dia iveve rẹ Ọrovwohwo yen Une rẹ Ejiro 12:7 mudiaphiyọọ.
Ọtiọyena, owọrota nana vwẹ iphiẹrophiyọ kẹ “ihwo rẹ uyota” nẹ Ọghẹnẹ che sivwin ayen.