Wọ Karophiyọ?

Wọ nabọ frẹkotọ se ọbe Uwevwin Orhẹrẹ na eje ra teyenphia vwẹ enukpe na? Ọ da dia ọtiọyen, gba davwẹngba sẹ wọ sa kpahenphiyọ enọ nana:

Die yen o mudiaphiyọ re vwo “wene iroro” rẹ avwanre? (Ro 12:2)

Ọ dia e vwo ru erọnvwọn evo ri yovwinrin vwẹ akpeyeren ọvo yen o ghwe mudiaphiyọ-ọ. O churobọ si a vwọ fuẹrẹn oka rẹ ohwo ra hepha vwẹ obevun ji ru ewene ra guọnọre rere e se vwo yerin mu iwan ri Jihova.​—w23.01, aruẹbe 8-9.

Mavọ yen a sa vwọ vwẹ ẹro abavo vwo ni erọnvwọn re phia vwẹ akpọ na?

Avwanre vwo owenvwe ra vwọ riẹn oborẹ erọnvwọn re phia vwẹ akpọ na vwo ruẹ orugba rẹ aroẹmrẹ ri Baibol. Ukperẹ e vwo vwo ẹwẹn rẹ mi rorori rọ sa so ohra vwẹ ukoko na, ofori nẹ e nene odjekẹ rẹ ukoko ri Jihova vwọ phia. (1Kọ 1:10)​—w23.02, aruọbe 16.

Idjerhe vọ yen omaebrophiyame ri Jesu vwọ fẹnẹ ọ rẹ idibo rọyen?

O rhe fo nẹ ọ vwomakpahotọ kẹ Jihova-a kidie ẹkuotọ rẹ Ọghẹnẹ jẹreyọ yen e de vwiẹ. O rhe fo nẹ o kurhẹriẹ nẹ umwemwu vuọvo-o yẹrẹ rẹ kẹ ẹwẹn obrorhiẹn rọ fonro-o kidie ohwo ọgbagba ro vwo umwemwu-u yen o ruẹ.​—w23.03, aruọbe 5.

Mavọ yen a sa vwọ vwẹ uphẹn kẹ iniọvo efa vwọ kpahenphiyọ enọ?

E se ru ẹkpahọnphiyọ avwanre kprẹn rere ihwo efa sa vwọ kpahenphiyọ enọ. A je sa kẹnoma kẹ uruemu re vwo djunute ẹkpo buebun rere ihwo efa sa vwọ mrẹ oborẹ ayen cha ta.​—w23.04, aruọbe 23.

Die yen “Idjerhe Ọfuanfon” ra ta ota kpahen vwẹ Aizaya 35:8 mudiaphiyọ?

Idjerhe rẹ udje nana ke mudiaphiyọ oyan rẹ ihwo ri Ju yanre vwo nẹ Babilọn vwo kpo orere rayen. Kẹ ọke avwanre na vwo? Ikpe ujorin buebun a ke rhe mrẹ ukpe ri 1919, yen ayen vwọ nabọ wian owian rẹ efanfan kugbe ẹteyọn ri Baibol na kugbe ẹbe efa. Ihwo rẹ Ọghẹnẹ yan vwẹ “Idjerhe Ọfuanfon” na rọ nẹrhẹ ayen vẹ Ọghẹnẹ vwo uvi rẹ oyerinkugbe je mrẹ ebruphiyọ rẹ Uvie na.​—w23.05, aruẹbe 15-19.

Uchebro vọ yen Isẹ uyovwin 9 vwọphia kpahen eya ivẹ re vwo ru udje?

Ọbe rẹ Isẹ ta ota kpahen “ẹkpa rẹ aye” rẹ use rọyen suẹn ohwo kpo “obo Ushi” vẹ aye ro vwo “aghwanre” rẹ use rọyen suẹn ohwo kpo “idjerhe rẹ orẹmrẹ” kugbe arhọ. (Isẹ 9:​1, 6, 13, 18)​—w23.06, aruẹbe 22-24.

Idjerhe vọ yen Ọghẹnẹ vwo dje omaevwokpotọ vẹ uruemu ra vwọ nuẹ phia kẹ Lọt?

Jihova vuẹ Lọt nẹ ọ djẹ nẹ Sodọm kpo obo igbenu na. Ọke ri Lọt vwọ rẹ nẹ ọyen djẹ kpo Zoar, Ọghẹnẹ da rhọnvwe phiyọ oyare rọyen na.​—w23.07, aruọbe 21.

Die yen aye se ru ọ da dianẹ ọshare rọyen nẹ ihoho rẹ ihwo re banphiyọ?

E jẹ aye na karophiyọ nẹ ọ dia ọyen yen so oborẹ ọshare rọyen ruru na-a. Ofori nẹ ọ tẹnrovi oyerinkugbe rọyen vẹ Ọghẹnẹ ji roro kokodo kpahen ikuegbe rẹ eya ri hirharoku ofudjevwe vwẹ Baibol na re mrẹ ọbọngan vwo nẹ obọ ri Jihova rhe. Ọ je sa cha ọshare rọyen uko vwọ kẹnoma kẹ ẹdia re sa kpare urhurusivwe na.​—w23.08, aruẹbe 14-17.

Mavọ yen ẹruọ sa vwọ cha avwanre uko vwọ ta ota bọrọbọrọ ọke ra da nọ avwanre enọ kpahen obo re segbuyota?

A sa womarẹ onọ rẹ ohwo nọre vwọ riẹn iroro vẹ ọdavwẹ rọyen. Ọtiọyena, ka sa kpahen ota bọrọbọrọ kẹ ohwo na.​—w23.09, aruọbe 17.

Die yen avwanre se yono mie Meri kpahen obo ra sa vwọ mrẹ ọbọngan?

Meri mrẹ ọbọngan rẹ ihwo efa rọ vwọ riẹn nẹ ọyen cha dia oni ri Mesaya na. Gabriẹl kugbe Ẹlizabẹt reyọ uchebro ro nẹ Ọbe Ọfuanfon na rhe vwọ bọn Meri gan. A je sa mrẹ ọbọngan mie iniọvo na.​—w23.10, aruọbe 15.

Mavọ yen Jihova sa vwọ kpahenphiyọ ẹrhovwo avwanre?

O veri nẹ ọ cha kpahenphiyọ ẹrhovwo avwanre ọ da dianẹ oshephiyọ ọhọre rọyen. (Jer 29:12) Ọ sa kpahenphiyọ oyare wẹ na vwẹ idjerhe rọ fẹnẹ oborẹ wọ yare mie na, ẹkẹvuọvo, jẹ o muwẹro nẹ o che bicha wẹ ọkieje.​—w23.11, aruẹbe 21-22.

Rom 5:2 ta ota kpahen “iphiẹrophiyọ,” kẹ diesorọ a vwọ rhoma kanrunumuo vwẹ owọ 4?

Ohwo se vwo iphiẹrophiyọ rọ vwọ dia iparadaisi vwẹ otọrakpọ na siẹrẹ ọ da kerhọ kẹ iyẹnrẹn esiri na. Jẹ o vwo hirharokuẹ ebẹnbẹn, chirakon rayen je mrẹ aroesiri rẹ Ọghẹnẹ, iphiẹrophiyọ rọyen kọ cha rhe ganphiyọ ko ji che rhi vughe Ọghẹnẹ phiyọ.​—w23.12, aruẹbe 12-13.