Enọ Rẹ Ihwo Ri Se Ẹbe Avwanre Nọre
Ihwo vọ yen a cha rhọvwọn vwẹ otọrakpọ na, kẹ mavọ yen evrẹnushi rayen cha dia?
Roro kpahen oborẹ Baibol na kpahenphiyọ enọ nana wan.
Iruo Rẹ Iyinkọn Na 24:15 vuẹ avwanre nẹ “evrẹnushi herọ kẹ ihwo te ihwo ọsoso te i ri jẹ ọsoso ẹdia.” Ihwo rẹ ọsoso, eyen ihwo ri nyupho rẹ Ọghẹnẹ tavwen ayen ki ghwu, ọtiọyena, e de si edẹ rayen phiyọ ọbe arhọ na. (Mal. 3:16) Ihwo ri jẹ ọsoso ẹdia na, eyen ihwo ri ghwe vwo uphẹn rẹ ayen vwo yono kpahen Jihova tavwen ayen ki ghwu-u, ọtiọyena, e si edẹ rayen phiyọ ọbe arhọ na-a.
Jọn 5:28, 29 je ta ota kpahen ẹko rẹ ihwo ivẹ re djunute vwẹ Iruo Rẹ Iyinkọn Na 24:15 na. Jesu tare nẹ “otu ri ru ọ rẹ esiri” che “vrẹn kpo arhọ, otu ri ru umwemwu, ki vrẹn kpo ẹdjọeguo.” Evwata na ru obo ri yovwinrin tavwen ayen ki ghwu. Ayen che vrẹn kpo arhọ kidie edẹ rayen jehẹ ọbe arhọ na. Ẹkẹvuọvo, ihwo ri jẹ ọsoso ẹdia na, eyen ihwo ri ru imwemwu tavwen ayen ki ghwu. Ayen che vrẹn kpo ẹdjọeguo. E ji rhi se edẹ rayen phiyọ ọbe arhọ na-a, kidie a cha fuẹrẹn ayen ni vwẹ ọmọke. Vwẹ uvwre ọke yena, ayen che vwo uphẹn rẹ ayen vwo yono kpahen Jihova ji vwo uphẹn re vwo si edẹ rayen phiyọ ọbe arhọ na.
Ẹvwọphia 20:12, 13 djisẹ rẹ obo ro fori nẹ ihwo eje ra cha rhọvwọn nushi rhe na ru vwo nene “obo re si phihọ ẹbe na” rọ dia irhi kpokpọ rẹ Ọghẹnẹ cha vwọ kẹ avwanre vwẹ akpọ kpokpọ na. Jihova cha ghwọrọ ihwo re rhọnvwe nyupho rọye-en.—Aiz. 65:20.
Daniẹl 12:2 mraro nẹ a cha rhọvwọn ihwo evo ri ghwuru na “kpo arhọ ri bẹdẹ, evo kpo omẹvuọ vẹ ehwẹjẹ ri bẹdẹ.” Owọrota nana ta ota kpahen obo ri che nẹ obuko rẹ evrẹnushi rayen rhe rọ dia “arhọ ri bẹdẹ” yẹrẹ “ehwẹjẹ ri bẹdẹ.” Ọtiọyena, vwẹ oba rẹ ẹgbukpe 1,000 na, ihwo evo che vwo arhọ ri bẹdẹ, a me rha ghwọrọ i ri chekọ bẹdẹ.—Ẹvwọ. 20:15; 21:3, 4.
Roro kpahen udje nana. A sa reyọ ẹdia rẹ ẹko ri ihwo ivẹ nana hepha vwo dje erhorha re guọnọ ra dia ẹkuotọ ọfa. Evwata na pha kerẹ ihwo ra kẹre ivisa rẹ owian yẹrẹ ọ ra vwọ dia ẹkuotọ ọfa rọ cha nẹrhẹ e vughe ayen je kẹ ayen umuphẹ rẹ ugbomọphẹ. Vwọ fẹnẹ ọyena, ihwo ri jẹ evwata ẹdia na pha kerẹ erhorha ra kẹre ivisa rẹ ọmọke krẹn yẹrẹ ivisa ra vwọ nokpẹn rẹ ohwo. Erhorha ọtiọyena che djephia nẹ ayen ihwo ri fori tavwen a ke vwẹ uphẹn kẹ ayen nẹ ayen dia emotọ. Ọtiọyen ọ je hepha nẹ, ihwo ri jẹ evwata ẹdia na che ru nene irhi rẹ Jihova ji djephia nẹ ayen evwata tavwen ayen ke sa dia Iparadaisi. O toro oghẹre ri ivisa ra kẹ erhorha rẹ ayen vwo kpo ẹkuotọ ọfa ẹsosuọ-ọ, ukuotọ rọyen evo cha dia emotọ, a me rha djẹ evo kpo. Uruemu vẹ oborẹ ayen ghwoma wan vwẹ ẹkuotọ kpokpọ na yen che djephia sẹ ayen cha dia ẹkuotọ na yẹrẹ a cha djẹ ayen kpo. Vwẹ idjerhe vuọvo na, evun-ẹfuọn vẹ uruemu rẹ ihwo ra rhọvwọn nushi rhe na yen che djephia nẹ ayen cha dia akpọ kpokpọ na.
Jihova dia Ọghẹnẹ rọ re ehrọre ọvo-o, ẹkẹvuọvo jẹ Ọghẹnẹ rẹ orhiẹ-ebro abavo. (Urhi 32:4; Une 33:5) O che dje ẹguọnọ rọyen phia womarẹ ọ cha vwọ rhọvwọn evwata vẹ i ri jẹ evwata ẹdia. Ẹkẹvuọvo, o ji che rhẹro rọyen nẹ ihwo eje cha yan nene iwan rọyen ri shekpahen obo ri yoma vẹ obo re brare. Ihwo ri vwo ẹguọnọ rọyen ri ji yeren akpọ nene iwan rọyen, yen ọ cha vwẹ uphẹn kẹ nẹ e dia akpọ kpokpọ na bẹdẹ.