Enọ Rẹ Ihwo Ri Se Ẹbe Avwanre Nọre

Die yen Baibol na ta kpahen ive?

Ive mudiaphiyọ “ọrhọnvwephiyọ, obo ra ta phia kẹ ihwo nyo, yẹrẹ oborẹ ohwo ta phiyotọ nẹ ọyen che ru, vwẹ ọke buebun, a tobọ vwẹ Ọghẹnẹ . . . vwo ruẹ oseri.” Ọ sa dia ota ra ta phia yẹrẹ obo re si phiyotọ.

Ihwo evo se roro nẹ ọ chọre re vwo ve ive kidie Jesu tare nẹ “wo duvwu iyori-i . . . Ẹkẹvuọvo jẹ Ẹjo wẹn dia Ẹjo, ji E wẹn dia E: ọ da vrẹn enẹ kẹ efian.” (Mat. 5:33-37) Vwọrẹ uyota, Jesu riẹnre nẹ Urhi ri Mosis rhọnvwephiyọ eka rẹ iyorin eduvwo evo vwọ kẹ ihwo rẹ Izrẹl vwẹ ọke yena, idibo rẹ Ọghẹnẹ evo tobọ duvwun iyorin. (Jẹn. 14:22, 23; Eyan. 22:10, 11) Jesu je riẹn nẹ Jihova komobọ tobọ duvwun iyorin. (Hib. 6:13-17) Ọtiọyena, ọ dia Jesu tare nẹ ọ chọre re vwo duvwun iyorin yẹrẹ ve ive-e. Ukperẹ ọtiọyen, ọ vwẹ orhọ-esio vwọphia kpahen re vwo muẹ iyorin duvwẹn yẹrẹ re vwo muẹ ive ve. E jẹ a vwẹ ẹro ọghanghanre vwo ni eta rẹ avwanre ta. E jẹ e ru nene obo ra ta nẹ unu rhe ọkieje.

Die kọyen wo che ru siẹrẹ a da vuẹ wẹ nẹ wo duvwun iyorin yẹrẹ ve ive? Ẹsosuọ, jẹ o muwẹro nẹ wo se ru obo ru wo che ve ive rọyen na. O rhe muwẹro nẹ wo se ruo-o, o yovwin siẹrẹ wo de jẹ ive na e ve. Ota rẹ Ọghẹnẹ de si avwanre ọrhọ: “Ofori wo vwo jẹ ive eve nọ ru wo de ve nu wọ hwa rọ-ọ.” (Aghwo. 5:5) Wo de ru ọyena nu, gba fuẹrẹn odjekẹ ri Baibol sansan re ta ota kpahen iyorin eduvwo rere wo ru nene obo rẹ ẹwẹn obrorhiẹn wẹn ru wo yonori rhọnvwephiyọ kẹ wẹ. Erhọ yen odjekẹ ri Baibol evo re ta ota kpahen iyorin eduvwo yẹrẹ ive?

Iyorin evo re duvwẹn shephiyọ vẹ ọhọre rẹ Ọghẹnẹ. Kerẹ udje, Iseri ri Jihova ve ive vwọ kẹ ohwohwo vwẹ ọke rẹ orọnvwe rayen. Ive nana jẹ oka rẹ iyorin eduvwo ọvo. Ọshare vẹ aye re rọvwọn na ve kẹ ohwohwo vwẹ obaro rẹ Ọghẹnẹ vẹ ihwo rehẹ etiyin nẹ ayen che vwo ẹguọnọ kpahen ohwohwo, vwẹrote ohwohwo ji muọghọ kẹ ohwohwo vwẹ uche “ọke rẹ [ayen] ihwo ivẹ diarọ gron te vwẹ akpọ na.” (Ọ sa dianẹ ihwo efa ri ruẹ irueru rẹ orọnvwe ta eta nana kirobo re ghwe si ayen phiyọ etinẹ na-a, ẹkẹvuọvo ayen ji ve ive vwẹ obaro rẹ Ọghẹnẹ.) Ayen ihwivẹ na me rhe dia aye gbe ọshare, ko fori nẹ ayen dia kugbe vwẹ akpeyeren rayen eje. (Jẹn. 2:24; 1 Kọr. 7:39) Ive rẹ orọnvwe na omamọ rẹ ive dẹn, o ji shephiyọ vẹ ọhọre rẹ Ọghẹnẹ.

Ive evo vwọso Ọhọre rẹ Ọghẹnẹ. Onenikristi ruyota che ve ive rọ vwọ reyọ ekuakua rẹ ofovwin vwọ chochọn rẹ ẹkuotọ yẹrẹ vwọ sen esegbuyota ro vwo kpahen Ọghẹnẹ-ẹ. O de ru ọtiọyen jẹ ọ vwọso urhi rẹ Ọghẹnẹ. Kidie nẹ Inenikristi “dia e rẹ akpọ na-a na,” ayen rhe vwobọ vwẹ eta vẹ ifovwin rẹ ayen phiẹ-ẹ.—Jọn 15:19; Aiz. 2:4; Jems 1:27.

Ẹwẹn obrorhiẹn yen e nẹ vwo brorhiẹn rẹ ive evo. Ọkievo, ofori nẹ a vwẹ uchebro ri Jesu nana vwọ fuẹrẹn ive avwanre evo: “Vwẹ ẹkẹn ri Siza kẹ Siza, vwẹ ẹkẹn rẹ Ọghẹnẹ kẹ Ọghẹnẹ.”—Luk 20:25.

Kerẹ udje, Onenikristi ọvo guọnọ dia ọmuvwiẹ rẹ ẹkuotọ ọvo yẹrẹ ọ guọnọ vwo ẹbe ro se vwo kpo ẹkuotọ ọfa, ọ da rhe mrẹvughe nẹ tavwen obo rọ guọnọ na ki se te obọ, ko duvwun iyorin yẹrẹ ve ive nẹ ọyen cha vwomakpotọ vwọ kẹ ẹkuotọ yena. Ọ da dianẹ iyorin ro che duvwun na cha nẹrhẹ o ve nẹ ọyen che ru obo re vwọso urhi rẹ Ọghẹnẹ, ẹwẹn obrorhiẹn ra vwẹ Baibol yono cha rhọnvwephiyọ iyorin eduvwo tiọyena-a. Ẹkẹvuọvo ẹgba rẹ usuon rẹ ẹkuotọ na sa rhọnvwe kẹ nẹ ọ rhoma rhuẹrẹ eta rẹ iyorin yẹrẹ ive na phiyọ vwẹ idjerhe rẹ ẹwẹn obrorhiẹn rọyen da rhọnvwephiyọ.

E vwo duvwun iyorin ọtiọyen ra rhoma rhuẹrẹphiyọ na se shephiyọ vẹ uyono nana rọhẹ Rom 13:1, ẹkpo yena da ta: “E jẹn kohwo kohwo vwẹ oma kpotọ kẹ otu ra vwẹ ogangan rẹ isuesun kẹ.” Vwẹ ẹdia ọtiọyena, Onenikristi se brorhiẹn nẹ o shephiyọ ọyen vwo ve nẹ ọyen che ru oborẹ Ọghẹnẹ rhọnvwephiyọ nure nẹ e ru.

Wo ji che ru nene oborẹ ẹwẹn obrorhiẹn wẹn ra vwẹ Baibol yono rhọnvwephiyọ siẹrẹ a da vuẹ wẹn nẹ wọ reyọ orọnvwọn ọvo vwo duvwun iyorin yẹrẹ ru oghẹre rẹ oka vwẹ iyorin eduvwon na. Ihwo ri Rome kugbe Scythia rẹ ọke rẹ awanre reyọ ọlọkọ vwo duvwun iyorin, ọnana mudiaphiyọ nẹ ayen reyọ ọghẹnẹ rẹ ofovwin vwo se oseri rẹ iyorin na, ayen vwo imuẹro nẹ ọnana che mu ohwo na vwọ ta uyota ji ru obo ro duvwun iyorin rọyen na. Ihwo ri Greek ke rha kparobọ kpenu ọke rẹ ayen de duvwun iyorin. Ayen womarẹ ọnana vwo djephia nẹ ẹgba ọvo herọ vwẹ obodjuvwu ro nyo obo ra ta vẹ obo re ruẹ rọ je cha nọ ihworakpọ orhiẹn.

Vwọrẹ uyota, odibo ri Jihova cha reyọ ekuakua rẹ ẹkuotọ ri churobọ si ẹga rẹ efian vwo duvwun iyorin yẹrẹ ve ive-e. Kẹ, a da rha vuẹ wẹ vwẹ aguare nẹ wo mu obọ kpahen Baibol vwo duvwun iyorin nẹ wọ cha ta uyota vwo? Vwẹ ẹdia ọtiọyena, wo se brorhiẹn ru wo vwo ru ọtiọyen rọ vwọ dianẹ Baibol na vuẹ avwanre kpahen ihwo re fuevun re vwẹ oka ọvo yẹrẹ ọfa vwo duvwun iyorin. (Jẹn. 24:2, 3, 9; 47:29-31) Ọyen obo re ghanre ru wọ vwọ riẹn nẹ oka rẹ ive ọtiọyen ru wo veri na, wọ ta vwẹ obaro rẹ Ọghẹnẹ nẹ wọ cha ta uyota na. Ofori nẹ wo muegbe ru wọ vwọ ta uyota kpahen enọ eje ra cha nọ wẹn.

Kidie nẹ avwanre vwẹ ẹro ọghanghanre vwo nẹ oyerinkugbe rẹ avwanre vẹ Jihova, kẹ ofori nẹ a nabọ nẹrhovwo ji roro kpahen ive re ve rere e vwo imuẹro nẹ ive na cha vwọso ẹwẹn obrorhiẹn rẹ avwanre yẹrẹ odjekẹ ri Baibol na-a. Wo de brorhiẹn ru wo vwo ve ive, gbe jẹ o muwẹro nẹ wọ cha yanmu obo ru wo veri nẹ wo che ru na.—1 Pita 2:12.