Enọ Rẹ Ihwo Ri Se Ẹbe Avwanre Nọre

Amono yen elọkpa rẹ uwevwin rẹ ẹga rẹ ihwo ri Ju? Die yen owian rayen?

Usun rẹ iruo buebun rẹ ihwo rẹ orua ri Livae re dia irherẹ-ẹn ruẹ, yen ayen vwọ ga kerẹ elọkpa. Onotu rẹ uwevwin rẹ ẹga na yen suẹn ayen. Osiọbe ri Ju ọvo re se Philo djisẹ rẹ owian rẹ elọkpa na, rọ vwọ ta: “Evo usun rẹ ihwo ri [Livae] na rhẹrẹ anurhoro re uwevwin rẹ ẹga na, efa hẹ [evunrẹ uwevwin rẹ ẹga na] re rhẹrẹ anurhoro ra wan ro asan rọ ma fon na rere ohwo ro vwo uturhi rọ vwọ ruọ-ọ, vwo jẹ ẹruọ. Efa yan riariẹ uwevwin rẹ ẹga na, evo ason, efa kẹ rha oghẹruvo.”

Aguare ri Sahẹdrin na se jẹ elọkpa na uwevwin odedede. Elọkpa nana ọvo yen ihwo ri Rom rhọnvwe kẹ nẹ i muẹ ekuakua rẹ ofovwin.

Joachim Jeremias ro yono ẹbe kodo tare nẹ, “Eta ri Jesu tare vwẹ ọke re che vwo muo, nẹ kẹdẹ kẹdẹ yen ọyen vwo yono vwevunrẹ Uwevwin rẹ Ẹga na, jẹ e se mu ọye-en (Mat. 26:55), nẹrhẹ e vwo ẹruọ rọyen nẹ elọkpa rẹ Uwevwin rẹ Ẹga na yen rhere rhi muo.” Jeremias ji vwo imuẹro nẹ elọkpa rẹ uwevwin rẹ ẹga na yen ji rhe, rhi mu Jesu ọkiọvo rọ wanre. (Jọn 7:32, 45, 46) Ọke vwọ yanran, elọkpa vẹ ohwo ro suẹn ayen yen e jiri re mu idibo ri Jesu rhe aguare ri Sahẹdrin na, ọ họhọre nẹ elọkpa na yen ji kpono Pọl ro otafe rẹ uwevwin rẹ ẹga na.—Iruo 4:1-3; 5:17-27; 21:27-30.