Wọ Reyọ Uhworo ri Baibol na Vwo Ruiruo Vọnvọn?

Die yen uhworo ri Baibol na? Uhworo ri Baibol na, ọyen uhworo rẹ New World Translation ra rhoma si na. Ememerha yen e vwo siobọno vwẹ ephẹrẹ buebun nonẹna. Orọnvwọn ọvo kiriguo ra mrẹ vwẹ uhworo ri Baibol na yen upho sansan re vwo se ẹbẹre ọvuọvo ri Baibol na. A reyọ upho ra guọnọre vwo se eta na rere ovuẹ rẹ Baibol na sa vwọ vwomaphia gbagba.

Idjerhe vọ yen uhworo ri Baibol na vwo fierere kẹ ihwo? Ihwo buebun ri vwo omavwerhovwẹn rẹ ayen vwọ kerhọ kẹ uhworo ri Baibol na kẹdẹ kẹdẹ, rhe nabọ vwo ẹruọ rẹ Ota rẹ Ọghẹnẹ re. Ayen mrẹvughe nẹ ra vwọ kerhọ vwọ kẹ upho sansan re vwo se ẹbẹre ọvuọvo ri Baibol na, sa chọn ayen uko vwọ vwẹ ẹwẹn roro obo re phiare dẹn vwẹ Baibol na je nabọ vwo ẹruọ rẹ obo re siri na fiotọ. (Isẹ 4:5) Ihwo buebun ji noso nẹ, ra vwọ kerhọ kẹ uhworo ri Baibol na, nẹrhẹ ẹwẹn rayen totọ ọke rẹ ayen da ro ẹnwan.​—Un 94:19.

Enyo rẹ avwanre nyo Ota rẹ Ọghẹnẹ re se phia gorigori na, se ru ewene rode vwẹ akpeyeren rẹ avwanre. (2Ik 34:19-​21) Ọ da dianẹ uhworo ri Baibol na herọ vwẹ ephẹrẹ rẹ wọ jẹ, wọ sa rha kerhọ kẹ kọke kọke?

NI IVIDIO NA ERUO RẸ UHWORO RI BAIBOL NA​—ẸBẸRE RA REYỌ NORHE, RERE WỌ KPAHENPHIYỌ ONỌ NANA:

Die yen vwerhen owẹ oma kpahen eruo rẹ uhworo ri Baibol na?