Vwo Imuẹro nẹ E Che Sivwin Rhọ Vwẹ Oba rẹ Eyeren Nana

Ọmọke yen chekọ, odirin ri Jihova vwọ kẹ akpọ na ko che vwoba. A cha ghwọrọ ẹga rẹ efian, okugbe rẹ ẹgborho ke cha vwọso ihwo rẹ Ọghẹnẹ, Jihova kọ cha ghwọrọ irumwemwu eje no vwẹ ofovwin rẹ Amagidọn. Inenikristi rhẹro rẹ ọke rẹ erọnvwọn rẹ oghẹresan nana cha vwọ phia.

Vwọrẹ uyota, avwanre ghwa riẹn erọnvwọn eje kpahen ukpokpogho rode na-a. Kerẹ udje, avwanre ghwa riẹn ọke rọ cha vwọ tonphiyọ dẹ-ẹn. Avwanre riẹn obo ri che mu ihwo ri suẹn vwọ reyọ vwọso ẹga-a. A riẹn oborẹ ẹvwọsuọ rẹ ẹghorho na che gron te yẹrẹ obo ro che churobọ si-i. Avwanre je riẹn ona rẹ Jihova cha reyọ vwọ ghwọrọ irumwemwu na vwẹ Amagidọni-i.

Ẹkẹvuọvo, Isiesi Ọfuanfon na vuẹ avwanre erọnvwọn eje ro fori nẹ a riẹn, e se vwo fiudugberi hirharoku obo re cha vwẹ obaro na vẹ imuẹro. Kerẹ udje, avwanre riẹnre nẹ e yerẹn vwẹ okuphiyọ rẹ “oba rẹ ẹdẹ na” re. (2 Tim. 3:1) Avwanre riẹnre nẹ e che bru ẹvwọsuọ rẹ ẹga “krẹ” rere e vwo jẹ ẹga rẹ uyota ẹghwọrọ. (Mat. 24:22) A riẹnre nẹ Jihova che sivwin ihwo rọyen. (2 Pita 2:9) Avwanre je riẹn nẹ Ohwo rẹ Jihova sanere nẹ ọ ghwọrọ irumwemwu eje no ji sivwin otu gbidigbidi na wan Amagidọn, ọyen ohwo rẹ ọvwata ro ji vwo ẹgba mamọ.​—Ẹvwọ. 19:​11, 15, 16.

O muẹro nẹ ihwo ki che “sherua vẹ oshọ kugbe ẹnwan” fikirẹ erọnvwọn re cha phia vwẹ obaro na. Ẹkẹvuọvo, e de se ji roro kokodo kpahen oborẹ Jihova sivwin ihwo wan vwẹ ọke rẹ awanre kugbe erọnvwọn rọ vwọphia kpahen obaro na, avwanre ki se “ni enu . . . kpare iyovwi rẹ” avwanre vẹ imuẹro nẹ usivwin rẹ avwanre kẹrire.​—Luk 21:​26, 28.