Iruo rẹ Ọkobaro

Avwanre nabọ reyọ ẹgba rẹ avwanre vwo ruiruo siẹrẹ e de vwo obo ra vwọ tua vwẹ ẹga ri Jihova. (1 Kọr. 9:26) Obo ra vwọ tua chọn avwanre uko vwọ nabọ reyọ ọke rẹ avwanre vwo ruiruo vọnvọn vwẹ idjerhe rẹ abavo tavwen oba rẹ eyeren nana ki rhi te. (Ẹfe. 5:15, 16) Ovwan sa ta ota kpahen ẹkẹn rẹ ovwan se bru kẹ oma vwẹ ukpe rẹ ẹga kpokpọ rọ cha na vwẹ ẹga rẹ orua rẹ ovwan. Ọbe uyono nana vwo iyovwinreta re sa chọn ovwan uko vwọ mrẹ obo ra vwọ tua sansan ru ovwan se roro kpahen je nẹrhovwo kpahen.—Jems 1:5.

Kerẹ udje, ihwo rẹ orua na se vwo ru iroroẹjẹ sẹ ohwo ọvo vwẹ orua na sa ga kerẹ ọkobaro ọkieje? Wo de no nẹ wo che se ru inọke na gba-a fikirẹ ẹdia ru wọ hepha, gba ta ota kẹ ekobaro evo rẹ ẹdia rayen je họhọ ọ wẹn na. (Isẹ 15:22) Ọ da dia obo ru wo se ru, riẹnmie ọkobaro ọvo vwẹ ẹga rẹ orua rẹ ovwan. Si ọrhuẹrẹphiyotọ evo ru wọ sa yanmu phiyotọ. Ọ da dianẹ wọ gare kerẹ ọkobaro jovwore, gbe roro kpahen ẹdia rẹ wọ hepha enẹna sẹ wọ sa rhoma ga kerẹ ọkobaro.

Ihwo evo vwẹ orua wẹn sa ghwobọphiyotọ kerẹ ọkobaro ubrọke vwẹ emeranvwe ọvo yẹrẹ tobọ vrẹ ọtiọyen? Ọ da dianẹ wo ghwe vwo oganga-an, wọ sa ghwobọphiyotọ kerẹ ọkobaro ubrọke siẹrẹ wọ da sa ghwọrọ inọke evo kprẹn vwẹ iruo rẹ aghwoghwo na kẹdẹ kẹdẹ. Wọ rha ghwa sa mrẹ ọke vwẹ uvwre rẹ udughwrẹn na-a fikirẹ iruo wẹn yẹrẹ isikuru, wọ sa sane emeranvwe ọvo vwẹ ọke rẹ omaerovwon yẹrẹ emeranvwe ro vwo udughwrẹn iyorin. Si ọke rẹ wọ guọnọ vwọ ga kerẹ ọkobaro ubrọke phiyọ ikalẹnda wẹn wo ji si ọrhuẹrẹphiyotọ ru wo vwori phiyotọ. —Isẹ 21:5.

NI IVIDIO NA FIUDUGBERI, OVWAN . . . EKOBARO, RERE WỌ KPAHENPHIYỌ ONỌ NANA:

• Die yen udje rẹ Oniọvo Aamand yono avwanre kpahen oborẹ Jihova dje ẹguọnọ phia je vwẹrote ihwo re vwomakpahotọ ga kerẹ ọkobaro?