Amono Yen Igbeyan Wẹn Vwẹ Intanẹti?

A fan otọ rẹ ugbeyan phiyọ “oyerinkugbe rọhẹ uvwre rẹ ihwo ivẹ ri dje ẹguọnọ yẹrẹ ọghọ vwọ kẹ ohwohwo.” Kerẹ udje, Devid ghwe vwo hwe Golayat nu, ugbeyan rọyen vẹ ọ rẹ Jonatan da rhe ganphiyọ. (1 Sam. 18:1) Ayen ihwo ivẹ na dje iruemu re nẹrhẹ ayen vwo ẹguọnọ rẹ ohwohwo phiyọ. Ọtiọyena, igbeyan rẹ ihwo ivẹ sa vwọ tọn, ko fori nẹ a nabọ vughe ohwohwo. Ọ reyọ ọke vẹ ẹgbaẹdavwọn a vwọ nabọ riẹn ohwo. Ẹkẹvuọvo, ọ ghwọrọ ọke ihwo ki mu “igbeyan” vwẹ intanẹti-i. Kidie nẹ ihwo sa frẹkotọ roro kpahen oborẹ ayen cha ta vẹ ẹro e che vwo ni ayen vwẹ intanẹti, o rhe ji ihwo vughe oka rẹ ihwo ayen ghene hepha-a. Ọtiọyena, wo se ‘gberughwru’ vwọ kẹ oka rẹ ihwo wo se vwo mu igbeyan vwẹ intanẹti. Wo jẹ oshọ mu we nẹ wọ da sen oka rẹ igbeyan ọtiọyena ivun che miovwo aye-en. Fikirẹ imuoshọ rọ herọ, ihwo evo ghwa jẹ ojẹ nẹ ayen che mu igbeyan vwẹ intanẹti-i. Ẹkẹvuọvo, ọ da dianẹ wọ guọnọ reyọ intanẹti vwo ruiruo, die yen ofori nẹ wo niso?

NI IVIDIO NA VWẸ AGHWANRE VWỌ REYỌ SOSHA NẸTWỌK VWO RUIRUO, RERE WỌ KPAHENPHIYỌ ENỌ NANA:

• 

  Die yen ofori nẹ wo roro kpahen tavwen wo ki phi ovuẹ vẹ ifoto phiyọ intanẹti?

• 

  Diesorọ wọ vwọ jomaotọ mu igbeyan vwẹ intanẹti?

• 

  Diesorọ wo vwo vwo ọrhuẹrẹphiyotọ rẹ uchọke wọ ghwọrọ phiyọ intanẹti?—Ẹfe. 5:15, 16