Ru Ona rẹ Aghwoghwo Wẹn Yovwin Phiyọ​—Ton Ota Ro Se Rhie Idjerhe Wo Vwo Soseri Phiyọ

Jesu se ghwoghwo aghwoghwo rẹ kpregede kẹ aye rẹ Sameria na kidie ọ ton ota phiyọ vẹ aye na. Mavọ avwanre se vwo ru ona ra vwọ ton ota phiyọ vẹ erhorha yovwin phiyọ?

• Ta ota sasasa kẹ kohwo kohwo kerẹ ugbeyan. Dede nẹ oma ghwọrọ Jesu, jẹ ọ ton ota phiyọ rọ vwọ nokpẹn rẹ ame rọ cha da. Wọ sa vwẹ uyenren re sasasa vwọ ton ota phiyọ, wọ sa ta ota kpahen aruọke na yẹrẹ obo re phiare okrinọ na-a. Karophiyọ nẹ, ọdavwẹ wẹn rẹsosuọ ọyen wẹ vẹ ohwo na vwọ ta ota kugbe, ọtiọyena gba ta ota kpahen obo re sa vwerhen ohwo na oma. Ohwo na rha kpahen kẹ wẹ-ẹ, wo jẹ ọ da wẹ-ẹ. Davwen ohwo ọfa. Yare Jihova nẹ ọ kẹ wẹ uduefiogbere.​—Neh. 2:4; Iruo 4:29.

• Gbẹrophiyotọ vwọ kẹ uphẹn rẹ wọ vwọ ta ota kpahen iyẹnrẹn esiri na, ẹkẹvuọvo wo brokpakpa-a. Jẹ ikuegbe na dia ọ ro nẹ otọ ẹwẹn rhe. Siẹrẹ wọ da gba ohwo na ta ota, ofu se dje ọ me dobọ rẹ ikuegbe na ji. Wo jẹ ọ da wẹ, siẹrẹ wo rhe se ghwoghwo kẹ ohwo na tavwen ikuegbe na ki vwoba-a. Ọ da dianẹ oshọ ra vwọ ton aghwoghwo rẹ kpregede phiyọ mu we, gbe yono obo ra ton otaẹtakuẹgbe vẹ ihwo efa phiyọ, jẹ wo che ghwoghwota kẹ aye-en. [Hworo wọ je ta ota kpahen ividio 1.]

• Davwẹngba wọ vwọ gbẹn idjerhe kẹ aghwoghwo womarẹ omamọ rẹ ota ru wọ ta kpahen esegbuyota wẹn, ro che mu ohwo na vwọ nọ kpahen esegbuyota wẹn na. Jesu ta ota ro mu aye na vwọ nọ enọ. Ọke ro vwo wene ota na kpo aghwoghwo, enọ rẹ ayen na kọyen ọ kpahenphiyọ. [Hworo wọ je ta ota kpahen ividio 2, wo de ru ọyena nu, gbe hworo wọ je ta ota kpahen ividio 3.]