Ru Ona rẹ Aghwoghwo Wẹn Yovwin Phiyọ​—E Vwo Ruẹ Orhivwinbrura

OBORESORỌ Ọ VWỌ GHANRE: Buebun rẹ ihwo ri dje omavwerhovwẹn phia kpahen ovuẹ rẹ Uvie na guọnọ riẹn uyota kpahen Ọghẹnẹ. (Aiz. 55:6) Rere e se vwo yono ayen kpobarophiyọ, ofori e vwo rhivwin bru ayen ra nọke ra ruọke. Egbabọse sansan yen ihwo hirharokuẹ, ọtiọyena oborẹ avwanre che ru orhivwinbrura na wan cha fẹnẹ ohwohwo. Ẹkẹvuọvo orhivwinbrura na cha nabọ ghwotọ siẹrẹ avwanre de muegbe tavwen e ki bru ohwo na ra, vẹ ẹwẹn nẹ a cha ton uyono rẹ Baibol phiyọ.

OBO RE CHE RUO WAN:

• Fobọ rhivwin bru ohwo na ra.​—Mat. 13:19

• Ta ota kẹ kerẹ ugbeyan, wo mi ji muọghọ kẹ

• Tonphiyọ vẹ uyeren re sasasa. Vwẹ odẹ rọyen vwo se. Karophiyọ ohwo na oboresorọ wo vwo rhivwin rhe​—ọ sa dianẹ, wọ rhe kpahenphiyọ onọ ọvo, reyọ imagazini kpokpọ vwo rhe, dje wẹbsaiti avwanre kẹ, hworo ividio ọvo, yẹrẹ rudje obo re ruẹ uyono rẹ Baibol wan vwọ kẹ. Wene oborẹ wo muegbe rọyen jovwo siẹrẹ ohwo na de mu ota ọfa phiyotọ.​—Fil. 2:4

• Ku ame ku ubi rẹ uyota ru wọ kọn phiyọ ubiudu rẹ ohwo na womarẹ ẹkpo rẹ Baibol ru wo se kẹ yẹrẹ ibroshọ ru wọ vwọ kẹ. (1 Kọr. 3:6) Davwẹngba wẹ vẹ ọyen nabọ ru kugbe kerẹ igbeyan

• Gbẹn idjerhe phiyotọ wọ vwọ rhoma rhivwin