AKPEYEREN RẸ INENIKRISTI
Sẹro rẹ Uwan rẹ Jihova Kpahen Omamọ rẹ Uruemu
Jihova Ọghẹnẹ phi udje rẹ omamọ rẹ uruemu phiyotọ kẹ ihworakpọ. Kerẹ udje, ọ tare nẹ orọnvwe ọyen oyerinkugbe rẹ bẹdẹ uvwre rẹ ọshare vẹ aye. (Mat. 19:4-6, 9) O vwo utuoma kpahen koka koka rẹ ọfanrhiẹn. (1 Kọr. 6:9, 10) Ọ tobọ kẹ ihwo rọyen iyono ri shekpahen osẹnvwe vẹ irhuon rọ nẹrhẹ ayen fẹnẹ.—Urhi 22:5; 1 Tim. 2:9, 10.
Vwẹ akpọ na nonẹna, ihwo buebun rhọvwan nene irhi rẹ Jihova-a. (Rom 1:18-32) Ayen vwẹ uphẹn vwọ kẹ iroro rẹ akpọ na nẹ o djobọte osẹnvwe vẹ irhuon, kugbe iruemu rayen. Buebun reyọ orharhe rẹ iruemu vwọ shoma, ayen vwẹ ihwo ri vwo iwan rọ fẹnẹre vwo guẹdjọn.—1 Pita 4:3, 4.
Kerẹ Iseri rẹ Jihova, ofori nẹ avwanre fiudugberi sẹro rẹ iwan rẹ Jihova ri shekpahen omamọ uruemu. (Rom 12:9) Idjerhe vọ? Avwanre vwẹ aghwanre vwo dje obo ri je Jihova vwọ kẹ ihwo efa. Ẹkẹvuọvo ofori nẹ avwanre komobọ je sẹro rẹ iwan rẹ omamọ rẹ uruemu. Kerẹ udje, a da sane osẹnvwe kugbe irhuon, avwanre sa nọ: ‘Ojẹ mẹ dje uwan rẹ Jihova phia gbanẹ ọ rẹ akpọ na? Osẹnvwe kugbe irhuon mẹ dje vwe phia kerẹ Onenikristi rọ djoshọ rẹ Ọghẹnẹ?’ Yẹrẹ a da sane oka rẹ ughe re che ni, avwanre sa nọ: ‘Ughe nana cha vwerhen Jihova oma? Uwan rẹ ono yen o titẹ? Oka rẹ ughe ri mi nẹ sa nẹrhẹ uwan rẹ omamọ rẹ uruemu mẹ shekpotọ? (Une 101:3) Ọ sa dia ukprowọ kẹ ihwo rẹ orua yẹrẹ ihwo efa?’—1 Kọr. 10:31-33.
Diesorọ ọ vwọ dia obo re ghanre a vwọ sẹro rẹ uwan rẹ Jihova kpahen omamọ rẹ uruemu? Chekemerha Jesu Kristi cha ghwọrọ ẹgborho na kugbe irumwemwu na. (Izi. 9:4-7) Ihwo ri ru ọhọre rẹ Ọghẹnẹ ọvo yen che sivwin. (1 Jọn 2:15-17) Ọtiọyena, e jẹ avwanre titi iwan rẹ Jihova ri shepahen omamọ rẹ uruemu rere ihwo re mrẹ omamọ rẹ uruemu rẹ avwanre sa vwọ vwọ urinrin kẹ Ọghẹnẹ.—1 Pita 2:11, 12.
Die yen osẹnvwe kugbe irhuon mẹ ta kpahen uruemu mẹ?
NI IVIDIO RẸ DIA UGBEYAN RẸ JIHOVA—AYE ỌVO KUGBE ỌSHARE ỌVO, RERE WỌ FUẸRẸN ENỌ NANA:
Diesorọ ọ vwọ dia emu rẹ aghwanre re vwo yerin nene iwan rẹ Jihova?
Diesorọ o vwo fo nẹ emiọvwọn fobọ yono emọ rayen iwan rẹ Jihova ri shepahen omamọ rẹ uruemu?
Mavọ yen ighene kugbe ihwo re kpakore sa vwọ chọn ihwo uko vwọ mrẹ erere vwo nẹ oyoyovwin rẹ Ọghẹnẹ?