“Vwo Ẹguọnọ rẹ Iniọvo Ravwanre Rehẹ Akpọeje”

E si eta nana phiyotọ omarẹ ẹgbukpe 2000 re wanvrẹn re. (1 Pita 2:17) Dedena, ọke nana yen a ma vwọ guọnọ eta nana! Mavọ yen avwanre sevwo vwo ẹguọnọ rẹ iniọvo avwanre rehẹ akpọneje? Vwevunrẹ akpọ nana rẹ ẹguọnọ kanre na, mavọ yen avwanre sevwo dje ẹguọnọ phia ọkeneje? (Matiu 24:12) Ni ividio na Iniọvo Ravwanre Rehẹ Akpọeje. (Kpo jw.org, wo ni ẸBE VẸ ERỌNVWỌN EFA > IVIDIO.) Davwẹngba sẹ wọ sa kpahenphiyọ enọ nana.

(1) Ọke vọ yen avwanre rhe vwọ dia ẹbẹre ọvo rẹ orua rẹ iniọvo rehẹ akpọneje? (2) Erọnvwọn erha vọ yen avwanre vẹ iniọvo rẹ avwanre rehẹ akpọeje vwobọ phiyọ? (3) Idjerhe vọ yen iniọvo rẹ avwanre vwo dje owenvwe rẹ ayen vwo ghwoghwo phia (a) vwẹ aghwa rẹ Alaska, (b) unuerhuru ride rẹ Europe, kugbe (c) egbo ride ri Peru? (4) Diesorọ avwanre vwo je roro nẹ iruo rẹ aghwoghwo na fiemu-u? (5) Djunute idje rẹ oborẹ Iseri ri Jihova vwẹ ukẹcha phia, je bicha ohwohwo wan (a) ọke rẹ otọ vwọ bẹre nu, (b) odju ọgangan vwo dju nu, kugbe (c) ọke rẹ ofovwin? (6) Idjerhe vọ yen avwanre sevwo dje oka revwo vughe iniọvo rẹ avwanre rehẹ akpọeje phia? (Jọn 13:35) (7) Erere vọ yen herọ siẹrẹ avwanre da wian kuẹgbe bọn Eguan Ruvie rẹ avwanre? (8) Mavọ yen iniọvo rẹ avwanre rehẹ Eastern Europe kugbe Russia savwọ mrẹ eta rẹ Ọghẹnẹ yono uvwre rẹ ọke ravwọ dobọ rẹ owian rẹ avwanre ji? (9) Ẹgbaẹdavwọn rẹ oghẹresan vọ yen iniọvo rẹ avwanre djephia rere ayen sevwo kpo ọghwẹkoko, diesorọ? (10) Mavọ yen ividio nana bọn orhiẹn-ebro wẹn gan wan, wọ (a) vwọ vwomaba iniọvo wẹn ga Jihova vwẹ emẹvwa, (b) vwẹ ukẹcha phia vwẹ ọke rẹ ebẹnbẹn, vẹ (c) vwọ fuevun ghwoghwo vwẹ kasan kasan kugbe ọke rẹ uphẹn na de rhiephiyọ? (11) Idjerhe kugbe ọke vọ yen avwanre savwọ vwẹ ividio nana vwo ruiruo vwẹ aghwoghwo na?

Ẹguọnọ rẹ avwanre vwo kpahen Jihova ọyen sorọ avwanre vwọ dia ẹbẹre ọvo rẹ iniọvo rehẹ akpọeje. Kọyen sorọ avwanre vwo yono kpahọn, je vuẹ ihwo efa kpahọn. Avwanre ji vwo ẹguọnọ rẹ ihwo ri Jihova vwo ẹguọnọ kpahen. Siẹrẹ avwanre da chọn ayen uko vwẹ ọke rẹ ebẹnbẹn, avwanre rhẹro rẹ uyeren miẹ Jihova-a. Ukperẹ ọtiọyen, avwanre yen cha kpẹvwẹ Jihova, kidie ukoko nana rọ vwọ kẹ avwanre na ọyen okẹ rọ nẹrhẹ ubiudu rẹ avwanre ghọghọ. Vwẹ ẹdẹ re koba nana rẹ ẹguọnọ kanre na, e jẹ avwanre dje ẹguọnọ phia kẹ iniọvo rẹ avwanre rehẹ akpọeje!