Isese re Ru Phiyọ Uhworo—Obo ra Savwọ Vwẹ Ayen Ruiruo
1. Vwọ vrẹ ẹbe rẹ avwanre, orọnvwọn ọfa vọ yen avwanre vwori rọ sa dia erere kẹ avwanre?
1 Ihwo buebun mrẹ omavwerhovwẹn rẹ ayen vwo se eta rẹ uyota na rọ pha gbagba vwẹ jw.org. (Aghwo. 12:10) Ẹkẹvuọvo, wọ vwẹ isese re ru phiyọ uhworo na vwo ruiruo re? Ọnana nẹrhẹ a sa kerhọ rẹ evuẹ buebun vwevunrẹ wẹbsaiti rẹ avwanre. Mavọ yen isese re ru phiyọ uhworo sa vwọ dia erere kẹ avwanre?
2. Idjerhe vọ yen avwanre savwọ vwẹ isese re ru phiyọ uhworo vwo ruiruo vwẹ uyono omobọ yẹrẹ ẹga orua?
2 Vwọkẹ Uyono Omobọ Yẹrẹ Ẹga Orua: Ravwọ kerhọ rẹ ẹbe re ru phiyọ uhworo kerẹ Baibol, imagazini yẹrẹ ọbe ọfa siẹrẹ avwanre de kpo asan yẹrẹ vwevunrẹ irueru ri kẹdẹ kẹdẹ, sa vwẹ ukẹcha kẹ avwanre vwọ ghwọrọ ọke avwanre vwẹ idjerhe ro shephiyọ. (Ẹfe. 5:15, 16) Siẹrẹ avwanre da kerhọ rẹ isese re ru phiyọ uhworo, je vwẹ ẹro nene vwẹ ọbe avwanre, ọnana cha nẹrhẹ ẹga rẹ orua rẹ avwanre dia vẹ omavwerhovwẹn. Ravwọ vwẹ isese re ru phiyọ uhworo vwo ruiruo sa vwẹ ukẹcha kẹ avwanre siẹrẹ avwanre da guọnọ ru yovwin phiyọ vwẹ isese yẹrẹ e vwo yono ejajẹ ọfa.
3. Ihwo vọ vwẹ ekogho rẹ avwanre de ghwoghwo yen sa mrẹ erere vwo nẹ isese re ru phiyọ uhworo?
3 Vwọkẹ Aghwoghwo Na: Ihwo rehẹ ubrotọ rẹ avwanre de ghwoghwo re mrẹ ọke vwo se ẹbe-e, se vwo owenvwe rẹ ayen vwọ kerhọ rẹ uhworo tiọyena. Yẹrẹ avwanre sa mrẹ ihwo re jẹ ejajẹ efa re sa kerhọ rẹ ovuẹ rẹ Uvie na siẹrẹ ayen de nyo vwẹ “ephẹrẹ re de vwiẹ” ayen. (Iruo 2:6-8) Vwẹ asan evo, ravwọ kerhọ ọyen ẹbẹre ọvo rẹ ẹkuruemu rẹ ihwo na. Kerẹ udje, ugbunu yen ihwo ri Hmong vwo gbikun rẹ ikuegbe rayen vwọkẹ uvwiẹ rọvwọ kpahen ayen, ayen je sa nabọ karophiyọ ikuegbe tiọyen rẹ ayen nyori na. Osia vwerhen ihwo buebun vwẹ Africa oma.
4. Enọ vọ yen avwanre sa nọ oma rẹ avwanre kpahen a vwọ vwẹ ukẹcha kẹ ihwo vwẹ ekogho rẹ avwanre de ghwoghwo?
4 Vwẹ ekogho wo de ghwoghwo, erere se no rhe siẹrẹ e de hworo isese re ru phiyọ uhworo vwọkẹ ohwo rẹ avwanre ghwoghwota kẹ vwẹ ejajẹ rọyen? Ohwo je sa mrẹ erere siẹrẹ avwanre da vwẹ uhworo ọtiọyena vwọkẹ womarẹ i-mel? Avwanre sa danlodu rẹ uhworo ọtiọyena phiyọ CD rere a reyọ vẹ ẹbe na vwọkẹ ohwo re ghwoghwota kẹ ro dje omavwerhovwẹn phia? Avwanre da womarẹ ikọmputa yẹrẹ ifonu vwọ reyọ ọsoso rẹ ẹbe, ibroshọ, imagazini, yẹrẹ itrati vwọ kẹ ohwo re ghwoghwota kẹ, a sa nẹ iyẹnrẹn rọyen. E ru isese rẹ uhworo na rere ayen vwọ vwẹ ukẹcha kẹ avwanre vwẹ uyono omobọ, rere a je reyọ ayen vwọ kọn ibi rẹ uyota rẹ Uvie na.—1 Kọr. 3:6.