Ota rẹ Ọghẹnẹ Vwo Ẹgba Vwẹ Akpeyeren ri Kẹdẹ Kẹdẹ Wẹn?

Isese ri Baibol ri kẹdẹ kẹdẹ sa nẹrhẹ “esegbuyota” rẹ avwanre “ghwotọ kokoroko.” (Kọl. 2:​6, 7) Ẹkẹvuọvo, rere Ota ri Jihova sevwo vwo ẹgba vwẹ akpeyeren rẹ avwanre, ko fori nẹ avwanre nabọ roro kpahen iyono ri Baibol na vẹ oborẹ avwanre savwọ vwẹ ayen ruiruo. (Hib. 4:12; Jems 1:​22-25) Ọbe ri Joshua 1:8 djunute owọẹjẹ erha re sa nẹrhẹ ẹbe ese nabọ ghwotọ: (1) Se Ota rẹ Ọghẹnẹ “ason te uvo.” (2) Se vwẹ “umẹ,” ọnana mudiaphiyọ nẹ wo se vwẹ idjerhe rọ da nẹrhẹ owẹ roro kpahen obo ru wo se na, wọ je vwẹ ẹwẹn roro oborẹ ikuegbe na hepha. (3) Davwẹngba vwo ru “obo re si phihọ ejobi.” Siẹrẹ avwanre da vwẹ iroroẹjẹ nana vwo ruiruo, ọ cha nẹrhẹ idjerhe rẹ avwanre “yovwi,” ko ji “yovwi” kẹ avwanre vwẹ akpeyeren ri kẹdẹ kẹdẹ.