Oborẹ Avwanre Sevwo Te Ubiudu Ihwo rẹ Avwanre Yono
1. Ẹgba vọ yen uyono ri Jesu vwori vwẹ oma rẹ ihwo re kerhọ rọyen?
1 Eta ri Jesu Kristi te ubiudu rẹ ihwo re kerhọ rọyen. Vwẹ ọke ọvo rọ wanre, ubiudu rẹ idibo ri Jesu “kpokpo” ayen ọke rọ vwọ nabọ dje Baibol na fiotọ kẹ ayen nu. (Luk 24:32) Rọvwọ dianẹ udu na yen ẹmienyo rẹ Ọghẹnẹ nẹ cha na, mavọ yen avwanre savwọ kpare ẹwẹn rẹ ihwo rẹ avwanre yono na rere ayen sevwo wene idjerhe rẹ akpeyeren rayen?—Rom 6:17.
2. Mavọ yen ona vẹ oniso sa nẹrhẹ ota rẹ avwanre te ubiudu rẹ ohwo rẹ avwanre yono?
2 Vwẹ Ona vẹ Oniso Vwọ Wian: Vwọkẹ ihwo buebun, wọ de vwọ vuẹ ayen obo ri yovwirin vẹ obo ri miovwirin che ghwe se mu ayen vwo ru ewene-e. Vwọrẹ uyota, a vwọ reyọ vwọso ẹga rayen womarẹ ese rẹ ẹkpo ri Baibol buebun sa tobọ nẹrhẹ ayen djẹ kẹ uyono na. Rere a savwọ kpare oruru rẹ ohwo na, ẹsosuọ, ofori avwanre vwọ riẹn oboresorọ ohwo na vwo se uyono rọyen na gbuyota vẹ obo ri mu vwo yeren akpọ vwẹ idjerhe ro ruẹ na. Enọ ra nabọ sane, ra je vwẹ ona vwọ nọ sa nẹrhẹ ohwo na ta obo rehẹ evunrẹ ẹwẹn rọyen. (Isẹ 20:5) Ọke yena, avwanre ke sa sane ovuẹ vwo nẹ Ota rẹ Ọghẹnẹ rhe ro se djobọte ubiudu rọyen. Ọtiọyena, ofori avwanre vwo dje ọdavwẹ romobọ, vẹ edirin phia. (Isẹ 25:15) Karophiyọ nẹ ẹgba rẹ ohwo vuọvo vwọ yan obaro vwẹ uyono rẹ Ota Ọghẹnẹ dia abavo-o. Vwẹ uphẹn kẹ ẹwẹn ọfuanfon ri Jihova rere o djobọte iroro vẹ iruemu rayen.—Mak 4:26-29.
3. Mavọ yen avwanre savwọ vwẹ ukẹcha kẹ ihwo rẹ avwanre yono vwo vwo omamọ rẹ iruemu?
3 Chọn Ayen Uko Vwo Vwo Omamọ rẹ Iruemu: Ẹkpo ri Baibol na ri gbikun rẹ uyoyovwin vẹ ẹguọnọ ri Jihova sa vwẹ ukẹcha kẹ ihwo avwanre yono vwo vwo omamọ rẹ iruemu. Avwanre sa vwẹ ẹkpo ri Baibol kerẹ Une Rẹ Ejiro 139:1-4 yẹrẹ Luk 12:6, 7 vwo dje oborẹ ọdavwẹ rẹ Ọghẹnẹ vwo kpahen avwanre ohwo vuọvo gan te. Siẹrẹ ohwo na de vwo ẹwẹn rọ vwọ kpẹvwẹ Jihova fikirẹ ẹguọnọ ro jẹ rhẹrhiẹ rọyen, ẹmienyo vẹ ẹguọnọ rọyen vwọkẹ Ọghẹnẹ kọ ganphiyọ. (Rom. 5:6-8; 1 Jọn 4:19) Kpobarophiyọ, siẹrẹ ayen da riẹn nẹ uruemu rayen djobọte Jihova komobọ, ọnana se mu ayen vwo ru obo re cha ghwa ujiri vẹ ọghọ vwo rhe Jihova.—Une 78:40, 41; Isẹ 23:15.
4. Siẹrẹ avwanre de yono ohwo vwẹ aghwoghwo na, mavọ yen avwanre sevwo dje ọghọ kẹ egbomọphẹ rọyen rọ vwọ jẹ ojẹ?
4 Jihova gba ohwo vuọvo vwọ kerhọ rẹ iji rọye-en. Ukperẹ ọtiọyen, o te ubiudu rẹ ihwo na womarẹ ọ vwọ nẹrhẹ ayen riẹn aghwanre rọ herọ revwo nene uchebro rọyen. (Aiz. 48:17, 18) Siẹrẹ avwanre de yono ihwo vwẹ idjerhe rẹ ayen vwo se brorhiẹn komobọ, kọyen avwanre vwẹrokere Jihova. Ọke rẹ ohwo na de se vwo imuẹro nẹ ofori o vwo ru ewene evo vwẹ akpeyeren rọyen, erhuvwu ri bẹdẹ yin che no rhe. (Rom 12:2) Ọnana je vwẹ ukẹcha kẹ ayen vwo siẹkẹrẹ Jihova rọ “davwa udu rẹ ihwo nẹ” na.—Isẹ 17:3.