Revwo Ruẹ Ona rẹ Aghwoghwo Ravwanre Yovwẹn Phiyọ—Revwo Ghwoghwo Vwẹ Eki vẹ Asan re de Ruiruo

Oboresorọ Ọ Vwọ Ghanre: Rọvwọ dianẹ ihwo buebun ghwọrọ ọke grongron vwẹ iruo na, idjerhe ro me yovwin re sevwo ghwoghwo Uvie na kẹ ayen ọyen revwo kpẹ asan rẹ ayen de ruiruo. Aghwoghwo vwẹ eki yẹrẹ asan re de ruiruo sa dia vẹ omavwerhovwẹn, ọ je sa ghwa erere rhe kiridie a cha mrẹ ihwo na vwẹ etiyin, ayen je tota kẹ ihwo vẹ ọghọ kidie ayen roro nẹ ihwo re rhere na sa dia ineki rayen. A vwọ nabọ ruiruo na fiotọ, ofori ighwoghwota vwọ vwẹ ona vẹ oniso vwọ wian, ayen mi ji dje omamọ rẹ udje phia womarẹ irhuon vẹ osẹnvwe rayen. (2 Kọr. 6:⁠3) Ọtiọyena, oniruo rọvwẹrote iruo rẹga na gba vwẹrote ọrhuẹrẹphiyotọ na rere ọ vwọ riẹn ọke revwo kpẹ asan tiọyena vẹ ihwo re cha ra.

Obo re Che Ruo Wan:

Jẹ ota wẹn dia krẹn. A da ghwọrọ ọke gan nọ vwo ghwoghwo kẹ ohwo ro ruiruo, ọ sa nẹrhẹ ọ sen ọke ọfa.
Ọke rẹ iruo vwo doghobọ emerha yen wọ vwọ yanran, kerẹ ọke rẹ ayen ghwa vwọ tonphiyọ vwẹ irhiọke.
Ka tota kẹ ohwo rọ vwẹrote asan na. Tota kẹ kerẹ ugbeyan. Wọ sa ta, “Avwanre bru ihwo ra vwẹ asan rẹ ayen de ruiruo yẹrẹ chueki kiridie ọ bẹn ra vwọ mrẹ ayen vwẹ uwevwin.” Ghwoghwota kẹ kprẹn, wọ kẹ itrati, imagazini, yẹrẹ ẹbe ọfa. Wo djunute ọrhuẹrẹphiyotọ rẹ itetoro na-a, rere ayen vwo je roro nẹ avwanre ihwo re shẹ emu, jokpa nẹ ayen nọ kpahọn.
Ohwo rọ vwẹrote asan na de dje uruemu rẹ ugbeyan phia, nọ sẹ wo se ghwoghwota kẹ ihwo efa ri ruiruo vwẹ etiyin. Vwẹ asan re de ruiruo evo, ọ che yovwin siẹrẹ wọ da nọ sẹ wọ sa yanjẹ ẹbe evo vwo vwẹ asan rẹ ewiowian na da sa mrẹ ayen se ẹsiẹfa.
Vwẹ aghwanre vwo ruiruo, wọ me je dia ohwo rọ nuẹ. Kerẹ udje, ohwo ro ruiruo na da tota kẹ ọneki, mudia ọ vẹ ọneki na tota nu tavwen wo ki bro ra.

Davwen Iroroẹjẹ Nana Vwẹ Emeranvwe Na:

Vwẹ Ẹga Orua wẹn rọ cha na, ru udje krẹn rẹ obo wọ sa ta siẹrẹ wo de che ghwoghwo vwẹ eki yẹrẹ asan re de ruiruo.