Revwo Ruẹ Ona rẹ Aghwoghwo Ravwanre Yovwẹn Phiyọ​—⁠Revwo Yono Ihwo Kpokpọ

Oboresorọ Ọ Vwọ Ghanre: Idibo ri Jesu kpokpọ che yono oborẹ ayen vwo ru “imu na ejobi” ri Jesu tare nẹ e ru, ro churobọ si revwo yono ihwoefa uyota na. (Mat. 28:​19, 20) Buebun rẹ ihwo kpokpọ nana muwan rẹ ayen vwo vwobọ vwẹ Isikuru rẹ Iruo Ruvie Na, ọkiọvo ayen ji ghwoghwota kẹ igbeyan vẹ ihwo rẹ orua rayen re. Ẹkẹvuọvo, rẹ ọdavwaro rẹ oborẹ ayen yono vwọ ganphiyọ na, ayen je vwọ riẹn nẹ Jihova guọnọre nẹ ihwo nyo iyẹnrẹn esiri na, kọ sa nẹrhẹ ayen dje owenvwe phia rẹ ayen vwo vwobọ vwẹ iruo rẹ aghwoghwo na. (Rom 10:​13, 14) Siẹrẹ a da rhọvwen kẹ ihwo kpokpọ na nẹ ayen dia ighwoghwota re ji rhi bruphiyame-e, omamọ rẹ uyono cha chọn ayen uko vwo fiudugberi vwẹ owọẹjẹ nana rọ cha nẹrhẹ ayen yan obaro vwẹ iruo rẹ ẹga rayen.​​—⁠Luk 6:​40.