Yono Mie Ighwoghwota ri Tẹn Ona
Avwanre vwẹ ẹro ọghanghanre vwo nẹ ighwoghwota ri tẹn ona rẹ aghwoghwo rehẹ ukoko na. Evo ga Jihova ẹgbukpe buebun re. O ji rhi kri rẹ efa vwọ tẹn ona rẹ aghwoghwo na-a. Ighwoghwota nana rhe riẹn oborẹ Jesu sun ukoko na wan vwẹ ẹdẹ re koba na, rọ nẹrhẹ iruo rẹ aghwoghwo na hẹrẹ phiyọ. (Mat. 28:19, 20) Fikiridie nẹ ayen vwobọ vwẹ aghwoghwo na, ayen ki rhi vwo “ọrho rọ basa-an [ẹgba, rọ vrẹ ẹgba, NW ],” rọ chọn ayen uko vwo hirharokuẹ egbabọse vẹ edavwini sansan. (2 Kọr. 4:7) O vwo erọnvwọn buebun rẹ avwanre se yono mie ighwoghwota nana. Siẹrẹ uphen na de rhiephiyọ, ayen yono ihwoefa oborẹ ayen riẹnre vẹ omavwerhovwẹn. (Une. 71:18) Ọtiọyena, avwanre guọnọ uphẹn revwo yono mie ayen. Mavọ e se vwo ru ọnana?
Vwẹ Aghwoghwo Na. Ighwoghwota kpokpọ vẹ iniọvo re ghwa riẹn ona rẹ ota eghwoghwo-o sa vwọ tẹn ona rẹ aghwoghwo na, ko fori nẹ e yono ayen. E se yono erọnvwọn buebun siẹrẹ avwanre de ni oborẹ ayen ghwoghwo ota wan. (Ni Watchtower rẹ February 15, 2015, ro vwo uyovwinrota na “Maintain Your Zeal for the Ministry,” ẹkoreta rẹ erha vwẹ obotọ rẹ uyovwinrota otete rọ tare nẹ, “Help Less Experienced Ones.”) Erere vọ yen te we obọ ọke wo vwo nene ighwoghwota nana wian?
Wo se durhie oghwoghwota tiọyẹna nẹ wẹ vẹ ọyen wian kugbe vwẹ aghwoghwo na? Ọ da dianẹ oma rẹ oghwoghwota na gan te-e, wo se yono ohwo ọvo vwẹ uwevwin rọyen nẹ ọke ra ruọke. Wo de ru uyono na nu, jẹ oghwoghwota na vuẹ wẹ oborẹ o niso.
Wẹ vẹ Ayen Ghwọrọ Ọke Kugbe: Ghwọrọ ọke vẹ ighwoghwota nana, wo se vwo vughe ayen. Durhie ọvo usun rẹ ayen rhe ẹga orua wẹn, wọ riẹnmie. Oma rọyen rha gan te-e, wo se ru ẹga orua wẹn vwẹ uwevwin rọyen? Nọ, obo rọ sa vwọ mrẹ ukoko na vughe. Ebruphiyọ vọ yen ọ mrẹre? Eyan obaro vọ yen ọ mrẹre vwẹ ekogho rọ dia na? Aghọghọ vọ yen te re obọ vwẹ ẹga ri Jihova?
Vwo oniso nẹ o vwo asan rẹ ayen riẹn te. Ighwoghwota nana re ga krẹ re na vwo okẹ sansan, kerẹ avwanre. (Rom. 12:6-8) Evo kpakore, ọnana kọ nẹrhẹ ọke rẹ ayen nene avwanre ghwọrọ kuẹgbe shekpotọ. Dede na, avwanre ji se yono erọnvwọn buebun mie ayen fikirẹ oborẹ ayen rhiẹromrẹ vwẹ ẹga ri Jihova.