Dia Oghwoghwota rọ Yan Obaro
1. Idje vọ vwẹ omarẹ ẹgbukpe 2000 re wanre na yin djerephia nẹ ofori avwanre vwọ dia ighwoghwota re yan obaro?
1 Ofori nẹ Inene-ri-Kristi dia ighwoghwota re yan obaro. Ọyen sorọ Jesu vwọ kẹ idibo rọyen uyono rọ cha chọn ayen uko vwo ru ona aghwoghwo rayen yovwin phiyọ. (Luk 9:1-5; 10:1-11) Ọyen je suọ Prisila vẹ Akuila vwọ reyọ Apolọs vwọba oma, “ayen de rhie idjerhe rẹ Ọghẹnẹ na kẹ gbagba.” (Iruo 18:24-26) Iroro vuọvo yena yen nẹrhẹ Pọl phiuduphiyawọ rẹ Timoti nẹ o ruẹ ona rẹ uyono rọyen yovwin phiyọ, rere “ihwo vwọ mrẹ” obaro-ẹra rọyen. (1 Tim. 4:13-15) Ọ da tobọ dianẹ avwanre gbe odibo kẹ Ọrovwori na kerẹ ighwoghwota rẹ iyẹnrẹn esiri na krẹ re, o ji fo nẹ avwanre ruẹ ona aghwoghwo avwanre yovwin phiyọ.
2. Mavọ yen avwanre se vwo yono mie ihwoefa?
2 Yono Mie Ihwoefa: Idjerhe ọvo avwanre se vwo ru ona aghwoghwo rẹ avwanre yovwin phiyọ, ọyen e vwo yono mie ihwoefa. (Isẹ 27:17) Ọtiọyena, gba nabọ kerhọ ọke rẹ oniọvo ọfa de ghwoghwo. Vuẹ ighwoghwota re ton ona rẹ aghwoghwo na nẹ ayen vwẹ iroroẹjẹ re sa chọnwuko vwọkẹ wẹ. (Isẹ 1:5) Wo vwo ebẹnbẹn wo vwo orhivwinbrura, ohwo ru wọ vwẹ Baibol yono, yẹrẹ wo vwo vwobọ vwẹ oka rẹ aghwoghwo ọfa? Vuẹ ọkpako rọ vwẹrote ẹko rẹ iruo rẹ ada wẹn yẹrẹ oghwoghwota ọfa nẹ o yono uwe. Karophiyọ nẹ ẹwẹn ọfuanfon ri Jihova sa nẹrhẹ wo ru yovwin phiyọ. Ọtiọyena, gba yare ukẹcha rọyen ọkieje—Luk 11:13.
3. Die yen avwanre ru siẹrẹ a da kẹ avwanre uchebro, ọ da tobọ dianẹ o diẹ avwanre yen nokpẹn rọye-en?
3 Ohwo da kẹ wẹ uchebro rọ sa nẹrhẹ owẹ yan obaro, wo jẹ ophu mwu we-e, ọ da tobọ dianẹ ọ dia owẹ yen nokpẹn rọye-en. (Aghwo. 7:9) Kerẹ Apolọs, rhiabọreyọ ukẹcha na vẹ omaevwokpotọ kugbe ọdavwaro. Ọyen emu aghwanre wo de ru ọtiọyen.—Isẹ 12:15.
4. Die yen nẹrhẹ Jesu tanẹ avwanre dia ighwoghwota re yan obaro?
4 Ẹyan-obaro Ghwa Urinrin Brẹ Ọghẹnẹ Ra: Jesu reyọ udje vwo phiudu phiyọ idibo rọyen awọ nẹ ayen dia ighwoghwota re yan obaro. Jesu reyọ oma rọyen vwo dje urhe ri vain, idibo rọyen ra jẹreyọ na ke rha eghọn. Ọ tare nẹ Ọsẹ rọyen rhuẹrẹ koghọn koghọn phiyọ “rere ọ vwọ mọ ibi buebun.” (Jọn 15:2) Kirobo ohwo ro vwo vain guọnọre nẹ eghọn rẹ urhe na nabọ mọ omamọ rẹ ibi, ọtiọyen Jihova je guọnọ nẹ avwanre rho phiyọ vwọrẹ ‘omamọ rẹ ẹbẹrunu rẹ avwanre’ vwo jiro. (Hib. 13:15) Erere vọ yin che norhe siẹrẹ avwanre da dia ighwoghwota re yan obaro? Jesu vuẹ avwanre: “Vwẹ oma rẹ ọnana kọyen a vwọ vwẹ urinrin kẹ Ọsẹ mẹ rere ovwan vwọ mọ ibi buebun.”—Jọn 15:8.