Iyẹnrẹn rẹ Iruo rẹ Aghwoghwo Na
Dede nẹ Iseri ri Jihova vwo ewian rẹ ayen ruẹ, jẹ buebun rayen rhuẹrẹ ọke phiyọ uvwre rẹ August fiẹ November, rere ayen vwo kpẹ asan rẹ obọ fobọ te-e de re ghwoghwota. Oniọvo aye ọvo rọ reyọ ọke omaerovwon rọyen vwo kpẹ asan ọtiọyen de re ghwoghwo da ta: “Usun rẹ ọke omaerovwon ri mi vwo re, ọnana yen ma vwerhovwẹ oma. Me nama ghwọrọ ọke na kufia-a.” Ọke buebun yẹn avwanre vwọ mrẹ ihwo re guọnọ yono uyota na, re je guọnọ yeren akpọ rẹ ọvwata. Ena evo usun rẹ iyẹnrẹn rẹ obo re rhiẹromrẹ:
• Ighwoghwota ri te 25 vwẹ Ogun State kpẹ egbada-ẹdjẹ vwẹ asan rẹ obọ fobọ te-e vwẹ Kogi State. Ayen da nẹ iyẹnrẹn nana: “Ihwo ri te 98 yen rhiẹ uyono rhe kerhọ rẹ Ota Rotu avwanre ruru vwẹ ọko ọvo re se Ejuku. Ota na vwo re nu, e de ghwoghwo nẹ ihwo re guọnọre nẹ e yono ayen Baibol domaji. Ọ vwerhoma mamọ a vwọ mrẹ ihwo 28 ri vwo edirin hẹrhẹ te ọke re vwo si edẹ, asan rẹ ayen dia kugbe ukeri ifonu rayen phiyotọ nu tavwen ayen ki kpo.”
• Ikuegbe rọhẹ obotọ na dje oborẹ uyota ri Baibol na djobọte ihwo evo wan: Ọke iniọvo ivẹ vwọ reyọ Baibol yono ọmọshare ọvo vwẹ otafe, ayen da mrẹ eya ivẹ re họnra fikirẹ igho, jẹ ọvo usun rẹ eya na vẹ evun. Ẹgbaẹdavwọn ihwo vwọ hẹrhiẹ ayen shefia. Ọ rọ mrẹ evun na da ka yanran ọmọke krẹn, ọke rọ vwọ rhoma yanra ra họnre, iniọvo na de bro ra. Ayen da vuẹ kpahen omaẹwan rẹ ohọnre na sa so kẹ vẹ ọmo rọhẹ evun na. Ayen je vwẹ ukẹcha kẹ vwọ mrẹ ẹro ri Jihova vwo nẹ arhọ rẹ ọmọ rọhẹ evun. (Eyan. 21:22-25) Ukpe ro vwo ru obo ophu vwo mu Jihova, aye vẹ evun na da kpairoro vrẹ igho rẹ aye ro chekọ na riosa rọyen. Ọ da rhọnvwe phiyọ uyono ri Baibol.
Vwẹ ukpe rẹ ẹga ri 2013, iniọvo rhi te 3,415 rehẹ evunrẹ ẹko re te 244 yin vwobọ vwẹ egbada-ẹdjẹ na. Wọ sa rhuẹrẹ ọke wẹn rere wo se vwobọ vwẹ egbada-ẹdjẹ ọtiọna ọkiọfa?—Une 110:3.