Ine Kpokpọ rẹ Ẹga!
1 Vwevunrẹ omẹvwa rẹ kukpe kukpe ri Watch Tower Bible and Tract Society of Pennsylvania re ruru vwẹ October 4, 2014, e de ghwoghwo ọrhuẹrẹphiyotọ revwo wene ọbe une avwanre vwori enẹna. Aghwoghwo nana vwerhoma mamọ! A karophiyọ ihwo ejobi re rhe omẹvwa na kpahen obo rẹ ine Uvie rẹ avwanre vwọ ga ẹga ghanre te.—Une 96:2.
2 Wọ sa nọ, ‘Diesorọ e vwo wene ọbe une na?’ O vwo erọnvwọn evo re sorọ. Ẹsosuọ, ẹruọ rẹ avwanre vwori kpahen Baibol na kpobaro phiyọ, ọnana se djobọte eta rẹ ine rẹ avwanre. (Isẹ 4:18) Ọrọnvwọn ọfa rọ nẹrhẹ e wene ọbe une na: A reyọ eta buebun rehẹ evunrẹ ọbe une rọherọ enẹna vwo nẹ New World Translation rẹ awanre na rhe. Ọtiọyena, ko fori a rhoma rhuẹrẹ eta rẹ ine na phiyọ rere ayen shephiyọ eta ri Baibol kpokpọ na. Rọvwọ dianẹ owian revwo wene eta rẹ ọbe une na pha gangan na, ka rhọvwenre nẹ a vwẹ ine kpokpọ vwọba ine reherọ jovwo na.
3 Kẹ avwanre cha hẹrhẹ ọke ravwọ teyen ọbe une kpokpọ na tavwen a ke so ine kpokpọ na? Ẹjo. Oma vwerhen avwanre e vwo jẹ ovwan riẹn nẹ emeranvwe re cha na, e che siobọnu ine kpokpọ na vwẹ Wẹb saiti rẹ avwanre jw.org. Siẹrẹ e de siobọnu une kpokpọ, a cha reyọ vwo ku ọrhuẹrẹphiyotọ rẹ Omẹvwa Rẹga Na phiyọ, ẹkẹvuọvo a cha joka phiyọ nẹ “une kpokpọ.”
4 Obo re Sevwo Yono Ine Kpokpọ Na: Ọ bẹn re sevwo yono une kpokpọ. Dede na, kerẹ ọbuine na, avwanre guọnọ so une vwẹ emẹvwa avwanre rere e vwo “je fotovwi gbiẹn.” (Une 30:12) Rere wo se vwo yono une kpokpọ, nene owọẹjẹ nana.
Kerhọ kẹ une rẹ uhworo-ọvo abọ buebun. E che phi ayen phiyọ Wẹb saiti rẹ avwanre. Siẹrẹ wo de hworo ine na ọkieje, kọ nẹrhẹ wọ karophiyọ ayen.
Yono eta rẹ ine na, wọ davwẹngba vwọ riẹn ayen kuyovwin.
So une na nene ọ rẹ uhworo-ọvo na. Ru ọtiọyen ọkieje bẹsiẹ wọ vwọ nabọ riẹn obo ra so ine na.
Vwanriẹn une na vwẹ Ẹga Rorua wẹn bẹsiẹ ihwo ejobi vwọ riẹn une na.
5 Vwẹ emeravwen re cha obaro na, ọ da dianẹ une kpokpọ ọyen e che vwo ku Ọmẹvwa Rẹga Na phiyọ, ukoko na cha kerhọ rẹ ọ rẹ uhworo-ọvo tavwen. E de hworo nu, ihwo ejobi ke cha suọ nene ọ rẹ uhworo-ọvo na, kirobọ re ruẹ vwẹ ine ri chekọ.
6 Ravwọ so une vwẹ emẹvwa rẹ avwanre kẹ avwanre aghọghọ, kiridie ine na nẹrhẹ avwanre ku unu kuẹgbe jiri Jihova. Ọtiọyena, e rhe vrẹn nẹ asan avwanre chidia siẹrẹ a da cha so une vwẹ emẹvwa rẹ avwanre-e.
7 O vwo idjerhe ọfa rẹ avwanre sevwo dje idavwaro kẹ ine rẹ ẹga avwanre. Vwẹ isikoko vẹ eghwẹkoko, e hworo uhworo rẹ ọmọke krẹn tavwen echidiotọ ọvuọvo ke tuanphiyọ. Abọ ivẹ vwẹ ẹgbukpe ọyẹn iniọvo ri nẹ asan sansan vwẹ akpọ na rhe, vwo kpẹ Patterson, New York, rere ayen vwo ru ine kpokpọ vwọkẹ ẹga avwanre, iniọvo nana yen hwosa rẹ ofan rayen komobọ. Kọyen sorọ, ochidiagbara na da vuẹ avwanre nẹ avwanre chidia rere a kerhọ kẹ uhworo rẹ ibuine na muegbe rọyen kẹ avwanre, e jẹ avwanre ru ọtiọyen. Uhworo na cha vwẹ ukẹcha kẹ avwanre vwo muegbe rẹ ubiudu avwanre vwọkẹ eta re che nyo na.—Ẹzra 7:10.
8 Avwanre cha vwẹ une ọkpokpọ vwo ku uyono ri nonẹna na phiyọ, ro vwo uyovwinrota: “Uvie na Suẹn Re—E jẹ Ọ Rhe!” Une nana ra soro vwẹ omẹvwa rẹ kukpe kukpe ri Watch Tower na, e ruro rere a reyọ vwọ joka phiyọ usuon rẹ Uvie na ro te ẹgbukpe 100 re.
9 Ine kpokpọ na “emu esiri” ri nẹ obọ ri Jihova rhe. (Mat. 12:35a) E jẹ avwanre brorhiẹn re vwo yono ine kpokpọ na rere avwanre so ine na vẹ ẹwẹn avwanre eje. Siẹrẹ e de ru ọtiọyen, jẹ avwanre vwẹ ujiri vẹ ọghọ vwọ kẹ Ọghẹnẹ rẹ avwanre!—Une 147:1.