Isikuru rẹ Iruo Ruvie Na ri 2015 Vwẹ Ukẹcha kẹ Avwanre Vwọ Ruẹ Yovwẹn Phiyọ Vwẹ Uyono Avwanre
1 Ọbuine Devid siri: “Gbe jẹ eta rẹ unu mẹ kugbe umẹ rẹ udu mẹ, i fo ẹreyọ vwẹ obaro wẹn E Ọrovwohwo, oragha mẹ kugbe Ọ rọ tan vwẹ hirhe.” (Une 19:14) Avwanre je guọnọ nẹ eta avwanre vwerhe Jihova oma, fikiridie avwanre reyọ uphẹn avwanre vwọ ta uyota na vwevunrẹ ukoko na vẹ aghwoghwo na ghanghanre. Isikuru rẹ Iruo Ruvie Na ọyen idjerhe ọvo rẹ Jihova vwo yono avwanre vwọkẹ aghwoghwo na. E ruẹ uyono nana vwẹ kudughwrẹn kudughwrẹn vwevunrẹ ikoko ri vrẹ 111,000 vwẹ akpọeje. Uyono nana vwẹ ukẹcha vwọkẹ iniọvo vwẹ akpọeje vwọ dia ighwoghwota rẹ iyẹnrẹn esiri na ri muwan, ayen ki se yono vẹ imuẹro, ona kugbe uduefiogbere.—Iruo 19:8; Kọl. 4:6.
2 Vwevunrẹ ọrhuẹrẹphiyotọ rẹ isikuru na vwẹ 2015, a cha mrẹ iyovwinreta ra tota kpahen vwẹ “Obo re se Yono nẹ Baibol na Rhe” vẹ “Glossary of Bible Terms,” rehẹ evunrẹ New World Translation, kugbe iyovwinreta efa rehẹ Insight on the Scriptures, Volume 1. Vwọba, e wene ọke ra rhuẹrẹphiyọ kẹ ẹfuẹrẹn rẹ Isese ri Baibol na vẹ Ota 1. A tota kpahen ewene nana vẹ odjekẹ kpahen obo re che ru ẹbẹre sansan rẹ isikuru na wan vwevunrẹ ẹkoreta rehẹ obotọ na.
3 Ẹfuẹrẹn rẹ Isese ri Baibol Na: Iniọvo ri vwo ẹbẹre nana cha vwẹ ibrẹro ivẹ vwọ tota kpahen ẹkpo ọvo rọ vwerhoma, re ji se vwo ruiruo vwo nẹ isese ri Baibol rẹ udughwrẹn na rhe. Siẹrẹ oniọvo na da nabọ muegbe, kọ sa reyọ ẹkpo ọvo rọ cha dia erere kẹ ukoko na vwọ phia vwẹ ọke ra rhuẹrẹphiyọ na. Ọyena da wan nu, iniọvo na ke cha vwẹ ibrẹro esan vwo djunute obo rẹ ayen yono vwo nẹ isese ri Baibol rẹ udughwrẹn na rhe kirobo re ruo jovwo, oniọvo vuọvo vwo ẹroebro 30 kpotọ ro vwo djunute obo ro yonori. Ọ guọnọ egbemuo vẹ oma-esuon wọ ke sa vwẹ omamọ rẹ ẹkpahọnphiyọ vwọ phia vwẹ ẹroebro 30, ẹkẹvuọvo, ọyena omamọ rẹ eyono kẹ avwanre. Ọnana cha kẹ ihwoefa uphẹn rere ayen sa vwọ tota kpahen obo rẹ ayen yonori vwẹ ehiahiẹ rayen.
4 Ota 1: A rhoma si ọke ra rhuẹrẹphiyọ kẹ isese ri Baibol na kpẹ ibrẹro erha kpotọ, ọnana cha nẹrhẹ a sa re che se rhoma hanvwe phiyọ. Iniọvo ra vwẹ ota 1 vwọkẹ vwanriẹn ru abọ buebun, ji se phia, ayen se ibieta na gba rere otu na se vwo vwẹ ẹruo rẹ isese na. A guọnọre nẹ idibo ri Jihova eje nabọ riẹn obo re se, kiridie a vwọ riẹn obo re se ọyen obo re ghanre vwẹ ẹga rẹ avwanre. Ọvwerhoma nẹ emọ avwanre buebun nabọ riẹn obo re se! A kpevwẹ emiọvwọn fikirẹ ẹgbaẹdavwọn kugbe ukẹcha rẹ ayen vwọkẹ emọ rayen vwọ nabọ riẹn obo re se.
5 Ota 2: Ọnana ota rẹ ibrẹro iyorin rẹ oniọvo aye cha ta. Uyovwinrota ra vwọkẹ na yen ọ cha tota kpahen. Siẹrẹ a da reyọ ota na vwo nẹ New World Translation rhe, e jẹ oniọvo na ruo nene obo re ruẹ aghwoghwo sansan vwẹ ekogho na. Ọ da ra dianẹ ota na shekpahen ohwo ọvo vwevunrẹ Baibol na, ra tota kpahen vwẹ Insight on the Scriptures, Volume 1, oniọvo ro vwo ota na gbe muegbe rẹ asan rọ tota kpahen odẹ rẹ ohwo na, sane ẹkpo ri Baibol ri fori, ọ je tota kpahen obo rẹ avwanre se yono vwo nẹ ohwo yena re djunute vwevunrẹ Baibol na. Wo ji se se ẹkpo ri Baibol efa ri churobọ si uyovwinrota na. Oniọvo rọ vwẹrote isikuru na cha vuẹ oniọvo ọfa nẹ ọ vwẹ ukẹcha kẹ ọyen.
6 Ota 3: Ọnana ota rẹ ibrẹro iyorin ra cha vwọ kẹ oniọvo rẹ ọshare yẹrẹ aye. Ọ da dia oniọvo aye, o che ruo kerẹ obo re ruẹ Ota 2. Ọ da rha dia ọshare, yen cha tota ro nẹ ọbe rẹ Insight rhe, ko rhe mudia umukpe tota na vẹ ọdavwẹ rẹ ukoko na vwẹ ẹwẹn. E jẹ oniọvo na muegbe rẹ uyovwinrota ra vwọ kẹ na, ọ me je sane ẹdia ri Baibol ro shephiyọ, ji dje obo re se yono nẹ udje rẹ ohwo ri Baibol na tota kpahen.
7 Ọrọnvwọn Ọkpokpọ Vwẹ Ota 3 Vwọkẹ Iniọvo Eshare: Ota na de nẹ New World Translation rhe, e jẹ ọ vwẹ ota na phia womarẹ udje rẹ ẹga orua yẹrẹ aghwoghwo. Oniruo isikuru na yen cha kẹ oniọvo ro vwo ota na ohwo rọ cha vwẹ ukẹcha kẹ vẹ ona ro vwo ruo. Ohwo orua rẹ oniọvo ro vwo ota na yẹrẹ oniọvo ọshare vwẹ ukoko na yin che nene oniọvo ro vwo ota na ru udje na. Ọ je sa vwẹ ẹkpo ri Baibol efa ri churobọ si uyovwinrota na vwọba tota na. Nọke aruọke, a sa vwẹ ẹbẹre nana vwọ kẹ ọkpako. Ọkpako ro vwo ota na ọvo sa sane ohwo ro che nene tota na vẹ ona ro vwo ruo. Aphro herọ-ọ, oma cha vwerhe iniọvo na rẹ ayen da mrẹ ọkpako ro ruẹ udje rẹ ona revwo yono vẹ orua rọyen.
Rhiabọ reyọ uchebro, je vwo ruiruo rere wọ sa yan obaro
8 Uchebro: Siẹrẹ oniọvo vuọvo da tota rọyen nu, oniruo isikuru na cha vwẹ ibrẹro ivẹ vwo jiri oniọvo na, je kẹ uchebro kirobo rẹ ọbe ri Benefit From Theocratic Ministry School Education tare. Ọke oniruo isikuru na de durhie oniọvo ro vwo ota na, o che djunute ẹkpo ra guọnọre nẹ ọ wian phiyọ na-a. Ẹkẹvuọvo, siẹrẹ oniọvo na da tota rọyen nu, oniruo isukuru na gbe jiri oniọvo na, ọ je tota kpahen ẹkpo rẹ uchebro rẹ oniọvo na wian phiyọ, o djunute oborẹ oniọvo na ru yovwin te vwẹ ẹkpo yena yẹrẹ ọ ta kpahen erere ro che no rhe siẹrẹ oniọvo na da rhoma nabọ wian kpahen ẹkpo yena.
9 Ifọmu rẹ uwan rota rẹ iniọvo na hẹ aruẹbe 79 fiẹ 81 rẹ ọbe ri Ministry School rayen. Ọke rẹ oniọvo na da tota rọyen nu, oniruo iskuru na kọ cha joka phiyọ ọbe rẹ oniọvo na, ọ me je nọ sẹ o ru obo ra tare nẹ o ru vwevunrẹ ọbe na. Wo se jiri ọniọvo na, je vwẹ iroroẹjẹ efa re sa chọn uko vwọ kẹ siẹrẹ omẹvwa na de kuphiyọ nu yẹrẹ vwẹ ọke ọfa. Ukẹcha ra vwọ kẹ oniọvo vuọvo vwẹ isikuru na ọyen uphẹn rẹ ọ vwọ yan obaro vwọrẹ ẹwẹn.—1 Tim. 4:15.
10 Siẹrẹ oniọvo na de ru vrẹ ọke, e jẹ oniruo isikuru na yẹrẹ ohwọfa rọ vwẹ ukẹcha kẹ dje oka phia womarẹ agogo ehworo yẹrẹ ọ vwẹ obọ teyen asan, rere oniọvo rọ tota na vwọ riẹn nẹ ọke rọyen vrẹ re. E jẹ ọ ro vwo ota na vwo ọmrẹvughe rẹ oka na rere o ku ota rọyen phiyọ, o vrẹn nẹ umukpe na.—Ni ọbe ri Ministry School, aruọbe 282, ẹko. 4.
11 A vwẹ uchebro kẹ ihwoeje ri muwan kẹ isikuru na nẹ ayen si odẹ phiyotọ vwẹ Isikuru rẹ Iruo Ruvie Na. (Ni ọbe ri Ministry School, aruọbe 282, ẹko. 6.) Uyono ro nẹ isikuru na cha vwẹ ukẹcha kẹ idibo ri Jihova vwo yono ji ghwoghwo iyẹnrẹn esiri rẹ Uvie na vẹ imuẹro, ọghọ kugbe ẹguọnọ. Aphro herọ-ọ, oma vwerhe Jihova fikiridie ihwoeje re mrẹ erere vwọnẹ isikuru na rhe, vwẹ ujiri vwọ ke.—Une 148:12, 13; Aiz. 50:4.