Revwo ru Uyono ri Baibol rọ Ghwotọ
1. Oghwa vọ yẹn ighwoghwota re vwẹ Baibol na vwo yono ihwo vwori?
1 Ohwo ọvuọvo cha sa ga Ọghẹnẹ-ẹ, jọkpanẹ Jihova yen “siro.” (Jọn 6:44) Dede na, o fori nẹ ighwoghwota re vwẹ Baibol na yono ihwo davwẹngba rere ayen sa vwẹ ukẹcha kẹ ihwo na vwo sikẹre Ọse rayen rọhẹ odjuvwu. (Jems 4:8) Ọnana guọnọ egbemuo. E di vwo se ẹkoreta, je nọ enọ rehẹ evunrẹ ọbe na cha sa ghwa vwẹ ukẹcha kẹ ohwo re yono na vwo vwo ẹruọ rẹ uyono na, je yan obaro-o.
2. Die yin se nẹ obuko rẹ uyono ri Baibol rọ ghwotọ rhe?
2 Rere uyono rẹ avwanre savwọ ghwotọ, o fori nẹ ighwoghwota na vwẹ ukẹcha kẹ ohwo re yono na siẹnẹ (1) o vwo ẹruọ rẹ obo ri Baibol na yonori, (2) ọ vwọ rhọvwen phiyọ obo ri Baibol na yonori, kugbe (3) ọ vwọ reyọ obo ri Baibol na yonori vwo ruiruo. (Jọn 3:16; 17:3; Jems 2:26) Ọ sa reyọ emeranvwe evo tavwen ọ re yono na ki se ru nene owọẹjẹ nana. Dede na, owọẹjẹ nana sa nẹrhẹ oyerinkugbe rọyen vẹ ọ ri Jihova ganphiyọ, je nẹrhẹ ọ vwomakpahotọ ki Jihova.
3. Diesorọ omamọ rẹ oyono vwọ nọ enọ re sa nẹrhẹ ohwo na ta obo rehẹ evunrẹ ẹwẹn rọyen?
3 Die Yẹn ọ ra Vwẹ Baibol Vwo Yono Roro Kpahen?: Rere avwanre sa vwọ riẹn sẹ ohwo rẹ avwanre yono Baibol na vwo ẹruọ rẹ uyono na, je rhọnvwe phiyọ obo ro yono na, ko fori a vwọ kẹnoma kẹ uruemu rẹ avwanre ọvo vwọ tota, vuẹ ohwo ru wo yono na nẹ ọ ta obo rehẹ evunrẹ ẹwẹn rọyen. (Jems 1:19) O vwo ẹruọ rẹ obo ri Baibol na tare kpahen uyovwinrota rẹ ovwan yono na? Ọ sa vwẹ eta romobọ rọyen vwo dje kpahen uyovwinrota na? Ẹwẹn vọ yẹn o vwori kpahen obo ro yono na? O vwo imuẹro nẹ ọhọ evunrẹ obo ri Baibol na yono? (1 Tẹsa. 2:13) Ọ riẹnre nẹ o fori rere obo ro yono na wene akpeyeren rọyen? (Kọl. 3:10) Rere avwanre sa vwọ mrẹ ẹkpahọnphiyọ rẹ enọ nana, o fori nẹ avwanre vwẹ aghwanre vwọ nọ enọ re sa nẹrhẹ ohwo na ta obo rehẹ evunrẹ ẹwẹn rọyen, avwanre me je kerhọ.—Mat. 16:13-16.
4. Die yen avwanre ru siẹrẹ ohwo re yono Baibol na re vwo ẹruọ rẹ obo ro yono na-a, yẹrẹ ọ sa reyọ vwo ruiruo-o?
4 Tavwen e ki se yono ohwo vwo siobọnu iruemu vẹ iroro rọyen, ọ reyọ ọke. (2 Kọr. 10:5) Kọ da rha dianẹ ohwo rẹ avwanre yono na rhọvwen phiyọ obo rẹ avwanre yono na-a? Ọ guọnọ edirin vẹ ọke tavwen Ota rẹ Ọghẹnẹ vẹ ẹwẹn ọfuanfon na ki se mu ohwo na vwọ reyọ obo ro yono na vwo ruiruo. (1 Kọr. 3:6, 7; Hib. 4:12) Siẹrẹ ohwo ru wo yono na re se vwo ẹruọ rẹ uyono ri Baibol na-a, yẹrẹ ọ sa reyọ vwo ruiruo-o, kpẹ uyovwinrota ọfa, ukpe ru wọ vwọ gba. Avwanre da vwẹ edirin vẹ ẹguọnọ vwo yono ohwo na Baibol na, ememerha na, ko se ru ewene ra guọnọre vwẹ akpeyeren rọyen.