Reyọ Uphẹn ru Wo Vwori Eje Vwo Ghwoghwo Ovuẹ rẹ Uvie Na!

1. Die yẹn avwanre yono nẹ udje ri Devid rhe?

¹ Ovie Devid vwẹ uphẹn kẹ ẹdia ro hirharoku nẹ e kuọrọn ẹwẹn rọye-en. Kerẹ udje, Devid guọnọ bọn uwevwin kẹ Jihova. Ọghẹnẹ vwọ vuẹ nẹ ọ diẹ ọyen cha bọ-ọn, Devid de wene obo rọ tẹrovi, o de muegbe rẹ ekwakwa ra cha vwọ bọn uwevwin rẹ ẹga na kẹ Solomọn. (1 Ivie 8:​17-​19; 1 Ikun 29:​3-9) Ukpe rọ vwọ tẹrovi obo ro che se ru-u, Devid da tẹrovi obo ro se ru. Mavọ avwanre sa vwẹrokere udje ri Devid ra vwọ guọnọ idjerhe sansan rẹ avwanre vwo ghwoghwo ovuẹ rẹ Uvie na?

2. Oma ẹfuẹrẹn vọ yẹn avwanre se ru?

² Ru Asan Ẹgba Wẹn Teri: Iniọvo buebun ru akpeyeren rayen lọhọ rere ayen sa vwọ dia ekobaro rẹ ubrọke yẹrẹ e rẹ ọkieje. (Mat. 6:​22, ftn.) Wọ sa dia ọvo usun rayen? Wọ vwọ fuẹrẹn ẹdia wẹn vwọrẹ ẹrhovwo na, wọ cha mrẹ nẹ “ẹchẹ ọhẹhẹre rẹ iruo rọ ghwotọ” rhiephiyọ kẹ wẹ. Ọ da diẹ ọtiọyen, reyẹ uphẹn nana vwọ wian!​​—⁠1 Kọr. 16:​8, 9.

3. Uphẹn vọ yẹn avwanre se vwo ghwoghwo ọ da dianẹ ẹdia rẹ avwanre hepha rha nẹrhẹ avwanre dia ọkobaro-o?

³ Kẹ, ẹdia ru vwọ hepha rha vwẹ uphẹn kẹ wẹ vwọ dia ọkobaro-o vwo? Reyẹ uphẹn efa ri rhiephiyọ kẹ wẹ vwo ghwoghwo. Kerẹ udje, ọ da dianẹ wọ mrẹ ihwo vwẹ asan ru wọ da wiowian, diesorọ wọ rha reyọ uphẹn yena vwo ghwoghwo kẹ aye-en? Yẹrẹ ọ da dianẹ oma kpokpọ rhe we-e, diesorọ wọ ra vwẹ uphẹn yena vwo ghwoghwo kẹ ihwo efa ri sivwin we-e? Karophiyọ nẹ uphẹn herọ vwọkẹ ihwo ri vwo oma kpokpọ-ọ yẹrẹ emare ayen vwọ niyẹnrẹn ibrẹro 15 kpenu kemeranvwe kemeranvwe. Wọ da cha niyẹnrẹn vwẹ oba rẹ emeranvwe na, niyẹnrẹn ọke wo vwo ru aghwoghwo ri kpregede, uchunu ẹbe wo phi phiyẹ ada, ẹmẹbe vẹ i re vwo durhie ihwo cha Ẹkarophiyọ rẹ ughwu ri Jesu vẹ ọghwẹkoko. Siẹrẹ wo de ku ọke yena eje kugbe o che gbevwunu wọ vwọ riẹn oborẹ i bun te!

4. Orhiẹn vọ yin wo bru ru?

⁴ Otoro ẹdia rẹ avwanre hepha-a, e jẹ avwanre reyọ kuphẹn kuphẹn vwo ghwoghwo iyẹnrẹn esiri na. Ọke yena oma kọ vwerhen avwanre ravwọ riẹn nẹ e ru obo re se ru fikirẹ Uvie na.​​—⁠Mak 14:8; Luk 21:​2-4.