Nene Udje rẹ Emraro Na—Nahum
1. Die avwanre yono nẹ ọbe ri Nahum rhe?
1 Orere ri Ninivẹ ra ghwọrọ totọ kirobo ri Nahum mraro rọyen, djerephia nẹ Jihova vwo ẹgba ro vwo ru obo rọ ta kpahen ivwighrẹn rọyen eje, otoro obo rẹ ayen gan te-e. (Nah. 1:2, 6) Ẹfuẹrẹn rẹ aroẹmrẹ ri Nahum cha chọn avwanre uko vwẹ iruo rẹ aghwoghwo rẹ avwanre.
2. Ovuẹ omavwerhovwẹn vọ yen avwanre ghwoghwo?
2 Vwẹ Uchebro vẹ Iphiẹrophiyọ Vwọ kẹ Ihwo: Ẹsosuọ, ohwo de se ọbe ri Nahum, o se roro nẹ aghwoghwo rẹ oghwọrọ ri Ninivẹ rọ diẹ otorho Asiria vwẹ ọke awanre ọvo, ọyen e si phiyọ. (Nah. 1:1; 3:7) Ẹkẹvuọvo ọna aghwoghwo rẹ omavwerhovwẹn kẹ ihwo ri Jihova. Odẹ na Nahum ro mudiaphiyọ “Obruche” na kẹ ihwo ri Ju imuẹro nẹ a cha ghwọrọ ivwighrẹn rayen ọmọke krẹn! Nahum tare nẹ Jihova ọyen “asan odjahọ vwẹ ẹdẹ rẹ ukpokpogho.” (Nah. 1:7) Avwanre vwo ghwoghwo na, e jẹ avwanre phiudu phiyọ ihwo awọ, je vuẹ ayen nẹ ayen vwẹ Jihova ru asan rẹ odjahọ rayen.—Nah. 1:15.
3. Mavọ avwanre sa vwọ reyẹ idje vẹ obo re phiare vwọba tota kerẹ Nahum?
3 Vwẹ Idje vẹ Obo re Phiare Vwọba Tota: Ẹwẹn Ọfuanfon ri Jihova mu Nahum vwọ mraro nẹ oghwọrọ ri Ninivẹ cha dia kerẹ ọ rẹ orere ri Tib (No-amon) vwẹ Ijipt, rẹ Asiria ka ghwọrọ. (Nah. 3:8-10) Avwanre vwo ghwoghwo kẹ ihwoefa kpahen oba rẹ akpọ umwemwu nana, e jẹ avwanre kanrunumu aroẹmrẹ ri Baibol ri djerephia nẹ eta ri Jihova ruẹgba kare kare. Kerẹ udje, ọke rẹ ihwo ri Babilọn vẹ Mid vwọ kparẹ ofovwin rhiẹ Ninivẹ vwẹ 632 B.C.E., osio ọgangan rọ rhọre, kọ rhe nẹrhẹ Urhie ri Tigris mwavwe ra guọghọ ẹbẹre ọvo rẹ igbẹhẹn ọgangan rẹ orere na. Ede phi Ninivẹ kparobọ kiroborẹ Jihova tare.—Nah. 1:8; 2:6
4. Mavọ avwanre sa vwọ tota phephẹn rere ihwo vwo vwo ẹruọ rẹ aghwoghwo avwanre?
4 Jẹ Ota na Phẹn ọ je ro Ihwo: Ọbe ri Nahum siri na vọnre vẹ idjedje. Idjedje rọyen na phẹnre. (Nah. 1:14; 3:1) Ọtiọyena ko fori nẹ avwanre ta eta rẹ ihwo se vwo ẹruọ rayen. (1 Kọr. 14:9) Ẹsosuọ wo vwo te asan rẹ ohwo na, vuẹ obo ri mu we rhe. Wẹ vẹ ihwo vwo yono na, chọn ayen uko vwo vwo esegbuyota kpahen Jihova kugbe ota rọyen, ji vwẹ ukẹcha kẹ ayen vwọ mrẹ oborẹ uyono na djobọte akpeyeren rayen.—Rom. 10:14.
5. Imuẹro vọ yen aroẹmrẹ ri Nahum kẹ avwanre?
5 A mrẹ ẹroẹvwọsuọ ri Nahum kpahen ota ri Jihova ro shefia-a vwẹ ọbe ri Baibol ra vwẹ odẹ rọyen se. Oba akpọ umwemwu rẹ Eshu vwo siẹkẹrẹ na, avwanre mrẹ uchebro nẹ eta nana rhe: “Ọ cha reihri asiava kpahen ivwighrẹn rọye-en.”—Nah. 1:9.